Qərbin sanksiyalarına düşmüş VTB bank Azərbaycana pul köçürmək yolu tapdı...
Vüqar Bayramov: “VTB-nin açıqlaması heç də elektron köçürmələr və yaxud da pulqabı ilə əlaqəli deyil”
Sanksiyaya məruz qalan VTB bank transsərhəd köçürmələrdə SWIFT sistemindən yan keçib. ABŞ, Avropa İttifaqı və Böyük Britaniyanın sanksiyalarına məruz qalan və SWIFT sistemindən ayrılan VTB bank hesabı açmadan nağd şəkildə vəsait vermək imkanı ilə transsərhəd pul köçürmələri həyata keçirməyə başlayıb.
Bu barədə VTB-nin pərakəndə ticarət departamentinin rəhbəri Aleksey Xranilov məlumat verib.
Xranilov RBK-ya bildirib ki, VTB bank hesabı açmadan nağd pul vermək imkanı ilə beynəlxalq köçürmələr həyata keçirməyə başlayıb. Onun sözlərinə görə, ilk mərhələdə Azərbaycan, Belarus, Moldova, Ermənistan, Monqolustan, Abxaziya və Serbiyaya pul köçürülə bilər. Xranilov qeyd edib ki, ilin sonuna qədər bank ölkələrin sayını 20-yə çatdırmağı planlaşdırır. Qeyd edək ki, 2022-ci ildən VTB ABŞ, Avropa İttifaqı və Böyük Britaniyanın sanksiyaları altındadır və həmçinin SWIFT sistemindən ayrılıb. Bu səbəbdən o, dollar, avro və bəzi digər valyutalarda əməliyyatlar apara bilmir.
Görünən odur ki, VTB bank, sanksiyalar altında olmasına baxmayaraq, Azərbaycana pul göndərmək imkanı əldə edib. Maraqlıdır, VTB bankın mexanizmi nə qədər etibarlıdır? Bank hesabı açmadan nağd şəkildə vəsait vermək imkanı ilə transsərhəd pul köçürmələri iqtisadi-maliyyə dili ilə desək nə deməkdir?
“Burada əvvəlki dövrlərdə Rusiya və bir sıra MDB ölkələri arasında formalaşan nağd şəbəkə ödənişlərindən söhbət gedə bilər”Sözügedən məsələyə aydınlıq gətirən millət vəkili Vüqar Bayramov “Bakı-Xəbər”ə açıqlamasında bununla bağlı bir sıra məqamlara toxundu: “Bank hesabı açmadan bütövlükdə köçürmələrin həyata keçirilməsi elektron ödənişlərlə mümkündür. Yaxud da bunu regionda olan bir sıra miliyyə qurumları şəbəkə sistemi ilə həyata keçirə bilərlər. Məsələ ondadır ki, elektron ödənişlərdə bank hesabının açılmasına ehtiyac yoxdur. Bu, blokçeync texnologiyasına uyğun olaraq vəsaitlərin köçürülməsi və eləcə də elektron pulqabının yaradılmasına imkan yaradır. Ancaq hər halda gözlənilir ki, VTB-nin açıqlaması heç də elektron köçürmələr və yaxud da pulqabı ilə əlaqəli deyil. Burada əvvəlki dövrlərdə Rusiya və bir sıra MDB ölkələri arasında formalaşan nağd şəbəkə ödənişlərindən söhbət gedə bilər. Ona görə də konkret olaraq hansı mexanizmlərdən istiifadə ediləcəyi aydın deyil. Yəni, VTB-nin yaydığı məlumatda bunun mexanizmi göstərilməyib. Ancaq istənilən halda azərbaycanlılar üçün pul köçürmələri vacibdir. Azərbaycanla Rusiya arasında idxalın həcmi kifayət qədər böyükdür. Bu da təbii ki, həm bank, həm də nağd ödənişlərin həcminə təsir göstərir. Rusiyada yaşayan azərbaycanlıların rimitensi formasında ödədiyi vəsaitlər var. Onların da ödənilməsinin həyata keçirilməsi olduqca vacibdir. Hər halda gözlənilir ki, Rusiyada yaşayan azərbaycanlılar bu imkandan daha fəal istifadə edə bilərlər, amma VTB bankı tərəfindən konkret mexanizm qeyd olunmadığı üçün bunun hansı yolla həyata keçiriləcəyi bəlli deyil. O üzdən, güman olunmur ki, burada söhbət konkret elektron pul köçürmələrindən gedir. Çünki hələlik Rusiya bankları praktik olaraq elektron pul köçürmələri, yəni, bank hesabı olmadan pul köçürmələrini reallaşdırmayıblar”.
Vidadi ORDAHALLI
