BMT-də bilmirlər yunan məruzəçi Azərbaycana obyektiv olmayacaq?..
Akif Nağı: “Biz yunan xüsusi məruzəçidən obyektivlik gözləyə bilmərik, çünki məqsədi qərəzsiz olmaq deyil, qərəzli olmaqdır”
“BMT-nin mədəni hüquqlar üzrə xüsusi məruzəçisi Aleksandra Xantaki guya “Qarabağda erməni mədəni irsinin dağıdılması” barədə cəfəng iddialarla çıxış edib.
İlk öncə vurğulamaq istərdik ki, xüsusi məruzəçinin məktubunun başdan-başa anti-Azərbaycan xarakter daşıyan məzmunu, tonu və erməni diplomatlarının dərhal onu sevinclə paylaşması məktubun Ermənistan Xarici İşlər Nazirliyində yazıldığını deməyə əsas verir.
Xüsusi məruzəçinin Azərbaycanın suverenliyini təhdid edən iddialarını kəskin şəkildə pisləyir və qətiyyətlə rədd edirik”. Bu fikirlər Qərbi Azərbaycan İcmasının bəyanatında yer alıb.
Qeyd edilib ki, xüsusi məruzəçinin “Dağlıq Qarabağ”, “Mardakert”, “Karmir Şuka”, “Xramort” kimi qondarma toponimlərdən istifadə etməsi də yolverilməzdir. “BMT-nin xüsusi məruzəçisi qoy gedib elə BMT-nin özünün məhz ölkələrin təqdim etdiyi toponimlərdən istifadə edilməsinin vacibliyinə dair sənədləri ilə tanış olsun.
“Ermənilərin Laçından deportasiyası”ndan danışan BMT-nin xüsusi məruzəçisinin beynəlxalq hüquqa qarşı hörmətsizliyi və ştatlı azərbaycanofoba çevrilməsi, zavallı duruma düşməsi acınacaqlıdır. Bu məktub BMT-nin özünü gözdən salır. Təəssüflə bildiririk ki, Azərbaycan xalqının həm Ermənistanda, həm də vaxtilə işğal edilmiş ərazilərdə tarixi və mədəni irsinin dağıdılmasına BMT, UNESCO tərəfindən reaksiya verilməmiş, susqunluq nümayiş etdirilmişdir.
Sən demə, xüsusi məruzəçi həm də Qafqaz Albaniyası ilə bağlı mütəxəssis imiş və udi icmasının Qarabağda dini ocaqları ziyarət etməsi onun yaman xətrinə dəyib.
Xüsusi məruzəçi İrəvanda Göy Məscidin “Azərbaycan irsi”olmadığını bildirir. Ümumiyyətlə, A.Xantakinin bu cəfəng iddialarla məqsədinin nə olduğu bilinmir. Əgər A.Xantakinin məqsədi “erməni irsi”dirsə, onda onun Göy Məscidlə nə işi var!
Xüsusi məruzəçi həm də qəsdən Qərbi Azərbaycan İcmasının fəaliyyətini təhrif etmişdir.
Xüsusi məruzəçi öz kobud səhvini düzəltməli və Azərbaycan xalqının mədəni irsinin Ermənistan tərəfindən məhv edilməsinə münasibət bildirməli və bununla bağlı Ermənistan hökuməti ilə təmasa keçməlidir. Əks təqdirdə onun etnik və dini simpatiya əsasında fəaliyyət göstərməsi və azərbaycanofob olması tam sübut olunacaq.
Ümumiyyətlə, belə təəssürat yaranır ki, A.Xantakinin belə qərəzli olmasının səbəblərindən biri də onun Yunanıstandan olmasıdır. Xüsusi məruzəçidən mandatına uyğun olaraq müstəqil və qərəzsiz şəkildə fəaliyyət göstərməyi, Azərbaycana qarşı düşük iddialara son qoymasını tələb edirik”.
BMT-nin xüsusi nümayəndəsinin məlum açıqlamaları nəyə xidmət edir? O niyə erməni ağzı ilə danışır? BMT- də bilmirlər yunan məruzəçi Azərbaycana obyektiv olmayacaq? Nə üçün yunan məruzəçi təyin ediblər?
“BMT-də çox yaxşı bilirlər ki, yunan məruzəçi türk, Azərbaycan mövqeyi ilə razılaşmayacaq, ermənilərin tərəfini tutacaq”
Azad Vətən Partiyasının sədri Akif Nağı “Bakı-Xəbər”ə şərhində bildirdi ki, yunan məruzəçinin təyinatının kökündə ermənipərəst mövqe dayanır. “Çalşırlar ki, nəyin bahasına olursa-olsun, regionda faktları saxtalaşdırsınlar, ağ yalan danışsınlar, “erməni irsini” ortaya çıxarsınlar. Guya bu bölgədə “erməni irsi” olub, onlar “qədimdən” bu ərazidə yaşayıblar. Süni şəkildə yalançı tezisi sübut etməyə çalışırlar. Getdikcə həm Azərbaycan və həm dünyadakı müəyyən obyektiv tədqiqatçılar tərəfindən həqiqət ortaya çıxarıldıqca ki, bölgədə erməni torpağı, erməni mədəniyyəti olmayıb, bura ermənilər yalnız XIX əsrin əvvəllərindən sonra toplu halda köçürülüb, bu gerçəkliklər erməniyanlıları narahat edir. Həmin erməni müdafiəçilərinin özləri də bilirlər ki, bizim torpaqlarda məskunlaşdıqları dövrdə nə torpaqları, nə mədəniyyətləri, nə özlərini fərqli təqdim etmə formaları vardı, burada məskinlaşandan sonra Azərbaycana məxsus nə vardısa hamısını oğurlamağa başladılar. O cümlədən də, Azərbaycanın mədəniyyətini, musiqisini, mətbəxini, adlarını götürdülər. Hətta adları da, soyadlarının kökü də Azərbaycan adlarıdır. Əsasən də onu deməliyik ki, ermənilər Azərbaycanın tarixini oğurlayıblar. Azərbaycanın regionda beş min illik tarixi var, bölgədə ən qədim dövlət Azərbaycana məxsusdur. Azərbaycanda dövlət olub, burada hakimiyyətdə olan sülalələr türk sülalələri idi. Bu bölgədə ilk erməni dövləti 1918-ci ildə tarixi Azərbaycan torpaqlarında yaradılıb. Bu ərazini onlara Azərbaycan verib. Onlar bu faktı qəbul etmək istəmirlər. Bu kimi dezinformasiyaları yaymaqla gerçəkliyi məhv etmək istəyirlər, çünki bu onlara sərf etmir. Bu gün onlar erməni faktorunu qabartmaq istəyirlər. Bu onların ənənəsi, xarakteri, siyasətidir ki, burada azərbaycanlı, türk, müsəlman olmasın. Ona görə də, olmayan erməni irsini qabardırlar ki, guya Qarabağda erməni irsi vardı. Onun guya məhv edilməsi ilə bağlı aləmə car çəkirlər. Bunlar hamısı yalandır. Xaçkar deyiləndən başqa onların heç bir mədəniyyət nümunəsi yoxdur. Bu xaçkarlar da XIX əsrdən peyda olub, bu da adi baş daşıdır. Azərbaycan xalqı heç zaman məzarlara qoyduqları daşlara abidə kimi baxmayıblar. Ermənilərin başdaşılardan başqa heç bir abidələri olmaıdğı üçün onun adını xaçkar qoyublar. Xaçkar guya böyük bur abidədir, adi bir xaç şəkilli daşdır.
Biz yaxşı bilirik ki, BMT-nin və yaxud başqa təşkilatların təyin etdikləri xüsusi məruzəçilər təlimatlandırılır, onlara ermənilərin yalançı mövqeyini müdafiə etmələri tapşırılır. Yunan məruzəçiyə gəlincə, təbii ki, ondan hər hansı bir obyektivlik gözləmək olmazdı, o da təlimatlandırılmışlardan biridir. BMT-də çox yaxşı bilirlər ki, yunan məruzəçi türk, Azərbaycan mövqeyi ilə razılaşmayacaq, ermənilərin tərəfini tutacaq. Əlbəttə, bu baxımdan ortaya qərəzli mövqe qoyurlar. Biz yunan xüsusi məruzəçidən obyektivlik gözləyə bilmərik, çünki məqsədi qərəzsiz olmaq deyil, qərəzli olmaqdır. Onlar bölgədə türk varlığı ilə barışmaq istəmirlər”-deyə qeyd edən A.Nağı bildirdi ki, İrəvanın mərkəzində vaxtilə İrəvan xanı Hüseynəli xanın əmri ilə tikilmiş “Göy məscid”i də farslaşdırırlar, İrana məxsus olduğunu iddia edirlər. “Onları başa salmaq lazımdır ki, İran dedikləri Azərbaycan, Azərbaycan türkü deməkdir. Siz tapın görək hansısa bir dövrdə, Əhəmənilərin, Sasanilərin İran adlı dövlət varmı? Yoxdur”.
Bu bölgədə hökm sürən sülalələrin türklər olduğunu deyən A.Nağı qeyd etdi ki, Avropa isə bölgədə türkləri görmək istəmir. İrəvan xanlarının hamısının Azərbaycan türkü olduğunu xatırladan A.Nağı vurğuladı ki, onların tikdirdiyi məscdilər, abidələr necə “fars abidəsi” ola bilər? O qeyd etdi ki, biz təbliğatımızı lazımi səviyyədə davam etdirməliyik, kitablar yazıb müxtəlif dillərə tərcümə etməliyik, filmlər çəkməliyik, biz öz tariximizi təbliğ etməliyik.
A.Nağı əlavə etdi ki, biz beynəlxalq qurumları daim gerçəkliklərlə tanış etməliyik.
İradə SARIYEVA
