Prezident Azərbaycanın iqtisadi modeli barədə bu fikri nəyin əsasında söylədi?..
Kamran Məmmədli: “Azərbaycan iqtisadiyyatı dayanıqlı iqtisadi inkişaf tempini qoruyur”
“Artıq Azərbaycanın iqtisadi inkişaf modeli dünyada özünü təsdiqləyib”. Bunu Prezident İlham Əliyev iqtisadi məsələlərə həsr olunmuş müşavirədə çıxışında deyib.
O bildirib ki, biz öz resurslarımıza arxalanaraq güclü iqtisadiyyat qurmuşuq, müstəqil iqtisadiyyat qurmuşuq, heç kimdən asılı deyilik: “İqtisadi müstəqillik təbii olaraq bizə beynəlxalq müstəvidə böyük imkanlar qazandırır ki, Azərbaycan uğurla, inamla, şərəflə, ləyaqətlə müstəqil xarici siyasət apara bilsin. Necə ki, aparmışıq və aparacağıq”.
“Azərbaycanda qeyri-neft sektorunun inkişaf etdirilməsi və neft-qaz sektorunda yeni layihələrin reallaşdırılması dayanıqlı iqtisadi inkişaf modelini təkmilləşdirməyə imkan verir”
Azərbaycanın iqtisadi inkişaf modeli barədə fikir bildirən iqtisadçı ekspert Kamran Məmmədli “Bakı-Xəbər”ə şərhində bildirdi ki, Azərbaycanda qeyri-neft sektorunun inkişaf etdirilməsi və neft-qaz sektorunda yeni layihələrin reallaşdırılması dayanıqlı iqtisadi inkişaf modelini təkmilləşdirməyə imkan verir və verəcək: “Danılmaz faktdır ki, ölkəmizin mövqeyi bölgədə getdikcə daha da artır və güclənir. Ölkəmizin bərpaolunan enerji istehsalı sahəsində təşəbbüsləri Avropa İttifaqı tərəfindən yüksək qiymətləndirilir. Həyata keçirilən mükəmməl islahatlar konsepsiyasının müəllifi Prezident İlham Əliyev müasir Azərbaycanın iqtisadi inkişaf modelini yaradıb. Bu model dövlətimizin ümumi siyasətinin ayrılmaz tərkib hissəsi olmaqla, ölkəmizin iqtisadi tərəqqisinə, dünya birliyində mövqeyinin köklü surətdə möhkəmlənməsinə, inkişaf etmiş güclü dövlətlər sırasında yer almasına zəmin yaradıb”.
Həmsöhbətimizin sözlərinə görə, Azərbaycan iqtisadiyyatı dayanaqlı iqtisadi inkişaf tempini qoruyur. Ümumi Daxili Məhsuldakı artım, digər tərəfdən qeyri-neft sektorunun iqtisadi artımı ondan xəbər verir ki, Azərbaycan iqtisadiyyatı arzuolunan hədəfə çatır. Neftdən asılılıq minimumlaşdırılır: “Onu da deyim ki, Azərbaycan xarici borcun ÜDM-dəki payına görə dünyada ən yaxşı göstəricilərə malik ölkələrdən biridir. Həmçinin, dövlətimizin iqtisadi siyasətində vətəndaşların yaşayış səviyyəsinin yüksək olması əsas meyar olaraq götürülüb”.
Günel CƏLİLOVA
