Lerikin bəzi kəndləri yaşanmaz duruma düşüb, məmurlar isə...
İndi Lerikin dağ kəndlərində acınacaqlı bir durum yaşanır. Lap açığını desək, yerli məmurlar onlara verilən səlahiyyətlərdən istifadə edərək istədiyi vaxt dövlətin qanunlarını poza bilirlər. Nəticədə Tanrının bəxş etdiyi ömür payını yaşamaqdan ötrü zalımın zülmündən asılı vəziyyətə düşən kəndli cəhənnəm əzabına dözmək məcburiyyətində qalır.
Qısa şəkildə desək, artıq bu dağ rayonunda özünə güvənib kəndlini adam yerinə qoyan məmur yoxdur. Nəticədə gözdən uzaq kəndlərdə qalaq-qalaq yığılıb qalmış sosial problemlər viranəlikdən başqa bir şey deyildir. Rayonda vəzifə tutanlar daha çox var-dövlət toplamaq üçün yalan uydurub xalqda ölkə başçısına olan inamı öldürməyi yaxşı bacarırlar. Halbuki, Azərbaycanın Prezidenti İlham Əliyev yorulmadan çalışır ki, ölkəsi daim tərəqqi etsin, xalqı həmişə xoşbəxt yaşasın. Və istəyinə apardığı ağıllı, dərin düşüncəyə söykənən siyasəti ilə nail ola bilir.
Lerikin unudulan kəndlərində günbəgün vəziyyət pisləşir. Bu da elə rəhbər işçilərin əsas istəyidir. Tutduğu kreslolarda rahat oturur, ölkə başçısının rayonun sosial inkişafı üçün ayırdığı vəsaiti qoxu bilmədən mənimsəyirlər. Dövlət işçisi kimi, amma əhalidən ötrü heç bir fəaliyyət göstərmədən aldıqları yüksək “əmək haqqı” da öz yerində. Fəqət, xalqa xidmət etmək məqsədilə vəzifəyə gələnlər bir dəfə belə olsun kəndlini narahat edən problemlərlə maraqlanmır. Odur ki, rayonda kənd həyatı bərbad haldadır. Bir də kimin ki, adamı vəzifədədir, o, hökmranlıq edir. Əhalinin çoxu baş götürüb gedir, kəndlər sürətlə boşalır. Bunlara son qoymaq üçün əli hər yerdən üzülən kəndli hazirkı zamanda işıq gələn tərəfi yalnız öz Prezidentində görür.
Rayonun əksər kəndlərində təbii qaz yoxdur. Son vaxtlar bəzi işbazlar yanacaq odunu da qaldırıblar qızıl qiymətinə. Kəndlı evini isitməkdən ötrü cəhənnəm əzabını çəkir. Bu yandan isə ölkəmiz dünyanın çox yerinə qaz ixrac edir. Sovetdən qalma elektrik dirəkləri çürüyüb. Məftillərdən sallananı da vardır. Nəticədə tez-tez işıqlar sönür. Bir balaca yağış olanda palçığın əlindən kəndlərin içinə girmək olmur. İllərdir rayonda ictimai nəqliyyat fəaliyyət göstərmir. Əhali mərkəzə, eləcə digər bir yerə getməkdə çətinliyə düşür. Köhnə dövrün mağazaları dağılandan sona camaat gündəlik ərzaqlarını üç qat bahasına əldə edir. Ölkədə bankomat yarananı yaşlı adamlar pensiya pullarını aylarla ala bilmirlər. Ümumiyyətlə, sosial problemlərin ucbatından Lerikin çox kəndində yaşamaq qeyri-mümkündür....
Zəfər ORUCOĞLU
Azərbaycan Jurnalistlər Birliyinin üzvü
