Bağça müəllimlərinin diaqnostik qiymətləndirilməsi başladı - rəylər müxtəlifdir...
Elçin Əfəndi: "Bağça təhsilinin inkişafını istəyiriksə, bu addım müsbət qiymətləndirilməlidir"
19-20 oktyabr tarixlərini əhatə edən məktəbəqədər təhsil müəssisələrində pedaqoji fəaliyyətlə məşğul olan təhsilverənlərin diaqnostik qiymətləndirilməsi yekunlaşıb.
Cari ildə ilk dəfə təşkil olunan məktəbəqədər təhsil müəssisələrində fəaliyyət göstərən təhsilverənlərin diaqnostik qiymətləndirilməsinin məqsədi pedaqoji heyətin təlim ehtiyaclarını müəyyən edərək sertifikatlaşdırma prosesinə hazırlığı təmin etməkdir.
Məktəbəqədər və Ümumi Təhsil üzrə Dövlət Agentliyinin Məktəbəqədər təhsilin təşkili şöbəsinin müdiri İlahə Rəsulova jurnalistlərə açıqlamasında deyib ki, məktəbəqədər təhsil müəssisələrində pedaqoji heyətin peşəkarlığının artırılması tədrisin keyfiyyətinə təsir edən əsas amillərdən biridir: "Diaqnostik qiymətləndirmənin əsas məqsədi sertifikatlaşdırmaya hazırlıq və tərbiyəçi-müəllimlərin təlim ehtiyaclarını müəyyən etməkdir. Burada heç bir inzibati tədbirdən söhbət getmir"
Maraqlıdır, diaqnostik qiymətləndirilmə bağçalardakı mənfi hallara necə təsir edəcək?
"Pedaqoji fəaliyyətlə məşğul olan tərbiyəçi-müəllim və metodistlərin peşəkarlığı çoxdan yoxlanılmalı idi"
Təhsil eksperti Elçin Əfəndi "Bakı - Xəbər"ə açıqlamasında qeyd etdi ki, bağçalar yaxın bir neçə ilə qədər yerli icra hakimiyyətinin tabeliyində idi. 2022-ci ilin əvvəlindən dövlət başçısının müvafiq sərəncamı əsasında bu səlahiyyət Elm və Təhsil Nazirliyinə verildi: "Pedaqoji fəaliyyətlə məşğul olan tərbiyəçi-müəllim və metodistlərin peşəkarlığı çoxdan yoxlanılmalı idi. Çünki bağçalara bəzi şəxsləri fərqli üsullarla qəbul ediblər. Yəni burada həm korrupsiya, həm də tanışlıq halları vardı. Təbii ki, dioqnastik qiymətləndirmədən sonra bu sahədə kifayət qədər ixtisarlar olacaq. Nəticədə yeni iş yerləri açılacaq və bura konkret ixtisas sahibləri cəlb olunacaq. Bu isə məktəbəqədər təhsil yönündə bir neçə müddətdən sonra şəffaf sistemin formalaşacağı anlamını verir. Həmçinin, bağçada ixtisasını peşəkarcasına bilən müəllimlərin olması uşaqların bilik və bacarıqlarının formalaşmasında mühüm əhəmiyyətə malikdir".
Ekspert hesab edir ki, bu prossesdən sonra sertifikasiya imtahanları da keçirilə bilər. Bağça təhsilinin inkişafını istəyiriksə, bu addım müsbət qiymətləndirilməlidir: "Azərbaycanda da bu amil əsas götürülməlidir. Bilik-bacarıqları müasir təhsil yanaşmasına uyğun gəlməyən şəxslər prosesdən uzaqlaşdırılacaq. Ümid edirəm ki, bağça müəllimlərinə də güzəşt olunacaq".
Günel CƏLİLOVA
