Qarabağdan qovulmuş "separatçı artsaxçılar" İrəvanda "sıfırdan başlamaq” xəyalındadırlar…
Elşad Musayev: “Azərbaycan ermənilərin məkrli addımlarının qabağından geri çəkilməməlidir”
Qarabağdan Ermənistana qaçan separatçılar yenidən fəaliyyətə başlamağa, Azərbaycana qarşı separatizmi davam etdirməyə hazırlaşır. Qondarma rejimi ləğv edən separatçıların sonuncu “başçısı” Samvel Şahramanyan İrəvanda bu qərarından imtina edəndən sonra “gələcəkdə nə etmək” haqda müzakirələrə başlayıb.
Ermənistan mediasının məlumatına görə, separatçılar dünən “Marriott” otelində qapalı toplantı keçirib. Toplantıda Şahramanyanla yanaşı, artıq mövcud olmayan qondarma “parlamentin keçmiş rəhbəri” olmuş Aşot Qulyan, qondarma “deputatlar” və digər separatçılar iştirak edib.
Bununla nəyəsə nail ola bilərlər?
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, Qarabağdan Ermənistana qaçan separatçılar məxfi görüş keçiriblər dedikdə, mətbuata açıq olmayan görüş başa düşülə bilər: “Bizim cəmiyyəti də maraqlandırır ki, görəsən o görüşdə nələr olub, bundan sonra hansı addımları ata bilərlər? Nəzərə alaq ki, biz çox məkrli bir düşmənlə üz - üzəyik. Azərbaycanda məsələyə sadəlövhcəsinə yanaşanlar var. “Reinteqrasiya olunsun, ermənilər geriyə, Xankəndi və ətraf bölgələrə qayıtsın” kimi fikirlər səsləndirilir. Amma bu yanaşmalar doğru yanaşmalar deyil. Düşmən çox məkrli düşməndir. Ona görə də, siyasətçi üçün ən çətin olanı bundan sonrakı dövr üçün proqnoz verməkdir. Biz belə hesab edirik ki, ermənilərin əsas məqsədi qürbətdə olan bir “Artsaxı” saxlamaq, onun vasitəsi ilə Azərbaycana təzyiq etmək və dilənçi kimi ayrı - ayrı fondlardan, dövlətlərdən pul yığmaq, prosesi uzatmaqdır. Çox güman ki, bundan sonra da iddialarla çıxış edəcəklər, məkrli siyasətlərini davam etdirəcəklər. O ki qaldı bunun hər hansı bir nəticəsi olacaqmı sualına, heç bir nəticəsi də olmayacaq. Azərbaycan çox uğurlu bir əməliyyat həyata keçirdi. 200 il sonra öz ərazi bütövlüyümüzü təmin etməyə başladıq. Ermənilərin yenidən bura qayıtması, yenidən status qazanması sadəcə mümkünsüzdür. Azərbaycan cəmiyyəti qəbul etməlidir ki, ermənilər bura gələndə bizim millətin sakitliyi, rahatı pozulur. Biz müdafiə taktikasında deyil, hücum taktikasında olmalıyıq. Azərbaycan işğal altında olan torpaqları ilə bağlı addımları davam etdirməlidir. Çünki Qazaxın 7 kəndi ermənilərin işğalındadır. Eyni zamanda bizim itirilmiş torpaqlarımızla bağlı iddialarımız davam etməlidir. Biz onları geri qaytarmağı düşünməliyik. Qars müqaviləsindən sonra Naxçıvanın 15 faizi ermənilərə verilib. Böyük Azərbaycan Partiyası olaraq, biz bunu qəbul etmirik. Eyni zamanda Zəngəzur və digər ərazilərimiz kəsilib ermənilərə verilib. Bununla bağlı da hücum taktımazı davam etdirməliyik. Paralel olaraq Zəngəzur dəhlizinin açılmasına çalışmalıyıq. Zəngəzur dəhlizində İrandan çəkilən xətti alternativ hesab etmək olmaz. Zəngəzur məsələsi siyasi məsələdir. Bəziləri efirə çıxıb Zəngəzur yolu deyirlər. Bu çox satqın mövqedir və xaricilərə xoş gəlmək üçün atılan addımlardır. Azərbaycan ermənilərin məkrli addımlarının qabağından geri çəkilməməlidir. Mülki iddialar daxil olmaqla, digər bütün iddialar qaldırılmalıdır. Ermənistanın Azərbaycana vurduğu maddi, mənəvi ziyanın əvəzi çıxılmalıdır. Düzdür, ermənilərin arxasında duran beynəlxalq aləm var, Ermənistanı müdafiə edir. Amma nə qədər müdafiə etsə də, Azərbaycan türk dünyasının bir hissəsidir. Türk dövlətlər təşkilatının yeni dünya düzənində inkişafı gözlənilir. Belə olan halda nə Ermənistan, nə onun arxasında duran qüvvələr Azərbaycana təzyiq edə bilər. Əslinə baxanda, qalib gələn bizik. Bütün hər şey bizim əlimizdədir”.
Məhəmmədəli QƏRİBLİ
