AMEA-nın nizamnaməsində köklü yeniliklər edildi - Prezident nələri dəyişdi...
Teymur Kərimli: “Nizamnamədə bir sıra vacib yeniliklər öz əksini tapıb, bu, yenilənmiş akademiyanın nizamnaməsidir”
Azərbaycan elmində islahatların dərinləşməsi, məzmunun genişlənməsi əsas hədəflərdən biri olmalıdır. Bu prosesin başında Azərbaycan Milli Elmlər Akademiyasının (AMEA) durmalı olduğu məlumdur.
Azərbaycan ictimaiyyəti, bir çox elm xadimləri, ziyalılar uzun illərdir ki, AMEA-nı fəaliyyətsizlikdə suçlayırdılar və hətta bu qurumun səmərə vermədiyini, bu səbəbdən bağlanmalı olduğunu iddia edirdilər. Bildiyimiz kimi, ötən il Azərbaycan Prezidentinin müvafiq sərəncamı ilə AMEA-nın texniki, təbiət elmləri ilə bağlı institutları Elm və Təhsil Nazirliyinin tabeliyinə verildi, humanitar və ictimai elmlər Akademiyanın tabeliyində qaldı.
Bildiyimiz kimi, noyabrın 3-də Prezident İlham Əliyevin fərmanı ilə Azərbaycan Milli Elmlər Akademiyasının (AMEA) Ümumi Yığıncağında qəbul olunmuş “Azərbaycan Milli Elmlər Akademiyasının Nizamnaməsi” təsdiq edilib.
Yeni Nizamnamədə hansı prinsipial yeniliklər var? Nələr dəyişdi, nələr qaldı? Müasir tələblərə cavab verən nə kimi yeniliklər var?
Qeyd edək ki, AMEA-nın Nizamnaməsinə dəyişiklik edilməsi sosial şəbəkələrdə geniş müzakirə edilir, elmlə məşğul olan şəxslərin fikrincə, əgər nizamnamənin bəndləri tam olaraq icra olunarsa, elm sahəsində uğurlu nəticələr əldə etmək mümkün olacaq. Ən çox maraq doğuran məsələlərdən biri məhz sənəddə əksini tapan “sahibkarlıq fəaliyyətindən əldə etdiyi gəlirləri Akademiyanın inkişafına və əməkdaşlarının sosial müdafiəsinə yönəltmək, elmi müəssisə və təşkilatlarla, ali təhsil müəssisələri ilə, təsis sənədlərində elmi fəaliyyət nəzərdə tutulan ictimai birliklər və digər hüquqi şəxslərlə əməkdaşlıq etmək, sahələrarası elmi tədqiqat işlərini inkişaf etdirmək, öz fəaliyyəti haqqında əhalinin məlumatlandırılmasını, internet saytının yaradılmasını, malik olduğu və siyahısı “İnformasiya əldə etmək haqqında” Azərbaycan Respublikasının Qanunu ilə müəyyən edilmiş açıqlanmalı olan ictimai informasiyanın həmin saytda yerləşdirilməsini və bu informasiyanın daim yenilənməsini təmin etmək, Akademiyaya ayrılan büdcə vəsaitindən, kredit, qrant və digər maliyyə vəsaitindən təyinatı üzrə səmərəli istifadəni təmin etmək, qabaqcıl beynəlxalq təcrübəni nəzərə almaqla, elmi-texniki nailiyyətlərin tətbiqini təmin etmək və sair məqamlardır.
“Bu sənədin işığında islahatlar daha da dərinləşəcək”
AMEA-nın Məhəmməd Füzuli adına Əlyazmalar İnstitutunun Baş direktoru, akademik Teymur Kərimli “Bakı-Xəbər”ə şərhində “Nizamnamənin müəllifi akademik İsa Həbibəylidir. Akademiyada humanitar və texniki elmlər bir-birindən ayrıldı. Bilirsiz ki, texniki elmlər Elm və Təhsil Nazirliyinin tabeliyinə keçdi, Akademiyada isə humanitar və ictimai elmlər qaldı. Akademik İsa Həbibəyli prezident seçiləndən sonra bir sıra islahatlar apardı, struktur dəyişiklikləri həyata keçirdi, əvvəlki dövrlərdə mövcud olan və o qədər də səmərəli olmayan kadr siyasətinə yenidən baxdı. Yəni AMEA-da bir sıra uğurlu dəyişikliklər baş verdi. Akademiyanın nizamnaməsinin yenilənməsi zəruri idi. Nizamnamədə bir sıra vacib yeniliklər öz əksini tapıb, bu, yenilənmiş akademiyanın nizamnaməsidir. Biz cənab Prezidentə təşəkkür edirik ki, çox böyük ehtimad göstərib. Düşünürük ki, Azərbaycanın humanitar və ictimai elmləri bundan sonra da dövlətçiliyimizə, xalqımızın rifah halının yaxşılaşdırılmasına, səsimizin, beynəlxalq aləmdə daha geniş yayılmasına yardım göstərəcək”-deyə bildirdi.
T.Kərimli qeyd etdi ki, AMEA təmsilçiləri də bu yolda əlindən gələn köməyi əsirgəməyəcək. Nizamnamənin islahatların daha da dərinləşməsinə yol açmaq gücündə olub-olmadığına gəlincə, T.Kərimlinin sözlərinə görə, bu nizamnamə islahatların daha da dərinləşməsinə təkan verəcək. “Şübhəsiz ki, bu bizə yol göstərən bir sənəddir. Bu sənədin işığında islahatlar daha da dərinləşəcək. İslahatların dərinləşdirilməsində məqsəd yalnız islahat aparmaq deyil, eyni zamanda islahatların gedişi humanitar və ictimai elmlərin cəmiyyət həyatına daha dərindən nüfuz etməsinə, bir növ innovativ xarakter daşımasına imkan verəcək. Bu cəhətdən cəmiyyətimizə, dövlətimizə fayda verəcək...” - deyə T.Kərimli əlavə etdi. Akademik bildirdi ki, yeni nizamnamədə müasir dövrün tələblərini əks etdirən yeniliklər əks olunub.
İradə SARIYEVA
