Azərbaycan QHT-nin erməni "dağ-mədən cinayətlərinə" qarşı mübarizəsi fəallaşır…
Sadiq Həsənov: “Ermənistanda dağ-mədən sənayesi çox inkişaf edib, xüsusilə...”
2024-cü ilin əvvəlində Amuldağ yatağında qızıl hasilatı ilə bağlı Ermənistan hökümətinin planlarına etiraz edən erməni QHT-lərinə "Environmental protection first" koalisiyası tərəfindən dəstək ifadə olunub.
Məlum olduğu kimi, Ermənistan hökuməti hələ də xarici investor şirkətlərin Ermənistan ərazisində dağ-mədən fəaliyyətlərə yatırım etməsinə imkan yaradır və ətraf mühitə təsirin qiymətləndirilməsi hesabatlarının nə Ermənistan ictimaiyyətinə, nə də qonşu ölkələrə təqdim olunmasını tələb etmir. Bununla bağlı 12 sentyabr tarixində Ermənistanın qanunsuz dağ-mədən sənayesi fəaliyyətinin Azərbaycanın və bütövlükdə Cənubi Qafqazın ekologiyasını zəhərləməsi ilə bağlı brifinq keçirilib. Brifinqdə Ermənistanın Cənubi Qafqazın ekologiyasına ziyan vurulduğu qeyd edilib.
Qeyd edək ki, Azərbaycan QHT-ləri Ermənistanın dağ-mədən sənayesinin ekologiyaya və ətraf mühitə vurduğu ziyanlara qarşı mübarizəni fəallaşdırıblar. Bu mübarizənin nə kimi perspektivləri var?
“Çirklənmiş su çaya axıdılır, Oxçuçay birbaşa Araz çayına tökülür, beləliklə ətraf mühit çirklənir”
“Sağlam həyata doğru” Ekoloji İctimai Birliyinin sədri, Radiasiya Problemləri İnstitutunun əməkdaşı, kimya elmləri üzrə fəlsəfə doktoru Sadiq Həsənov “Bakı-Xəbər”ə açıqlamasında bildirdi ki, Ermənistanda dağ-mədən sənayesi çox inkişaf edib. Xüsusilə ermənilər uzun müddət Kəlbəcər rayonu ərazisində yerləşən Zod yatağında istismarla məşğul olublar. Qafan və Kacaran rayonları birbaşa dağ-mədəni sənaye obyektləri olan ərazidə yerləşib. Qafan və Kacaran rayonlarında istehsal olunan torpaq elementləri emal olunur, hazır vəziyyətə gətirilərək Ermənistanın digər rayonlarına göndərilir. Bu zaman bir neçə istiqamət üzrə ətraf mühit çirklənir. Qazıntı zamanı torpağın üst qatı götürülür və dağlarda emal olunan mis və digər əlvan metalların istehsalı aparılır. İstehsal zamanı torpaq qatı toplanaraq Kacaran və Qafanda olan zavodlara daşınır, orda emal olunur. Emal olunduqdan sonra hazır məhsul vəziyyətinə gətirilir. Emal prosesi zamanı həddindən artıq sudan istifadə olunur. 1 ton torpağın emal olunması üçün 4-5 tona yaxın su istifadə olunur. Bu mərhələdə müxtəlif kimyəvi elementlərdən də istifadə olunur. Sonradan çirklənmiş su çaya axıdılır. Məlumat üçün bildirim ki, həmin ərazidən Oxçuçay axır. Oxçuçay birbaşa Araz çayına tökülür. Araz çayı vasitəsilə zəhərli elementlər Azərbaycana gəlir. Beləliklə ətraf mühit çirklənir. Bu istiqamətdə Azərbaycan QHT-lərinin gördüyü iş təqdirəlayiqdir”.
Günel CƏLİLOVA
