Yağışın ağır nəticələrinə görə kim(lər) cəzalanacaq?..
Oktyabrın 22-si Bakıya yağan yağış bir sıra fəsadlara və faciəyə səbəb olub. Müntəzəm yağan yağışlar bəzi yollarda, tunellərdə subasmaya səbəb oldu, nəticədə avtomobillərin hərəkəti tamamilə dayandı. Şəhərin küçələrində böyük gölməçələr yarandı, bir sıra yerlərdə insanların hərəkəti mümkünsuz oldu.
Çoxlu sayda avtomobil qəzası da baş verdi. Hətta Azərbaycanda ilk dəfə olaraq yağışdan sonra yaranan subasma halına görə sürücü və sərnişinin ölməsi faktı da qeydə alındı. Sabunçu rayonunda yerləşən tunellərin birində suyun səviyyəsinin tunel tavanına qədər yüksəlməsi iki nəfərin dünyasını dəyişməsinə səbəb olub. Baş vermis hadisəyə görə konkret olaraq hələ heç kim cəzalandırılmayıb. Maddi, mənəvi ziyan var, ən önəmlisi, insan ölümü faktı qeydə alınıb. Şəhər təsərrüfatı ilə bağlı aidiyyəti qurumlar cavabdeh olsa da, hələ heç bir qurum cəzalandırılmayıb.
Elçin Bayramlı: “Yağan yağışa görə Bakının bərbad hala düşməsində tək bu gün vəzifədə olanlar deyil, əvvəlki aidiyyəti rəhbərlər də məsuliyyət daşıyır”
Sağlam Cəmiyyət Hərəkatının rəhbəri Elçin Bayramlı “Bakı-Xəbər”ə açıqlamasında bildirdi ki, aidiyyəti qurumların, məmurları günahı ucbatından baş verən faciələrdə heç kim cəzalandırılmır və məsələ bir neçə gün ərzində unudulur: “Ümumiyyətlə, hər hansısa hadisənin müzakirəsi sosial şəbəkədə, sosial mediada yalnız 2-3 gün olur. Sonra məsələ tamamilə unudulur. Normal ölkələrdə belə hallarda aidiyyəti orqanların məsul şəxsləri özləri könüllü şəkildə istefa verir. Çünki insani, vicdani xüsusiyyətlərə görə hadisədə günahı olan şəxslər könüllü şəkildə istefa verməlidir. Şəxslər özü bu addımı atmırsa, ictimaiyyət bunu tələb etməlidir. İctimaiyyət davamlı şəkildə tələb etməlidir ki, aidiyyəti şəxslər cəzalandırılsın. Şəhər təsərrüfatına aidiyyəti olan qurumların vəzifəli şəxsləri məlum hadisəyə görə ciddi şəkildə cəzalandırılmalıdır. Çünki cəzasızlıq mühiti bu tip faciələrin sayının artmasına səbəb olur”.
Həmsöhbətimiz onu da əlavə etdi ki, Bakı şəhəri hazırda xaotik bir bazara çevrilir. Kimin kefi nə istəyib, boş yer görən kimi orda tikib. Hazırda Bakı şəhər sifətindən çıxıb, şəhərə aid heç bir sistem qalmayıb: “Nəqliyyatın hərəkəti bərbad vəziyyətdədir, yüngül yağış zamanı ağır faciələr müşahidə olunur. Təsəvvür edin, Bakıya 1-2 gün ərzində qar yağsa, hər yer buz olar, o zaman paytaxt sıradan çıxacaq, şəhər tam olaraq məhv olacaq. Hələ mən 4-5 ballıq zəlzələ kimi təbii fəlakətləri demirəm. Bakı elə bir vəziyyətə gətirilib ki, şəhər hazırda boğulur. Boş yerlərin göydələnlər üçün satılması, layihələrin icrasının başdansovdu edilməsi, şəhərsalma, kommunal, drenaj sistemlərinin adekvat qurulmaması vəziyyəti bu həddə çatdırıb. Bir neçə gün öncə yağan yağışa görə Bakının bərbad hala düşməsində tək bu gün vəzifədə olanlar deyil, əvvəlki aidiyyəti rəhbərlər də məsuliyyət daşıyır. Bu prosesdə bir-iki yox, çoxlu sayda məsul şəxs cəzalandırılmalıdır. Bir-iki adamın günahı yoxdur, yüzə yaxın şəxs bəlkə də çox məsuliyyət daşıyır. Əminliklə deyirəm ki, yenə də günahı olan şəxslər cəzalandırılmayacaq. Sadəcə, ictimaiyyət bu məsələni davamlə şəkildə gündəmdə saxlayıb, hökumət qarşısında tələb qoymalıdır ki, günahı olanlar ciddi şəkildə cəzalandırılsın. Cəzalandırılma olmazsa bundan da pis hadisələrin şahidi olacağıq”.
Əkrəm Həsənov: “Yaranmış vəziyyətə görə bir çox dövlət qurumu özünə aid olan məsələlərə görə məsuliyyət daşıyır”
Hüquqşünas Əkrəm Həsənov “Bakı-Xəbər”ə şərhində bildirdi ki, yağış yağan günü Bakı yollarında sözügedən problemlərin yaranması tikinti zamanı yol verilən nöqsanlarla bağlıdır: “Yaranmış vəziyyətə görə bir çox dövlət qurumu özünə aid olan məsələlərə görə məsuliyyət daşıyır. Amma əsas məsuliyyət Bakı Şəhər İcra Hakimiyyətinin, onun tabeliyində olan qurumların üzərinə düşür. Bakı Şəhər İcra Hakimiyyətinin məsuliyyəti daha böyükdür. Çünki tikintilərlə bağlı ilkin razılıq şəhər icra hakimiyyətindən verilir. Razılıq vermək nə deməkdir? Razılıq o deməkdir ki, icra hakimiyyəti layihəni digər dövlət təşkilatları ilə hərtərəfli araşdırıb, o cümlədən təhlükəsizlik məsələlərini, risqləri öyrənib və müəyyənləşdirib ki, tikinti layihəsi şəhərsalma norma və qaydalarına uyğundur. Şəhər rəhbəri də etiraf etdi ki, tikinti zamanı hansısa nöqsanlar olub. Ola bilsin, tikinti normalarına əməl edilməyib”.
Fərhad Eyyubov: “Şəhərdə yağış suları ümumi kanalizasiya sistemindən ayrı olmalıdır, paytaxtımızda isə bu məsələ öz həllini tapmayıb”
Nəqliyyat məsələləri üzrə ekspert Fərhad Eyyubovun sözlərinə görə, yolların kənarında suburaxıcı və suqəbuledici xüsusiyyətə malik traplar mövcuddur. Həmin traplar isə çox vaxt işləmir: “Şəhərdə yağış suları ümumi kanalizasiya sistemindən ayrı olmalıdır. Paytaxtımızda isə bu məsələ öz həllini tapmayıb. Yəni yağış suları ümumi kanalizasiya sisteminə axır. Beləliklə də yağıntının miqdarı nisbətən çox olan kimi şəhərin bir çox istiqamətində gölməçələr yaranır. Bakının Baş Planında bu məsələ də öz əksini tapıb. Lakin bu problemin necə həll olunacağı isə bilinmir. Nəqliyyat elə bir sistemdir ki, hər gün dəyişir. Yəni çox dinamik sahədir. Bu sahəyə xüsusi dövlət nəzarəti gücləndirilməlidir. Ümid edək ki, yaxın gələcəkdə bu problemin həllində ciddi addımlar atılacaq".
Günel CƏLİLOVA
