Azərbaycan nöqtə qoydu - sülhməramlılar 2025-də çıxacaq...
![Image](/uploads/posts/2023-12/sulhmeram.webp)
“Azərbaycan rəsmən mesaj göndərir ki, 2025-ci ildə rus sülhməramlıları Qarabağdan çıxmalıdır”
Azərbaycan Xarici işlər naziri Ceyhun Bayramov Qarabağdakı Rusiya sülhməramlılarının gələcək taleyindən danışıb. Bu barədə Ceyhun Bayramov nazirliyin ilin yekununa dair hesabat brifinqində çıxışı zamanı məlumat verib:
“Fakt ondan ibarətdir ki, üçtərəfli bəyanat var. Bu, liderlər səviyyəsində imzalanıb. Sülhməramlıların Qarabağda qalma müddəti 2025-ci ilin noyabrına qədər nəzərdə tutulub”.
Ceyhun Bayramov deyib ki, sülhməramlıların 2025-ci ilədək qalmaları barədə sənəd var, bu əsas götürülməlidir.
Bu o anlama əsas verirmi ki, 2025-də rus qoşunları Qarabağan çıxacaq?
Azad Vətən Partiyasının sədri Akif Nağı “Bakı-Xəbər”ə şərhində bildirdi ki, Azərbaycan üzərinə götürdüyü öhdəliklərə həmişə əməl edib, imza atdığı sənədlərə sadiq qalıb. Ermənistan kimi bəzi dövlətlərin sənədlərə imza atdığını və sonra onu yerinə yetirmədiyini, verdikləri sözə əməl etmədiklərini deyən A.Nağı qeyd etdi ki, bu əsasən ermənilərə xas olan xüsusiyyətdir. “Azərbaycan müəyyən situasiyada hansı sənədi imzalayırsa, sonra da imzasına sadiq qalır. Xarici işlər naziri Ceyhun Bayramovun bu açıqlaması həmin mövqeyə işarədir ki, Azərbaycan öz öhdəliklərinə sadiqdir. Bunun iki tərəfi var: həm Azərbaycan öz öhdəliklərinə sadiqdir, bu onu göstərir, yəni beynəlxalq münasibətlərdə hər kəsin öz üzərinə götürdüyü öhdəliklərə əmək etməsi hər tərəfdən, dost tərəfindən də, düşmən tərəfindən də müsbət dəyərləndirilir. Azərbaycan bu tərəfini qabardıb. Digər tərəfdən də, Azərbaycan rəhbərliyinin mövqeyi bundan ibarətdir ki, sülhməramlıların Qarabağda sonuncu qalma tarixi 2025-ci ildir, bundan o yana qalmayacaqlar. Görünən budur ki, Azərbaycanın bu mövqeyini Rusiya tərəfi də qəbul edir. Digər məsələ də ondan ibarətdir ki, artıq regionda rus sülhməramlılarına ehtiyac yoxdur”-deyə A.Nağı qeyd etdi.
A.Nağının sözlərinə görə, Rusiya hansısa təxribatlar törədə, gərginlik yarada bilər. O vurğuladı ki, hazırda Ermənitanda Rusiyanın əli ilə hadisələr baş verir, Qarabağdan getmiş separatçı tör-töküntüləri, terrorçu qruplaşmanın üzvləri bu ölkənin göstərişi ilə Paşinyan hakimiyyətinə qarşı hərəkət etməyə, başqa bir fikir formalaşdırmağa, başqa bir fəaliyyət həyata keçirməyə çalışır. Onun qeyd etdiyinə görə, onlar belə təəsvvür yaradırlar ki, guya aradan çıxmayıblar, onlar “var”, Paşinyan hakimiyyətinə qarşıdırlar. A.Nağı bildirdi ki, separatçı Samvel Şahramanyanın kortecdə hərəkət edərkən həbs edilməsi və sair məsələlər Ermənistanın daxilində Rusiyanın əli ilə ciddi proseslər getdiyini göstərir. Onun sözlərinə görə, Rusiya sabah ortaya müəyyən adamlar çıxara və onlardan Paşinyan hökumətinə qarşı istifadə edə bilər. Rusiyanın əsas məqsədinin qarışıqlıq yaratmaq yolu ilə Ermənistanda yenidən nəzarətini gücləndirmək və bölgədə varlığını qorumaq olduğunu deyən A.Nağının bildirdiyinə görə, Rusiya bölgədən getməməyə çalışır. “Bu qarışıqlığa görə də Rusiya, ola bilsin, sülhməramlların regionda qalmasının vacibliyini əsaslandırmağa çalışsın.
Rusiya hər variantdan istifadə edə bilər. Ona görə də Azərbaycan rəsmən mesaj göndərir ki, 2025-ci ildə rus sülhməramlıları Qarabağdan çıxamalıdır. Yəni onlar bu tarixdən o yana qala bilməzlər, Azərbaycanın mövqeyi qətidir. Amma ehtimal edirəm ki, sülhməramlılar 2025-ci ildən tez də çıxa bilərlər. Azərbaycanda növbədənkənar prezident seçkilərindən sonra paralament seçkiləri olacaq. Azərbaycanda siyasi dəngələr, belə deyək, hər şey yerinə qoyulandan sonra, ola bislin, 2025-ci ilin əvvəlindən artıq məsələ qoyulsun ki, çıxın. Sülhməramlıların qalma müddəti 2025-ci ilin sonuna qədərdir. Amma Azərbaycan yəqin ki, bunu Rusiya ilə gərginlik, qarşıdurma yaratmadan edəcək. Çünki Rusiya ilə qarşıdurma, gərginlik yaratmağa ehtiyac yoxdur”.
A.Nağının sözlərinə görə, son günlər Rusiyanın xarici işlər naziri Ermənistandakı 102-ci hərbi baza ilə bağlı açıqlamalar verir, aydın görünür ki, yəqin Ermənistan tərəfindən Gümrüdəki rus hərbi bazasının çıxarılması ilə əlaqədar müəyyən mesajlar verilir. “Lavrov da onlara mesaj göndərdi ki, bu məsələnin müzakirəsi zərərli ola bilər. Yəni Ermənistanı hədələdi ki, siz bunun bədələni ödəyə bilərsiz. İşarə də olunur ki, hərbi bazanın 2044-cü ilə qədər orada qalması üçün Rusiya və Ermənistan rəhbərliyi arasında müqavilə imzalanıb, həmin müqaviləyə əməl olunmalıdır. Hesab edirəm, burada Azərbaycan həm də ona mesaj göndərir ki, Ermənistan artıq Rusiya ilə imzaladığı müqavilənin öhdəliklərinə əməl etmək istəmir, Amma Azərbaycan öz öhdəliklərinə sadiqdir. Baxın, məsələnin bu tərəfi də var. İstənilən halda Azərbaycan üstün mövqedədir, Azərbaycan öz mövqeyini diqtə edir. Rusiya sülhməramlılarının yerləşdirilməsi, demək olar ki, artıq heç nəyə təsir etmir, Azərbauycan tam sərbəst şəkildə istər hərbi, istərsə də mülki istiqamətdə suveren hüquqlarını tam şəkildə bərpa edib. Regionda Rusiya sülhməramlıları, demək olar ki, “beşinci təkərə” çevrilib. Yəni maşının beşinci təkəri rolundadırlar, onların orada heç bir funksiyası yoxdur. Sadəcə oturub orada nə isə gözləyirlər. Nə Azərbaycan onlarla nəyisə məsləhətləşir, nə də onların özlərinin nəyisə müdafiə etmək imkanları var. Belə bir vəziyyətdir. Bu vəziyyətdə Azərbaycan hansısa qıcıqlandırıcı hərəkət etməkdən çəkinməlidir, öz işini sakit şəkildə öz planına uyğun həyata keçirib və keçirməlidir də” - deyə A.Nağı əlavə etdi.
İradə SARIYEVA