Britaniya Rusiyanın son "qaz balonlarını" da bağlayır…
Əli Orucov: "Müharibəyədək silah ixracında ikinci olan Rusiya indi Çin, Şimali Koreya və İran kimi totalitar ölkələrdən asılı qalıb"
Dunya ölkələrinin Rusiyaya sanksiyalar seriyası davam edir. Belə ki, Britaniya sentyabrın 26-da Rusiyanın təbii maye qazını daşıyan beş gəmi və onların bağlı olduqları şirkətlərə qarşı sanksiyalar elan edib.
Reuters agentliyinin məlumatına görə, Britaniya hökuməti xatırladıb ki, London bu il ABŞ və Avropa İttifaqından olan müttəfiqləri ilə birlikdə Rusiyanın “Arktik SPG 2” layihəsinə sanksiyalar qoyub. Layihə bu sanksiyalara görə hasilatı azaltmağa məcbur olub.
Britaniya hökumətinin bəyanatında deyilir ki, sentyabrın 26-da elan edilən sanksiyalar bu qərara əsaslanır və maye qaz istehsalı sahəsinin gələcəyi üçün mühüm rol oynayan əsas iştirakçıları hədəfləyir, bununla da Putini Ukraynada apardığı müharibə üçün ən mühüm gəlir mənbələrindən məhrum edir.
Bu da xəbər verilir ki, Rusiyanın "White Fox Ship Management" və "Ocean Speedstar Solutions" şirkətləri yeni sanksiyaların hədəfləri sırasındadır.
Reuters yazır ki, bir ay bundan əvvəl Britaniya Rusiyanın “kölgə donanmasına” daxil olanadək gəmiyə sanksiyalar qoymuşdu.
Qeyd edilir ki, bu tankerlər Rusiya neftinə qoyulmuş Qərb sanksiyalarından yan keçmək üçün qanunsuz metodlara əl atırlar. Moskva Qərbin Rusiyanın enerji ehtiyatları ixracatını məhdudlaşdıran tədbirlərini tənqid edir. Reuters yazır ki, ötən il Qərb operatorları tərəfindən tənzimlənməyən və ya sığortalanmayan Rusiya yük gəmilərinin sayı xeyli artıb.
Bundan sonra Rusiyada vəziyyət pisləşməyə doğru dəyişə, sanksiya Ukraynada aparılan müharibədə Kremlin əlini zəiflədə bilərmi?
Bizimlə söhbətində politoloq Əli Orucov suallarımıza cavab olaraq dedi ki, Rusiyanın Ukraynaya təcavüzündən sonra Qərbin tətbiq etdiyi sanksiyalar nəticələrini göstərməkdədir: "Xüsusən də hərbi sənaye, neft-qaz, yüksək texnologiyalar və s. kimi sahələr ciddi şəkildə böyük itkilərlə məruz qalıb. Müharibəyədək silah ixracında ikinci olan Rusiya indi Çin, Şimali Koreya və İran kimi totalitar ölkələrdən asılı qalıb.
Şimal qonşumuzun əsas gəlirlərini formalaşdıran sahələrdən biri də neft-qaz sektorudur. Rusiya dünyanın ən böyük neft-qaz ixracatçılarından biridir. Avropa Rusiyanın tədarük etdiyi mavi yanacağından asılı olub. Qərbin sanksiyaları Rusiyanın neft-qaz sahəsinə təsir etsə də, Moskva bunu alternativ yollarla kompensasiya etməyə çalışırdı. Sanksiyalardan müxtəlif üsullarla yayına bilirdi. Ancaq Böyük Britaniyanın tətbiq etdiyi yeni sanksiyalar bu qanunsuzluqların və yayınma hallarının qarşısının alınmasına kömək edə biləcək. Kremli ən çox narahat edən neft-qaz ixracına Qərbin həyata keçirəcəyi məhdudiyyətlərdi. Dünya bazarına Səudiyyə Ərəbistanından sonra ən çox neft, həmçinin təbii qaz çıxaran Rusiyaya bu mövqelərini itirmək böyük iqtisadi fəlakət deməkdir. Qərbin tədricən həmin sektoru hədəfləməsi Rusiyanın iqtisadi çöküşünə, beləliklə də Ukrayna ilə müharibəyə son verilməsinə hesablanıb. Fikrimizcə, Böyük Britaniyanın elan etdiyi yeni sanksiyalar Rusiya neftini və qazını gizli yollarla dünya bazarına çıxaran şirkətləri çəkindirəcək.
Onların da sanksiyaya məruz qalma təhlükəsi olduğundan, sövdələşmələrə son qoyacaq. Bu isə Rusiya üçün böyük itkilər yaradacaq".
Dəniz NƏSİRLİ
