Putinin Türkiyə səfərinin təxirə salınmasının səbəbi açıqlandı - Moskva onun təyyarəsini rus qırıcılarının müşayiət etməsini istəyir, ancaq...
Rusiya prezidenti Vladimir Putinin Türkiyəyə səfəri Moskvanın onun təyyarəsinin Rusiya döyüş təyyarələrinin müşayiət etməsi tələbinə görə təxirə salınıb.
Xarici mediada yayılan məlumatlara görə, Putin Ukraynanın onun təyyarəsinə uçuş marşrutu boyunca hücum edə biləcəyi ehtimalından ehtiyat edir və buna görə Rusiya qırıcılarının mühafizəsi altında Türkiyəyə uçmaq istəyir. Ancaq Rusiya təyyarələri NATO-nun Türkiyədəki hava hücumundan müdafiə sistemləri tərəfindən düşmən hədəf kimi qəbul oluna biləcəyi üçün buna razılıq veriləcəyi çətin görünür.
İddia edilir ki, hazırda Türkiyənin Putinin təhlükəsizliyi üçün döyüş təyyarələri ayırması ehtimalı müzakirə olunur. Səfərin baş tutub-tutmayacağı isə qeyri-müəyyən olaraq qalır.
Bu arada, Putinlə Ərdoğanın mümkün görüşü ilə bağlı açıqlama verən Kremlin sözçüsü Dmitri Peskov deyib ki, hazırlıqlar tamamlandıqdan sonra Rusiya lideri Türkiyəyə səfər edərək Ərdoğanla görüşəcək.
Peskov həmçinin Moskvanın Putin və Ərdoğanın Rusiyanın Kazan şəhərində keçiriləcək BRİCS sammiti çərçivəsində danışıqlar aparacağına ümid etdiyini də bildirib.
TAHİR
