İsrailli nazirin azı 7 dövlətə qarşı açıq ərazi iddiası qulaqardına vurulur...
Abutalıb Səmədov: "Ümid edirəm ki, yaxın vaxtlarda o cür bəyanat verən nazirin hökumətin tərkibindən çıxarılması barədə məlumatı da oxumaq imkanımız olacaq"
İsrailin maliyyə naziri Bezalel Smotriç bir sənədli filmdə “Vəd edilmiş torpaq”larda yəhudi dövlətini qurmaq niyyətində olduqlarını açıq şəkildə bəyan edib.
Smotriç paylaşdığı sənədli filmdə bir yəhudi dövləti istədiyini və bu dövlətin yəhudi xalqının dəyərlərinə uyğun hərəkət edəcək bir dövlət olacağını bildirib. İsrailin sərhədlərinin dənizdən başlayıb çayda bitdiyini qeyd edən nazir gələcəkdə Qüdsün Şama qədər genişlənəcəyini iddia edib. Nazir İsrailin Yaxın Şərqə hücumlarının səbəbini bu cür ifadə edib: "Mən çox açıq şəkildə deyirəm ki, biz İordaniya, Səudiyyə Ərəbistanı, Misir, İraq, Suriya və Livanın daxil olduğu bir yəhudi dövləti istəyirik".
İsrailli nazirin bu mövqeyi İsrail dövlətinin gizli məqsədlərindən xəbər verirmi? Bir sənədli filmdə Təl-Əvivin məqsədlərini belə ifadə etmək nə qədər doğrudur? İsrailin indiki davranışları ilə nazirin fikirləri ilk baxışdan üst-üstə düşürmü?
Məsələni bizim üçün şərh edən siyasətçi Abutalıb Səmədov bildirdi ki, keçmiş Fələstin ərazisində iki dövlətin yaranması haqda BMT-nin qərarı var. Dünyanın əksər dövlətləri bu qərarı dəstəkləyir. Fikrimcə, İsrail dövləti də, Fələstin dövləti də BMT-nin müəyyən etdiyi ərazilərdə yaradılmalı və mövcud olmalıdır. Baxmayaraq ki, İsrail həmin ərazilərdən xeyli kənara çıxıb.
Bir neçə ərəb dövlətinin ərazisinə iddia edilməsi İsrail dövlətinin mövqeyi deyil. Baxmayaraq ki, bu mövqeyi İsrailin naziri səsləndirib. Hesab edirəm ki, onun bu bəyanatı İsrail hökuməti tərəfindən də çox ciddi narazılıqla qarşılanacaq. Çünki adıçəkilən dövlətlərin içərisində kifayət qədər ad-sanı, nüfuzu olan dövlətlər də var. Bir nazirin digər dövlətlərin ərazisinə iddia etməsi, onların ərazi bütövlüyünü pozan bəyanat verməsi və öz işğalçılıq niyyətini dilə gətirməsi qəbuledilməzdir. Bu planı reallaşdırmaq qeyri-mümkündür.
İndiyə qədər İsrail dövləti nail olduğu uğurların çoxunu ağıllı siyasəti ilə qazanıb. Bu cür işğalçılıq niyyətlərini ortaya qoyan bəyanatların verilməsi İsrailin dünyadakı nüfuzuna çox böyük zərbə vura bilər. Hərcənd ki, son əməliyyatlarda dinc insanların öldürülməsi onsuz da İsrailin nüfuzuna kifayət qədər xələl gətirib. Ancaq bu cür bəyanat vermək, BMT-nin üzvu olan bir sıra dövlətlərin ərazisinə iddia etmək - bu təbiidir ki, İsrail üçün çox ciddi problemlər yarada bilər. Mən hesab edirəm ki, bu cür bəyanat verən nazirin haqqında ciddi tədbirlər görülməlidir.
Məlumdur ki, ABŞ-nin ciddi yardımı olmadan İsrail müsəlman dünyasına qarşı dayana bilməz. İrana son hücumları zamanı bir daha aydın oldu ki, ABŞ İsraili necə müdafiə edir. İki il yarım müddətdə Ukraynaya dördüncü nəsil F-16 təyyarələrini vermək istəməyən, yalnız yaxın aylarda bir neçə F-16-nı Kiyevə verən ABŞ və onun müttəfiqləri, İranla İsrail arasında müəyyən problem yaranan kimi, Təl-Əvivə dərhal beşinci nəsil F-35-ləri təqdim etdilər. Təyyarədaşıyan gəmilər vasitəsilə F-35-lər bölgəyə yerləşdirildi və İranın sonuncu raket hücumunun qarşısının alınmasında İsrailin hava hücümündan müdafiə sistemləri ilə yanaşı Amerika da yaxından iştirak etdi.
ABŞ İsrailin bu cür işğalçılıq planlarını dəstəkləyərmi? Güman edirəm ki, qəti şəkildə dəstəkləməz və bu cür plana qarşı kəskin mövqe ortaya qoyar. Çünki bu yalnız bölgədə çox ciddi münaqisə ocağının yaranmasına gətirib çixarmaz, eyni zamanda Amerikanın dünyadakı nüfuzuna çox ciddi zərbə olar. ABŞ-nin müdafiə etmədiyi İsrail, adıçəkilən ərəb dövlətləri və onların müttəfiqləri olan İslam dünyası ilə qarşi-qarşıya gəlib onlarla müharibə edə bilməz. İsrailin buna gücü çatmaz.
Mən inanmıram ki, İsrail hökumətinin belə bir planı olsun. Kimlərsə ola bilsin ki, bunu arzulayır, düşünür, kimlərinsə belə bir istəyi var. Hətta bu cür adamlar hökumətin də tərkibində təmsil oluna bilər. Amma bunu belə açiq şəkildə bəyan etmək və öz işğalçılıq niyyətini ortaya qoymaq heç bir dövlətə xeyir gətirməz. Hətta bu, İsrail olsa da belə...
Nə qədər ABŞ-nin yardımına ümid etsə də, yəhudi lobbisinin gücünü arxasına alsa da, İsrailin bu planları yerinə yetirməyə gücü çatmaz. Ümid edirəm ki, yaxın vaxtlarda o cür bəyanat verən nazirin hökumətin tərkibindən çıxarılması barədə məlumatı da oxumaq imkanımız olacaq".
Dəniz NƏSİRLİ
