Bəs Prezident demədi ki, ağacdan işıq dirəkləri olmaz? - Lerik və Yardımlıda hələ də...
İlqar Hüseynli: “Bu, həlli asan mümkün olan bir məsələdir”
Bir neçə il əvvəl Prezident İlham Əliyev şimal-qərb rayonlarına səfər edərkən hələ də rayonlarda ağacdan işıq dirəklərinin olmasına irad bildirdi. Ancaq bu irada rəğmən, ötən müddət ərzində bu problem həll edilməyib. Bir sıra rayonlarda, o cümlədən Lerik və Yardımlının bir sıra kəndlərində indinin özündə də işıq dirəkləri əvvəlki dövrlərdə qurulan ağac dirəklərdən ibarətdir.
Ağacdan olan işıq dirəklərinin çoxu istismar müddətini başa vurub. Bir balaca küləkli və yaxud da yağışlı hava olan kimi, elektrik verilişi kəsilir. Xüsusən də payız-qış mövsümündə sözügedən məsələ ilə bağlı problemlər özünü daha çox göstərir. Halbuki, hər il büdcədən ölkənin elektrik xətlərinin yenilənməsi, təmir və bərpası üçün milyonlar ayrılır. Belə olan halda nə çətin işdir həmin dirəkləri beton və yaxud da dəmir dirəklərlə əvəz etmək?
“Sadəcə, məmurların öz işinə məsuliyyətlə yanaşmaması amili mövcuddur”
Sözügedən məsələ ilə bağlı fikirlərini “Bakı-Xəbər”lə bölüşən ekspert İlqar Hüseynli hesab edir ki, əslində bu problemi həll etmək elə də çətin deyil: “Neçə illərdir bu, ciddi bir problem olaraq qalır. Halbuki, köhnədən qalma ağac dirəkləri qısa bir müddətdə yeniləri ilə əvəz etmək olar. Yəni bu, həlli asan mümkün olan bir məsələdir. Sadəcə, məmurların öz işinə məsuliyyətlə yanaşmaması amili mövcuddur. Məsələ ondadır ki, hər bir məmur üzərinə düşən işi yerinə yetirməlidir. “Azerenerji” ASC-nin bununla bağlı kifayət qədər imkanları var. Elektrik enerjisi ixracı imkanları genişdir və bununla bağlı kifayət qədər qazanır. Əldə edilən vəsaitin kiçik bir hissəsini bu sahəyə yönəltməklə ağacdan olan elektrik dirəklərinin birdəfəlik ləğvi mümkündür. Onları tez bir zamanda beton dirəklərlə əvəz etmək mümkündür və bunu həyata keçirmək üçün pul var. Ona görə də bu, təcili yerinə yetirilməlidir. Bilavasitə bu, indiyə qədər cəmiyyətdə məmur özbaşımalığın və prezident tərəfindən verilən sərəncamların, tapşırıqların yerinə yetirilməməsinin bir göstəricisidir. O baxımdan hesab edirəm ki, bu barədə təcili Prezident Adminstrasiyası və digər müvafiq qurumlar öz mövqeyini ortaya qoymalıdır. Bir sözlə, bu özbaşınalıqlar yığışdırılmalıdır. Çünki həm də belə problemlər üzündən kəndlərdən şəhərə axın dayanmaq bilmir. Normal elektrik təchizatının olmanası üzündən gənclər kənddə qalmaq istəmir. 21-ci əsrdə Azərbaycan kimi iqtisadi imkanları böyük olan ölkədə hələ də ağacdan elektrik dirəklərinin olması gülünc haldır”.
Vidadi ORDAHALLI
