Gürcüstanda cəmiyyət seçkiöncəsi qaynayır - AB ocağa benzin atdı...
Elşad Həsənov: “Ümumən, Qərbin təzyiqlərinin seçkilərə ciddi təsir göstərəcəyi real görünmür”
Oktyabrın 26-da Gürcüstanda keçiriləcək parlament seçkisi tək gürcü xalqı və dövlətçiliyi üçün deyil, bütöv region kontekstində əlahiddə əhəmiyyətə malikdir. Seçki kampaniyası və ümumiyyətlə seçkilərə gedən yol kollektiv Qərbin Tbilisinin müstəqil dövlətçilik təşəbbüslərinə qarşı görünməmiş total təzyiqi şəraitində keçir.
Vaşinqtonda və Brüsseldə Gürcüstan hökumətinin tarazlaşdırma və güc mərkəzlərindən bərabər şəkildə məsafə saxlama siyasətini "Rusiyaya meyllilik" kimi qiymətləndirirlər.
Bu narrativin ilkin işartıları özünü Rusiya-Ukrayna müharibəsi başlayan gündən büruzə verilir. Nədənsə, Qərbdə hesab edirlər ki, rəsmi Tbilisi, gürcü xalqı ayaq altında qalsa belə, Rusiyaya qarşı ikinci cəbhəni açmalıdır. Halbuki, Kiyevlə Moskva arasındakı ziddiyyətlərin gürcü xalqına böyük ölçüdə heç bir dəxli yoxdur. Qərb görəndə ki, Gürcüstan ölkə maraqlarından çıxış edərək müstəqil siyasət yeridir, Tbilisiyə təzyiqləri artırmağa başladı. Avropa İttifaqı Gürcüstana maliyyə yardımlarını dayandırdı, bir sıra proqramları dondurdu. Gürcüstanın Aİ-yə üzvlüyü faktiki olaraq dayandırılıb. Görünən odur ki, Qərb tərəfindən Tbilisiyə təzyiqlər davam edir. Ümumilikdə, belə bir vəziyyət 26 oktyabrda Gürcüstan cəmiyyətinin əhval-ruhiyyəsinə və seçki fəallığına necə təsir edəcək?
“... həm hakimiyyətə ictimai dəstək böyükdür, həm də gürcü müxalifəti parçalanmış vəziyyətdədir”
Sözügedən məsələyə aydınlıq gətirən siyasi ekspert Elşad Həsənov “Bakı-Xəbər”ə açıqlamasında bununla bağlı bir sıra məqamlara toxundu: “Seçkilər yaxınlaşdıqca Qərbin Gürcüstana təzyiqləri artır. Bu təzyiqlər may ayından başlayaraq intensivləşməyə başladı. Belə ki, bu ilin mayında Gürcüstan parlamenti “Xarici təsir” haqqında qanun layihəsini üçüncü və yekun oxunuşda qəbul etdi. Məhz bundan sonra ABŞ-ın, Fransanın, Almaniyanın Gürcüstana ayırdığı yardımlar dayandırıldı. Daha sonra LGBT-lərin ölkədə fəaliyyəti qanunla dayandırıldı və bəyan edildi ki, bu, gürcü mentalitetinə uyğun deyil. Söhbət ondan gedir ki, eynicinslilərin nikahının rəsmiləşdirilməsi ailə institutunu dağıdır. Ona görə də ailə institutunu dağıtmağa yönələn bu qanun Gürcüstanda qəbul olunmadı. Bütün bunlar Qərbin xoşuna gəlmədiyi üçün Gürcüstana edilən bütün yardımlar donduruldu. Bunun əvəzinə həmin vəsaitləri müxalifətə yönəltdilər ki, indiki hakimiyyəti devirsinlər. Məqsəd odur ki, Gürcüstanda Qərbə yaxın hakimiyyət qurulsun. O da məlumdur ki, Gürcüstan uğrunda mübarizədə qlobal güclər üz-üzədir. Söhbət ABŞ, Aİ və Rusiya arasında gedən mübarizədən gedir. Bu arada Rusiya Gürcüstanla bağlı viza rejimini ləğv etdi. Hətta belə məlumatlar var ki, seçkilərdən sonra Rusiya Cənubi Osetiya ilə Abxaziyanı Gürcüstana qaytaracaq. Gürcüstanda yaşayan azərbaycanlıların hazırkı dövrdə böyük əksəriyyəti hakimiyyəti dəstəkləyir. Bunun da müxtəlif səbəbləri var. Çünki indiki hakimiyyət bir çox məsələlərdə Azərbaycan hökuməti ilə birlikdə böyük layihələr həyata keçirir. Azərbaycan azərbaycanlıların kompakt yaşadığı bölgələrdə 80 milyon dollardan artıq vəsait xərcləyib. Bu vəsait hesabına sosial layihələr həyata keçirilib, kəndlər qazlaşdırılıb, yollar çəkilib, bağçalar tikilib və s. Saakaşvili dövründən fərqli olaraq, “Gürcü Arzusu” hakimiyyətə gələndən sonra azərbaycanlıların kompakt yaşadığı bölgələrdə kiçik sahibkarlar incidilmir. Azərbaycan dini icmasına da dövlət yardım edir. Halbuki, əvvəlki hakimiyyət dövründə bu yox idi. Ümumən, Qərbin təzyiqlərinin seçkilərə ciddi təsir göstərəcəyi real görünmür. Çünki həm hakimiyyətə ictimai dəstək böyükdür, həm də gürcü müxalifəti parçalanmış vəziyyətdədir. Ancaq gürcü soyadlı erməni əsilli şəxslər istəyir ki, müxalifət qalib gəlsin”.
Vidadi ORDAHALLI
