Qəhrəmanlıq simvolu - FOTO
44 gündə Azərbaycanın yeni, şanlı tarixini yazan qeyrətli oğullardan söz düşəndə şəhid mayor Kamran Fərəcovun adı qürurla, böyük iftixarla çəkilir. Bütöv bir xalqın qəhrəmanlıq simvoluna dönən bu, Vətən sevdalısı Astara rayonu, Səncərədi kəndində boya-başa çatıb. Özündən artıq sevdiyi doğma Vətənin müqəddəsliyinə tapınan igid 42 yaşında canını ona fəda edib.
Vətən torpaqlarının 20 faizi yağı tapdağında olan Kamran Fərəcov orta məktəbi bitirib ömrünü hərbiyə bağlayıb. Belə ki, 1995-ci ildə Bakı Ali Birləşmiş Komandanlıq məktəbinin Taktiki Tank Qoşunları komandiri fakültəsinə daxil olub. Burada 4 il müddətində mükəmməl hərbi sirlərinə yiyələnib. Sonra yağıdan qisas almaq məqsədilə cəbhə bölgəsinə yollanıb, leytenant rütbəsində Ağdamda, Gəncədə, Goranboyda doğma Vətənini göz-bəbəyi kimi qoruyub və məqamı gələndə döyüş meydanında erməni dığalarına gücünü göstərməyə hər an hazır olub.
Savadlı, peşəkar, cəsur zabit mayor rütbəsinə layiq görülüb. Səhhəti ilə bağlı o, ehtiyata buraxılıb. Qaldı ki, erməni dığalardan alacağı öcə görə yenidən orduya gedib. 2020-ci ilin sentyabrın 20-də könüllü təlimlərə qatılıb, məqsədinə çatmaq üçün şəxsi heyəti döyüşə hazırlayıb. Vətən müharibəsi başlanan ilk gündən yerini odlu-alovlu səngərdə alıb. Cəbrayılda, Qubadlıda düşmənə qan qusdurub. Neçə-neçə savaşın qəhrəmanı olan igid komandir oktyabrın 21-də düşmən gülləsinə tuş gəlib, Vətən eşqli ürəyi əbədi dayanıb.
Şərəfli ölümü ilə milyonların qəlbində abidə ucaldan, mənən diri qalaraq əbədi yaşamaq hüququnu qazanan şəhid mayor “Vətən uğrunda”, “İgidliyə görə” və digər medallarla təltif olunub. Hazırda qoyub getdiyi halal ailə ocağında 2 əkiz qızı- Dəniz və Şəms ataların adına şərəf olmaq üçün dərslərini “əla” oxuyur, vətənpərvərlik ruhunda boy atırlar.
Hər cür sevgi və məhəbbətə layiq olan şəhid mayor Kamran Fərəcov astaralıların qəlbində yaşamaqla həmişə böyük ehtiramla anılır. Qəhrəmanın şəhadətə qovuşmağı dördüncü ilində məzarının başına yenə də çoxlu adam toplanmışdı ...
Onu da bildirim ki, şəhid mayorun ömür-gün yoldaşı Nurana müəllim Astara Pedaqoji Kollecində çalışır. Kollecin direktoru, şəhid atası Kamran Kazımov və əməkdaşları şəhidin uyuduğu müqəddəs yeri ziyarət etdilər, önünə əkil qoyub, tər güllər düzdülər. Söhbət zamanı kollecin direktoru dedi:- Zəfər şəhidimiz Kamran Fərəcov Vətənini, xalqını çox sevirdi. Elə onu vətənpərvərliyin ən ali məqamına- şəhidlik zirvəsinə ucaldan bu ilahi sevgi olub. İndi Kamran hər bir Azərbaycan vətəndaşı üçün doğma və əzizdir. Qərinələr boyunca belə olacaq, həmçinin ölməzliyə qovuşan qəhrəmanın həyat yolu gələn nəsillərə də örnək göstəriləcək...
Zəfər ORUCOĞLU,
Azərbaycan Jurnalistlər Birliyinin üzvü
