Beynəlxalq Ədalət Məhkəməsi Ermənistanı vurdu - “Azərbaycandakı etnik təmizləməni araşdıracağıq”...
Əli Mustafa: “Hesab edirəm ki, Ermənistanın “etnik təmizləmə” ilə bağlı iddiaları təmin edilməyəcək”
BMT-nın Beynəlxalq Ədalət Məhkəməsi (BƏM) noyabrın 12-də bəyan edib ki, Ermənistanla Azərbaycanın Qarabağla bağlı qarşılıqlı şikayətlərinə baxmaq üçün yurisdiksiyası var. Məhkəmə kollegiyasının 17 üzvünün yekdilliklə qəbul etdiyi qərar BƏM-ə 2021-ci ilin sentyabrında göndərilən qarşılıqlı şikayətlərə aiddir.
Üstəlik, BƏM Ermənistanın iki etirazını təmin, birini isə rədd edib. Ermənistan iddia edir ki, Azərbaycan irqi ayrıseçkiliyin bütün formalarının ləğv edilməsi haqqında Beynəlxalq Konvensiyanı pozub və regionda “etnik təmizləmə” siyasəti aparıb. Azərbaycan ittihamları rədd edərək BƏM-ə qarşılıqlı iddia göndərib. Rəsmi Bakı Ermənistanı nifrət və "irqçi" təbliğata təhrik etməkdə günahlandırıb.
Azərbaycan XİN-in BƏM-in verdiyi qərarla bağlı açıqlamasında deyilir: “Ermənistanın onilliklər boyunca Azərbaycanın beynəlxalq səviyyədə tanınmış ərazisini işğalda saxladığı müddətdə həyata keçirdiyi etnik təmizləmə və digər qeyri-qanuni əməllər bundan sonra Məhkəmə tərəfindən mahiyyəti üzrə ətraflı şəkildə araşdırılacaq”.
XİN-in açıqlamasına görə, məhkəmə Ermənistanın mina və gizli mina tələləri yerləşdirməsinə dair iddiaların qərardan çıxarılması cəhdlərini rədd edib.
“Xocalıda hərbi cinayətləri törədən caniləri beynəlxalq məhkəmələr mühakimə etməlidir”
Sözügedən məsələni “Bakı-Xəbər”ə şərh edən Demokratik Dəyişim Partiyası Təşkilat Komitəsinin sədri Əli Mustafanın fikrincə, Ermənistan bunu inkar etsə də, reallıq bundan ibarətdir: “Bununla bağlı yetərincə faktlar var. 44 günlük Vətən müharibəsi və 19 sentyabr antiterror əməliyyatları zamanı Azərbaycan ərazisində çoxsaylı Ermənistan əsgəri zərərsizləşdirilib. Ermənistana məxsus çoxsaylı silah və hərbi texnika müsadirə edilib. Halbuki, uzun illər idi Ermənistan dünyanı aldadırdı. İddia edirdilər ki, guya Qarabağdakı etnik ermənilər rayonları ələ keçirib. Ancaq məlum müharibədən sonra Ermənistanın bütün fitnəkarlıqları ifşa olundu. Yəni Ermənistan işğalçı bir dövlətdir. Belə bir işğalçı dövlətin bizi etnik təmizləmədə, irqi ayrıseçkilikdə ittiham etməsi gülüncdür. Eyni zamanda bu, çox yaramaz bir hərəkətdir. Gör bunlar nə qədər abırsız və mənəviyyatsız toplumdular. İşğal dövründə bunlar Qarabağa aid olmayan 7 rayonu yer üzündən siliblər. İndi utanmadan Azərbaycanı etnik təmizləmədə ittiham edirlər. Özü də Ermənistan işğal dövründə bizə qarşı nəinki etnik təmizləmə, insanlıq əleyhinə cinayətlər törədib. Bütün bunlardan sonra həyasızcasına Azərbaycanı etnik təmizləmədə günahlandırmaq onu göstərir ki, artıq erməni əxlaqsızlığının həddi-hüdudu yoxdur. Yaxşı ki, Azərbaycan qarşılıqlı iddia ilə çıxış edib. Ermənistanın törətdiyi cinayətlərin BƏM tərəfindən mühakimə olunmasını istəyir. Bu, çox yaxşıdır. Hərçənd bunu çoxdan etmək lazım idi. Yəni ərazilərimiz işğal altında olanda bunu etmək lazım idi. Ancaq yenə də gec deyil və Azərbaycan ölkəyə vurulan 100 milyardlarla zərəri tələb etməlidir. Xocalıda və digər yaşayış məntəqələrimizdə hərbi cinayətləri törədən caniləri beynəlxalq məhkəmələr mühakimə etməlidir. Hesab edirəm ki, Ermənistanın iddiaları təmin edilməyəcək. Çünki etnik təmizləmə ilə bağlı fakt yoxdur. Ən azından ona görə ki, ermənilər Qarabağı könüllü tərk ediblər”.
Vidadi ORDAHALLI
