4 il əvvəl Qubadlının 1 günü belə keçmişdi...
Artıq dörd ildir ki, şəhər və kəndlərimizin erməni əsarətindən azad edilməsinin ildönümlərini qeyd edir, sevincimiz aşıb daşır, qürurumuz göylərə yüksəlir, qalib Azərbaycanın övladları olduğumuz üçün fəxr edirik. Eyni zamanda, torpaqlarımızın azad edilməsi uğrunda həlak olan oğullarımızın əziz xatirəsi uca tutulur, adları sonsuz minnətdarlıqla yad edilir, qazilərimizə çox böyük diqqət və qayğı göstərilir.
2020-ci il oktyabrın 25-də yüksək peşəkarlıqla həyata keçirilən döyüş əməliyyatları nəticəsində, əsgər və zabitlərimizin igidliyi sayəsində Qubadlının şəhər mərkəzi ilə yanaşı, 41 kəndi işğaldan azad edildi. Digər 52 kənd isə noyabrın 10-da qüvvəyə minmiş birgə Bəyanatın imzalanmasından sonra əraziyə yerləşdirilən Rusiya sülhməramlıları tərəfindən erməni silahlılarından təmizlənərək Azərbaycana qaytarıldı.
Qubadlının azad olunması Azərbaycanın hərb tarixinə necə düşdü?
Emin Həsənli: “44 günlük Vətən müharibəsinin hər günü Azərbaycan hərb tarixinə qızıl hərflərlə yazıldı”
Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənli “Bakı-Xəbər”ə açıqlamasında bildirdi ki, 44 günlük Vətən müharibəsinin hər günü Azərbaycan hərb tarixinə qızıl hərflərlə yazıldı. Rayonların işğaldan azad olunma günü isə xüsusi möhtəşəmliklə qeyd edilir: “Suqoşunan, Cəbrayıl, Qubadlı və digər bölgələrin azad edilmə günü ölkəmiz üçün əhəmiyyətlidir. Antiterror tədbirləri nəticəsində Xankəndi, Xocalı, Əsgəran və Ağdərənin azad edilməsi Azərbaycan xalqı üçün böyük sevincdir. Ali Baş Komandan İlham Əliyevin rəhbərliyi ilə Azərbaycan Ordusu zəfərə imza atdı. Bu zəfəri xalqımız xüsusi coşqu ilə qeyd edir”.
Şair Ramaldanov: “Qubadlıda döyüşlər aparmaq və əraziləri azad etmək həm taktiki, həm də strateji cəhətdən çox əhəmiyyətli idi”
Hərbi ekspert Şair Ramaldanov bildirdi ki, hər bir rayonun işğaldan azad edilməsi Azərbaycan Ordusunda ruh yüksəkliyini daha da artırır, qarşı tərəfin isə mənəvi cəhətdən böyük zərbə almasına gətirib çıxarırdı. Qubadlı Ermənistanla dövlət sərhədində yerləşir: “Zəngilandan sonra Azərbaycan Ordusu sərhəd rayonlarının azad edilməsini və Ermənistanla sərhədin bərpasını genişləndirərək uğurlu döyüş əməliyyatları aparırdı. Ərazi baxımından Qubadlı çox çətin relyefə malikdir, dağlıq, meşəlik, çaylıq ərazidir. Qubadlıda döyüşlər aparmaq və əraziləri azad etmək həm taktiki, həm də strateji cəhətdən çox əhəmiyyətli idi. Digər tərəfdən, Qubadlı rayonundan sonra Laçın gəlirdi. Qubadlının dəhlizə yaxın olması rayonun əhəmiyyətini daha da artırırdı. Qubadlı istiqamətində dağlıq, meşəlik ərazilərlə məhdud yol şəbəkəsi var idi. Bu ərazinin Azərbaycan Ordusunun nəzarətinə keçməsi o istiqamətdə düşmənin yollardan istifadə etmə imkanını məhdudlaşdırırdı. Qubadlı rayonu azad edildikdən sonra erməni generalları öz komandanlarına, yəni Ermənistan baş naziri Paşinyana döyüşlərin artıq perspektivsiz olması, Ermənistan ordusunun məğlubiyyətə uğraması, 20 minə yaxın heyət üzvünün mühasirəyə düşə biləcəyi haqda məruzələr hazırlamışdılar. Eyni zamanda döyüşü dayandırmaq lazım olduğu fikirləri də var idi, yoxsa düşmənin 20 minlik heyəti orada məhv ola bilərdi. Qubadlıdan Laçın istiqamətinə ordumuzun qarşısını almağa göndərilən hərbi qüvvələr digər istiqamətlərdən, o cümlədən Şuşa tərəfdən göndərilməli olurdular ki, ordumuzun sürətli irəliləməsinin qarşısını ala bilsinlər”.
Ekspert onu da əlavə etdi ki, Qubadlının azad edilməsi ilə Silahlı Qüvvələrimiz üçün Laçın ətrafında, rayonun işğaldan azad edilməsi uğrunda növbəti döyüşlərin, əməliyyatların aparılması üçün geniş imkanlar yarandı. İşğaldan azad olunan hər bir rayon bizi zəfərə doğru apardı.
Günel CƏLİLOVA
