ABŞ Qarabağa görə Azərbaycanın aktivlərini müsadirə etsə, cavab çox sərt olacaq...
İlyas Hüseynov: “Düşünmürəm ki, vəziyyət o qədər böyüyəcək və Azərbaycanın xaricdəki maliyyə vəsaitlərinə sanksiya qoyulacaq”
Ermənistan hökuməti Qarabağ iddiasından əl çəkdiyini bəyan etsə də, amma erməniləri uzun illərdən bəri himayə edən qüvvələr, xüsusən də ABŞ və Fransa kimi dövlətlər bu məsələni heç cür gündəlikdən çıxarmaq istəmirlər. Bu dövlətlər sönmüş ocağı qığılcımlandırmaq üçün əllərindən gələni edirlər ki, yenidən müharibə alovlansın.
Bildiyimiz kimi, ABŞ Konqresində İnsan Hüquqları Komissiyasında Azərbaycana qarşı dinləmələr keçirilib. Söhbət sentyabrın 19-da ABŞ Konqresinin Tom Lantos İnsan Hüquqları Komissiyasında keçirilmiş "Dağlıq Qarabağın süqutundan sonra Azərbaycanda insan hüquqları" adlı dinləmələrdən gedir ki, bunun da qərəzdən başqa bir şey olmadığı məlumdur.
Bilirik ki, ABŞ və Fransa keçmiş “Dağlıq Qarabağ” münaqişəsini canlandırmaq üçün davamlı addımlar atır, ziyanlı təşəbbüslər göstərir.
Separatçı rejimin nümayəndələrinin ABŞ Konqresinə dəvət edilməsi, ABŞ Konqresində “Dağlıq Qarabağın süqutu”na həsr olunan, həmçinin ABŞ və Fransanın aparıcı qurumlarının (hökumət, parlament və vətəndaş cəmiyyəti səviyyəsində) ləğv edilmiş “Dağlıq Qarabağ erməniləri”nə dəstək verən çoxsaylı təşəbbüslərinə həsr olunmuş tədbirləri buna misaldır.
Əgər ABŞ Konqresi Qarabağ haqda bu qanunu qəbul etsə, Azərbaycanın aktivlərini müsadirə edə bilərlərmi?Azərbaycan buna nə ilə cavab verəcək?
“Bu, ultimatum xarakterli və erməni lobbisinin sifarişlərini yerinə yetirməyə yönəlmiş yanaşmadır”
Politoloq İlyas Hüseynov “Bakı-Xəbər”ə “ABŞ Konüqresində keçirilən dinləmələr ölkəmiz əleyhinə fəaliyyəti əhatə edir. Burada çağırış edilir ki, Azərbaycanın aktivləri dondurulsun və Qarabağ ermənilərinə yönəldilsin. Eyni zamanda Konqresdə hər zaman qəti mövqeyi ilə seçilən konqresmenlər Adam Şiff, Frenk Pallone və digərilərinin təşəbbüsü tamamilə qərəzlidir. Aydındır ki, erməni lobbisinin, erməni maliyyəsinin təsir altında bu cür qəzli və məkrli fəaliyyəti icra edirlər. Eyni zamanda bu cür yanaşmalar Bakı ilə Vaşinqton arasında münasibətlərə təsir edir və ABŞ-a regionda vasitəçi kimi funksiyasını zəiflədir, regiondan uzaqlaşdırır”-deyə bildirdi.
İ.Hüsenovun fikrincə, ayrı-ayrı geosiyasi mərkəzlər də bu fəaliyyətindən sonra regiondan kənarda qalıblar, ABŞ da sanki bu cür yolla getməyi üstün hesab edir, özünü həm də ikinci Fransa kimi aparır. “Fransa da regionda arzuolunmaz bir dövlətə çevrilib. Eyni zamanda düşünmürəm ki, vəziyyət o qədər böyüyəcək və Azərbaycanın xaricdəki maliyyə vəsaitlərinə sanksiya qoyulacaq. Bu, ultimatum xarakterli və erməni lobbisinin sifarişlərini yerinə yetirməyə yönəlmiş yanaşmadır. Demokratların dövründə Bayden adminstrasiyası bu seçkiqabağı piar gedişlərini də sanki çoxaldır. Təəssüflər olsun ki, bu ölkəmizin adı ilə hallanan seçki təbliğatına çevrilməkdəir. Əlbəttə, bütün bunlara son qoymaq lazımdır. Azərbaycan öz prinsipial mövqeyini bütün məsələlərdə nümayiş etdirib. Burada da bizim milli birliyə, həmrəyliyə və ölkəmizin gücünün artırılmasına hesablanmış addımlar atılması zəruridir və bu baxımdan düşünürəm ki, gücümüzü daha da birləşdirməli, ölkəmiz və Prezidentimiz ətrafında daha sıx fəaliyyətimizi genişləndirməliyik”-deyə İ.Hüseynov qeyd etdi.
İradə SARIYEVA
