Milli iqtisadiyyatımızda 4.3 faiz artım sadə dildə bu deməkdir - Prezidentin fikirlərinin davamı...
Vüqar Bayramov: “Bu o deməkdir ki, ölkə iqtisadiyyatındakı artım qeyri-neft sektoru hesabına formalaşır”
“İqtisadi artım 4,3 faiz təşkil edib”. Prezident İlham Əliyev iqtisadi məsələlərə həsr olunmuş müşavirədə çıxışında belə deyib.
Ölkə başçısı bildirib ki, ilin əvvəlindən iqtisadi inkişaf gözlənilən səviyyədədir: “İlin əvvəlində mən bu ilin iqtisadi sahədə uğurlu olub-olmaması haqqında danışanda qeyd etmişdim ki, tam əminəm, bu il iqtisadiyyatımız üçün uğurlu olacaq. İlin əvvəlindən əldə edilmiş nəticələr və iqtisadi göstəricilər mənim sözlərimi təsdiqləyir. İqtisadi artım 4,3 faiz təşkil edib. Bugünkü dünyada gedən prosesləri təhlil edərkən və ümumiyyətlə, geosiyasi vəziyyətə nəzər saldıqda deyə bilərəm ki, bu, çox müsbət göstəricidir. İqtisadi inkişaf templəri inkişaf etmiş bir çox ölkələrdə olan iqtisadi inkişaf templərini üstələyir. Xüsusi əhəmiyyət daşıyan məqam ondan ibarətdir ki, qeyri-neft sektorumuz 7 faiz artmışdır. Bu da onu göstərir ki, ölkə iqtisadiyyatının şaxələndirilməsi istiqamətində atılmış addımlar və düşünülmüş islahatlar siyasəti öz bəhrəsini verməkdədir”.
Ümumən, bu artımın iqtisadi izahını ekspertlər necə dəyərləndirir?
“Xarici borcun ÜDM-də payına görə Azərbaycan dünyada ən yaxşı mövqeyə malik olan 9 ölkədən biridir”
Sözügedən məsələni “Bakı-Xəbər”ə şərh edən millət vəkili Vüqar Bayramov bununla bağlı bir sıra məqamlara toxundu: “Məsələ ondadır ki, Azərbaycan iqtisadiyyatı 2024-cü ildə də inkişaf tempini qoruyub saxlayıb. Nəzərə almaq lazımdır ki, həm ümumi daxili məhsulda artım 4 faizədək artıb, həm də qeyri-neft sənayesində 7 faizdən çox inkişaf qeydə alınıb. Bu ondan xəbər verir ki, Azərbaycan iqtisadiyyatı dayanıqlı inkişaf mərhələsindədir. Digər tərəfdən, bu bir daha təsdiq edir ki, ölkə iqtisadiyyatındakı artım qeyri-neft sektoru hesabına formalaşmaqdadır. Praktik olaraq qeyri-neft sektoru iqtisadi inkişafın drayverinə çevrilib. Bu da, təbii, birmənalı şəkildə ondan xəbər verir ki, artıq iqtisadiyyatın diversifikasiyası ilə bağlı həyata keçirilən tədbirlər öz səmərəsini verir. Bu siyasət neftdən asılılığın minimuma endirilməsinə, enerjidənkənar sahələrin davamlı inkişafına zəmin yaradıb. 2024-cü ilin geridə qalan aylarının yekunları və eyni zamanda gözləntilər bir daha təsdiq edir ki, Azərbaycan iqtisadiyyatı dayanıqlı inkişaf baxımından regionda xüsusi iqtisadi model olaraq seçilir. Çünki nəticə etibarı ilə biz iqtisadi inkişafın dayanıqlığı və davamlılığı, eləcə də balanslılığını müşahidə edirik. Bizdə iqtisadi inkişaf inklüzivdir. Bu, eyni zamanda sosial təminat, sosial müdafiə xərclərinin artırılması siyasətinin dayanıqlığını təsdiq edir. Artıq cənab Prezident tərəfindən də sosial sferada yeni addımların atılması, sosial paketin genişləndirilməsi ilə bağlı göstərişlər var. Bu da, təbii ki, Azərbaycan iqtisadiyyatının inkişafı nəticəsində əldə edilən maliyyə təminatının hesabına baş verir. Həmçinin Azərbaycan xarici borcun ÜDM-də payına görə dünyada ən yaxşı mövqeyə malik olan ölkələrdəndir. Xarici borcun ÜDM-də payına görə Azərbaycan dünyada ən yaxşı mövqeyə malik olan 9 ölkədən biridir. Bu da ondan xəbər verir ki, Azərbaycan iqtisadiyyatında həm də təhlükəsizlik yastığı formalaşıb. Bunlar növbəti dövr üçün sürətli, dayanıqlı və davamlı iqtisadi inkişafın davam edəcəyindən xəbər verir. Bütün bunlar isə ölkəmiz üçün yeni imkanlar deməkdir”.
Vidadi ORDAHALLI
