Prezident Əliyev ideoloji təxribatlara qarşı mübarizədə medianın roluna dair çağırış etdi...
Azər Həsrət: “Prezident məhz buna vurğu edir ki, biz öz milli maraqlarımızı həm də media vasitəsilə qlobal müstəvidə müdafiə etməliyik və edəcəyik”
“Digər vacib vəzifələr ideoloji təhlükəsizliklə bağlıdır və burada da biz daim diqqətli olmalıyıq. Çünki bizə qarşı ideoloji təxribatlar davam edir. Düzdür, onların bugünə qədər heç bir nəticəsi olmayıb, çünki bunların qarşısında xalqımızın güclü iradəsi və milli ruhumuz dayanır. İstənilən ideoloji təxribatın burada kök salması qeyri-mümkündür. Ancaq bununla bərabər, bu bizi sakitləşdirməməlidir. Ona görə biz buna daim hazır olmalıyıq və bizə qarşı aparılan çirkin oyunları ifşa etməliyik, necə ki, edirik, həm rəsmi surətdə, həm ictimai məkanda, həm də media məkanında. Hesab edirəm ki, Azərbaycan xalqı bu gün hər şeyi yaxşı görür, hər şeyi yaxşı bilir - bizim dostumuz kimdir, düşmənimiz kimdir”. Bu barədə Prezident İlham Əliyev VII çağırış Milli Məclisin ilk iclasındakı çıxışında bildirib.
Prezident Əliyev həmçinin vurğulayıb: “Media kampaniyasının, qarayaxma, iftira, böhtan kampaniyalarının da məqsədi məhz budur - bu mövzunu daim gündəlikdə saxlamaq və ümidlə yaşamaq ki, nə vaxtsa Azərbaycan büdrəsə, zəifləsə, yenidən bizə qarşı bu çirkin hərəkətlər başlasın. Yəni biz bunu bilməliyik. Azərbaycan iqtidarı bunu bilir, ictimaiyyət də bunu bilməlidir. Ona görə bizim arxayınlaşmağa heç cür haqqımız yoxdur”.
Prezident dedi ki, vaxtilə medianı da ələ almaq istəyirdilər. Eyni zamanda da bildirdi ki, biz bu gün müxtəlif təxribat mərkəzlərinin həm rəsmi, həm ictimai, həm də media müstəvisində bu fəaliyyətləri ifşa etməkdə davam edəcəyik. Bu üç müstəvi göstərdi ki, bu mübarizə rəsmi, ictimai və media müstəvisində olacaq. Bu əslində Qərbin ideoloji təxribatları ilə mübarizədə medianın rolunun gücləndirilməsinə bir çağırış idi.
“Düşünürəm ki, artıq Azərbaycan mediası bu məsələlərdə daha fəal olmalıdır”
Siyasi şərhçi Azər Həsrət “Bakı-Xəbər”ə bildirdi ki, əlbəttə, bütün dünyada medianın rolu danılmazdır, bu birmənalıdır. “Prezident İlham Əliyev də məhz onu nəzərdə tutaraq belə bir çağırış edir. Biz xatırlayırıq, Azərbaycanda hələ 1988-ci ildə bu hadisələr başlayanda, təbiidir ki, dünyaya açılmaq imkanlarımız yox idi, bütün informasiyalar Moskva üzərindən dünyaya yayımlanırdı. Təəssüflər olsun ki, onda da Moskva birtərəfli mövqe tutmuşdu, antiazərbaycan informasiyar yayırdı, ermənilərin rolu şişirdilirdi, onlara rəğbət bəslənilirdi, dünya da bizi “vəhşi” kimi görməyə başlamışdı. Amma sonrakı mərhələdə aradan illər keçdi, Azərbaycanda azad və milli media formalaşdı. Həmin media artıq Azərbaycanın səsini dünyaya heç kimdən asılı olmadan çıxarmağa başladı. Məhz bunu görən müəyyən dairələr Azərbaycanda azad medianı təsir altına almağa başladı. Cənab Prezident də məhz bunu nəzərdə tutur. O təsir altına alma cəhdləri nəticə etibarı ilə ona gətirib çıxardı ki, Azərbaycanın ən ümdə problemləri, məsələləri dünyaya çatırılmaq əvəzinə hansısa xırda, ürək bulandıran məsələlərlə bağlı qlobal səviyyədə səs-küy salmağa başladılar. Yəni bir növ Azərbaycanın əsas problemlərindən diqqət yayındırıldı, kiminsə xırda məsələləri ilə bağlı dünyada səs-küy qaldırıldı. Ona görə də, Azərbaycan dövləti hərəkətə keçərək bu meyllərin qarşısını almaq üçün addımlar atdı. Nəticə etibarı ilə bu gün Azərbaycanda həm də azad media artıq doğrudan da milli maraqlara xidmət edən bir müstəvidə fəaliyyət göstərir”-deyə A.Həsrət bildirdi.
A.Həsrət qeyd etdi ki, əlbəttə, bundan sonra da bizə qarşı olanlar boş durmayacaqlar, ona görə də, biz bu üç müstəvidə mübarizəmizi, fəaliyyətimizi gücləndirməliyik. “Bu baxımdan, Prezident məhz buna vurğu edir ki, biz öz milli maraqlarımızı həm də media vasitəsilə qlobal müstəvidə müdafiə etməliyik və edəcəyik. Ümid etmək olar ki, dövlət bu yöndə uyğun adamlarla uyğun iş qurulmasına şərait yaradacaq. Əlbəttə, biz arzu edərdik ki, bu işləri bacaran insanlarla müəyyən işlər görülsün. Şübhəsiz, azərbaycanlı olaraq, vətəndaş olaraq hamımızın istəyimiz odur ki, dövlətimiz və xalqımızla bağlı qlobal səviyyədə yayımlanan informasiyalar, yazılar, materiallar elə şəkildə yayımlansın, orada obyektivlik təmin olunsun. Obyektivlik təmin edildikdə biz Azərbaycan tərəfi, Azərbaycan xalqı olaraq heç nədən narazı qalan deyilik. Çünki haqq bizim tərəfimizdədir. Biz dünyaya sadəcə olaraq haqq səsimizi çatdırmaq istəyirik. Əlbəttə, Prezidentin media məsələsini ayrıca qeyd etməsi əlavə bir yol göstərmək kimidir. Yəni düşünürəm ki, artıq Azərbaycan mediası bu məsələlərdə daha fəal olmalıdır. Dövlət də, dediyim kimi, bu işin yaxşı alınması üçün öz dəstəyini əsirgəməməlidir”.
İradə SARIYEVA
