Banklar gözdən əlillərə böyük pisliklər edir...
Əli Kərimov: “Banklar gözdən əlil vətəndaşlara kredit vermir”
Gözdən əlil vətəndaşlarımızın bir sıra problemləri var ki, bu onları ciddi narahat edir.
Məsələn, onlara məxsus möhürlər banklar tərəfindən tanınmır, bu üzdən də onlar kredit ala bilmirlər. Halbuki, həmin möhürlər onların rəsmi imzasıdır.
“Çox təəssüflər olsun ki, bir vətəndaş kimi bizim hüquqlarımız pozulur”
Gözdən əllil Əli Kərimov “Bakı-Xəbər”ə bildirdi ki, uzun illərdir üzləşdikləri problemə görə banklardan kredit ala bilmirlər. “Bizim möhrümüzü banklar tanımır. Gözdən əlillər özləri imza ata bilmədiklərinə görə onlar üçün xüsusi möhürlər var. Biz o möhürləri xüsusi yerlərdə düzəltdiririk. O möhürü də nəinki banklarda, heç bəzən ASAN xidmətdə də tanımırlar. Amma müəyyən idarələr var ki, bizim möhürləri qəbul edirlər”.
Ə.Kərimov qeyd etdi ki, banklar gözdən əlillərin möhürlərini tanımamaqla onlar üçün problem yaradır, bir vətəndaş olaraq hüquqlarını pozurlar. “Tutalım, mənim pensiya kartımın vaxtı bitdiyi üçün kartımı dəyişməkdən ötrü banka müraciət edirəm, onlar da bizim möhürü tanımırlar deyə, müraciətimizi qəbul etmirlər. Gərək biz kiməsə etibarnamə verək, həmin adam bizim adımızdan gedib o kartı alıb gətirib bizə versin. Görün, nə qədər yanlış yanaşmadır. Bizə belə səhv yanaşma sərgilənir. Kart mənimdir, sən mənə öz kartımı birbaşa ver, niyə dolayı yollarla kartımı alıram, niyə məni incidirsən? Biz onlara təklif də edirik. Deyirik ki, indi texnika inkişaf edib və bizim telefonlarımızda yazılı proqramlar var ki, o səsli proqramlar bizim müqaviləmizi oxuyur. Mütləq deyil ki, kimsə yanımızda olub müqaviləni oxuyub qol çəksin, özümüz səsli proqramla oxuyub möhürümüzlə imza ata bilirik. Yenə də “yox” deyirlər”. Bu məsələnin həll edilməsi üçün dəfələrlə müraciət etməyimizə baxmayaraq, hələ ki, yüz faizli bir nəticə yoxdur. Bu, dövlət səviyyəsində hansısa bir şifrələrlə olmalıdır.
Bəzən qarşı tərəfi qınamaq da olmur. Niyə? Ona görə ki, istənilən adam yaxınlaşıb o möhürü düzəltdirə bilər. Tutalım, gedib mənim adımla kimlərsə möhür də hazırlada bilər, bu təhlükə də var”.
Ə.Kərimov bilirdi ki, gözdən əlillərlə bağlı hökumət, yaxud banklar tərəfindən təkmilləşdirilmiş bir iş görülməlidir, iş belə gedə bilməz. “Banklar gözdən əlil vətəndaşlara kredit vermirlər. Təkcə “Unibank” verirdi, o da deyəsən dayandırıb. Bizə o bank krediti verəndə normal insanların faizi ilə verirdi. İndi onsuz da vermir, dayandırıblar. Burda sosial fərq yoxdur ki, bu insan əngəllidir, o pensiya alır, ona aşağı faizlə kredit verək. Sən mənə 35 faizlə yox: 15 faizlə kredit ver, mən də sənin ödənişini vaxtlı-vaxtında edim. Biz hərtərəfli təkliflər irəli sürmüşük, amma bəhanə gətirirlər ki, əlillər ödəniş etmir, bankları incidirlər və sair. Biz də deyirik ki, ödəmirlərsə pensiya kartlarından çıxın pulu. Mən şəxsən pensiyanı Beynəlxalq Bankdan alıram, bu bank mənə kredit ayırsın, pulu pensiyamdan da tutsun. Buna da razı olmurlar. Deyirlər ki, yox, əlil gedib sonra şikayət edəndə bankı günahkar çıxarırlar ki, əlil pensiya ilə dolanır, sən onun pensiyasından niyə pul tutmusan? Əlil normal düşüncəli adamdır və gəlib sənəd göstərib kredit götürür, ehtiyacı var. Sən o sənədi götür de ki, bu səbəbi götürüb ona kredit vermişəm, ödəmədiyi halda pensiyasından tutmuşam. Burada normal olmayan heç nə yoxdur, iki vur ikidir. Çox təəssüflər olsun ki, bir vətəndaş kimi bizim hüquqlarımız pozulur. Söhbət ehtiyacı olan adamdan gedir ki, ona kredit verilməlidir. Ehtiyac olmasa banklara getmərik də”.
Müsahibimiz qeyd etdi ki, gözdən əlil vətəndaşlara məxsus xüsusi möhürlərin tanınması, qəbul edilməsi istiqamətində əlaqədar qurumlar banklara, digər təşkilatlara göstəriş verməlidir, yaxud yeni bir təşəbbüs irəli sürməlidir ki, belə vətəndaşlar banklardan aşağı faizlə kredit götürə bilsinlər, banklar onları aşırı dərəcədə incitməsin.
İradə SARIYEVA
