Ermənistan prezidenti Orta Asiya türk dövlətlərində nə axtarır - Türkmənistan, ardınca Qazaxıstan...
Elşad Həsənov: “İrəvan bu ölkələrin Azərbaycanla qurduğu yaxın əlaqələrdən narahatdır”
Ermənistan Respublikasının Prezidenti Vaaqn Xaçaturyan Qazaxıstan Prezidenti Kasım-Jomart Tokayevin dəvəti ilə oktyabrın 15-də Qazaxıstana rəsmi səfərə gedəcək. Bu barədə Ermənistan prezidentinin dəftərxanası məlumat yayıb.
Qazaxıstan prezidenti Akordanın iqamətgahında iki ölkə prezidentləri danışıqlar aparacaq və Ermənistan-Qazaxıstan əməkdaşlığının inkişafı ilə bağlı gündəliyə aid məsələləri müzakirə edəcəklər.
Maraqlıdır, bu erməni prezident Mərkəzi Asiyada nə axtarır? V.Xaçaturyan sentyabrın 8-də Türkmənistanda işgüzar səfərdə olub. İndi də Qazaxıstana səfər etməyi planlaşdırır. Bunlar türk dövlətlərindən nə istəyirlər? Nədir bunlardakı bu maraq?
“Ermənistan bununla çalışır ki, Orta Asiya ölkələri ilə əlaqələri keyfiyyətcə yeni müstəviyə keçirsin”
Sözügedən məsələni “Bakı-Xəbər”ə şərh edən siyasi ekspert Elşad Həsənov erməni prezidentin Orta Asiyada canfəşanlığını bir sıra amillərlə əlaqələndirdi: “Əsas məqsəd Ermənistanın maraqlarını bu ölkələrdə təmin etməkdir. Bu il Qazaxıstan prezidenti Tokayev Ermənistanda rəsmi səfərdə olub. Qazaxıstanın da Ermənistanda öz maraqları var. Nəzərə almaq lazımdır ki, keçmiş SSRİ ölkələri bu və ya digər dərəcədə bir-birləri ilə bağladılar. Bu da əsasən iqtisadi məsələlərlə bağlıdır. Ermənistan bununla çalışır ki, Orta Asiya ölkələri ilə əlaqələri keyfiyyətcə yeni müstəviyə keçirsin. Baxmayaraq ki, Ermənistan Orta Asiya ölkələri ilə iqtisadi və hərbi bloklarda təmsil olunur. Söhbət Avrasiya İqtisadi İttifaqı və Kollektiv Təhlükəsizlik Müqaviləsi Təşkilatından (KTMT) gedir. İrəvan bu ölkələrin Azərbaycanla qurduğu yaxın əlaqələrdən narahatdır. Ən başlıcası isə, İrəvan Orta Asiya üzərindən gələn tranzit yüklərin İran vasitəsilə Ermənistana və ordan Gürcüstana ötürülməsində maraqlıdır. Zəngəzur dəhlizinə razılıq vermək əvəzinə, Ermənistan bu yolla tranzit ölkə olmaq istəyir. Ermənilər fərqindədilər ki, böyük dövlətlərin Orta Asiyaya marağı getdikcə artır. Ona görə də bundan öz mənafeləri üçün maksimum istifadə etməyə çalışırlar. Digər məqsəd ondan ibarətdir ki, Orta Asiya ölkələri alayarımçıq sülh müqaviləsi ilə bağlı Azərbaycana təsir etsinlər. Çünki Ermənistanın məqsədi odur ki, COP-29-a qədər Azərbaycanla yarımçıq sülh sazişi imzalansın. Bir sözlə, erməni prezidentin Orta Asiya turnesinin arxasında bir neçə məqsəd gizlənir”.
Vidadi ORDAHALLI
