Avropa İttifaqının Ermənistandakı “missiyası” sülh üçün ciddi maneədir
Mətləb Salahov: “Bu siyasi təşkilat bölgədə qan tökülməsinə çalışan hərbi təxribat qurumuna çevrilib”
44 günlük zəfər müharibəsi artıq dörd ildən çoxdur ki başa çatsa da Azərbaycan və Ermənistan arasındakı sülh sazişindən xəbər-ətər yoxdur. Başda ABŞ, şəxsən Fransa prezidenti Emmanuel Makron və Avropa İttifaqı olmaqla bir sıra Qərb dairələri iki Cənubi Qafqaz ölkəsi arasında inteqrasiya və sülh müqaviləsinin bağlanmasına qarşı açıq-aşkar təxribatlar törədirlər. İkinci Qarabağ müharibəsindən sonra Aİ açıq şəkildə Ermənistanı silahlandırmaq üçün milyon dollarlar ayırır, İrəvana “mülki missiya” adı altında hərbi mütəxəssis heyəti göndərərək, Azərbaycanla sərhəd bölgədə hərbi kazarmaya qədər formalaşdırır. Bəs Aİ-nın bu addımlarının arxasındakı əsas məqsəd və gələcək nəticə nə ola bilər?
Jurnalist-ekspert Mətləb Salahov “baki-xeber.com”-a açıqlamasında bildirib ki, ümumiyyətlə Aİ-dakı məmurlar zaman-zaman Azərbaycana qarşı mənfi münasibəti ilə seçiliblər. “Təsəvvür edin ki, otuz il ərzində bu təşkilat torpaqlarımızı işğal altında saxlayan Ermənistana qarşı heç bir sanksiya tətbiq etmədiyi, yüz minlərlə qaçqın və köçkün azərbaycanlıya hər hansı dəstək mesajı göndərmədiyi, onların problemləri ilə məşğul olmadığı halda, məhz indi Azərbaycana qarşı düşmən mövqeyinə keçib. Çünki bu münasibət məhz 44 günlük müharibədə Azərbaycan öz torpaqlarını azad edəndən, ərazi bütövlüyünü və suverenliyini, sərhədlərini tam şəkildə bərpa edəndən sonra baş qaldırıb. Bəs Nikol Paşinyanın Ermənistanda yaratdığı xunta rejimi necə, AŞPA-dakıların gözünə girmir ki? Yoxsa siyasi diletant N.Paşinyanın Ermənistandakı hüquq və azadlıqları bir kənara qoyub zaman-zaman öz əli ilə imzaladığı kütləvi həbslər AŞPA-dakıların vecinə deyil? Əlbəttə, veclərinə deyil. Çünki onları Azərbaycana bu situasiyada necə dəhşətli zərbə endirmək, Ermənistanın hazırkı məğlub imicini dəyişdirib bölgədə yeni qanlı planlar reallaşdırmaq maraqlandırır. Onları demokratiya, insan hüquqları kimi mənasız terminlər heç zaman maraqlandırmayıb da. Onlar üçün maraqlar öndə gəlir, hüquq və demokratiya terminləri bu maraqlar üçün şantaj vasitəsidir.
“Bölgədə inteqrasiya və dinc əməkdaşlıq onların planlarına daxil deyil”
Əslində onlar bu iki termini dünyanın hər yerində siyasi alver üçün də istifadə edirlər. Bu gün Ermənistandakı Aİ-nın “mülki missiyası” açıq şəkildə hərbi təxribat fəaliyyəti ilə məşğuldur. Ortada olan real fakt odur ki, Qərb Aİ vasitəsilə bölgədə hər vəchlə sabitliyə, əmin-amanlığa qarşı çıxır. "Missiya oyunu"nu da bu planın tərkib hissəsidir. Belə görünür ki, bölgəni həqiqətən də, Ukraynaya, Suriyaya çevirmək planı işə salınacaq. Xaos, bölgədə mövqe dəyişikliyi yaratmaq, daha çox Qərbin maraqlarına uyğun siyasi və hərbi situasiya yaratmaq – məqsəd budur. Var gücləri ilə gündəmin əsas məsələsi olan Sülh Sazişini arxa plana keçirmək üçün çalışırlar. Ermənistana “humanitar yardım” adı altında ayrılan yüz milyon dollarlar da bu məqəsədə xidmət edir. Diqqət edin, ABŞ könüllü olaraq, öz istəkləri ilə Qarabağı tərk edərək İrəvana köçən erməniləri bəhanə edərək “humanitar yardım” adı ilə Ermənistan yüz milyon dollarlar ayırır. Əlbəttdə İrəvan küçələrində ac-yalavac gəzən ermənilərin bu yardımdan bircə sent belə yararlandıqları mümkün deyil. Heç ABŞ-dakıların da vecinə deyil ac-yalavac erməni əhalisi. Məqsəd Cənubi Qafqazda Ermənistan vasitəsi ilə bufer zona yaratmaq, Azərbaycan və Türkiyənin bölgədəki ağırlığına qarşı planlar həyata keçirmək, xüsusilə Rusiyanı bölgədən tamamilə sıxışdırıb atmaqdır. Amma Gümrüdəki Rusiya hərbi qüvvələri göz dağı kimi Qərbdəkilərə boylanıb durur. Məhz bu amilə görə qərbdəkilər indi əsas diqqəti bu həftə sonu Gürcüstanda keçiriləcək parlament seçkilərinə yönəldiblər. Görünən odur ki, Qərb strukturları nəyin bahasına olursa olsun, Cənubi Qafqazda məqsədlərinə çatmaq üçün bölgə ölkələri arasında səmərəli əməkdaşlığa qarşı xaos və müharibə planında israrlıdırlar.”
Namiq Quliyev
