"Melissa Group" Alatava sakinlərinə xəbər vermədən evlərini sökür...
Hüseyn Axundov: “Evin içərisində əmlak, insan olduğu halda söküntü işi aparmaq cinayət sayılır”
Bakının Yasamal rayonu, Alatava -1 qəsəbəsində sakinlər evdə ola-ola söküntü işləri aparılıb. Bu məlumatlar sosial şəbəkələrdə yayılıb. Bildirilib ki, “Melissa Group” tikinti şirkəti tərəfindən aparılan söküntü barədə sakinlərə əvvəlcədən heç bir məlumat verilməyib. Hadisə zamanı xəsarət alanların olduğu da iddia edilir.
Maraqlıdır, bu vəziyyətdə tikinti şirkətinə, söküntünü icra edən işçilərə hansısa cəza tədbiri nəzərdə tutulurmu? Ümumiyyətlə, yaşayış ola-ola söküntü aparılması nə dərəcədə düzgündür?
“Yaşayış ola-ola evlərin sökülməsi düzgün deyil, şirkət ev sakinləri ilə razılaşma əldə edə bilmədiyi təqdirdə məhkəməyə müraciət edə bilər”
Hüquqşunas Hüseyn Axundov “Bakı-Xəbər”ə şərhində bildirdi ki, Nazirlər Kabinetinin 86 saylı sərəncamı ilə 2016-cı ildən Bakıda istismar müddətini bitirmiş binaların sökülməsi, yeni binalarla əvəzlənməsi prosesinə başlanıldı. Həmin ildən bəri Bakıda çox sayda bina sökülüb və yeniləri tikilərək vətəndaşlara təhvil verilib: “Bakıda elə ərazilər var ki, sakinlərinin bir hissəsi köçüb, amma bir neçə sakin köçməyib deyə söküntü işi aparıla bilmir. Belə olan halda tikinti şirkəti həmin köçən sakinlərə məcburi kirayə pulu ödəyir. Digər tərəfdən, şirkət onlar qarşısında öhdəlik götürür ki, müəyyən müddətə bina tikilib sizə təhvil veriləcək. Amma digər sakinlərin köçməməsi tikinti şirkətinin götürdüyü öhdəliyi pozur. Bir də görürsən, aradan neçə il keçir amma sakinlər evlərinə köçə bilmirlər. İstismar müddətini bitirmiş binaların və həyət evlərinin sökülməsi prosesinin sürətlə getməsi üçün dövlət qurumları addım atmalıdır”.
Hüquqşunas bildirdi ki, yaşayış ola-ola evlərin sökülməsi düzgün deyil: “Şirkət ev sakinləri ilə razılaşma əldə edə bilmədiyi təqdirdə məhkəməyə müraciət edə bilər. Ancaq mülkiyyət sahibinin razılığı olmadan heç kim evi sökə bilməz. Qanun hər iki tərəfin razılığını tələb edir. Burada məcbur edilmə, hədə-qorxu etmək cinayət tərkibi yaradır. Evin içərisində əmlak, insan olduğu halda söküntü işi aparmaq cinayət sayılır”
Günel CƏLİLOVA
