Paşinyan Lavrovun üzünə sərt qayıtdı...
Ramil Məmmədli: “Paşinyan bununla açıq bildirir ki, Rusiyanın iki ölkə arasında vasitəçi olmasını istəmir”
“Mən hər hansı (üçüncü tərəf) vasitəçiliyini istisna etmirəm, amma bu, dəyərləndirilməsi gərəkən çoxsaylı şərtlərdən asılıdır. Səmimi desəm, regional nəqliyyat xətləri məsələsində Ermənistanı sabotajda ittiham edən ölkəni vasitəçi kimi necə təsəvvür edirsiz? Belə bir bəyanatla çıxış edən qurum artıq belə bəyanatla özünü vasitəçiliklə bağlı bütün mümkün məsələlərdən kənarlaşdırır. Harada görünüb ki, vasitəçi ittiham edir, tamamilə əsassızdır, sonra biz deyirik ki, gedin vasitəçi olun?”.
Bunu Ermənistanın baş naziri Nikol Paşinyan İrəvanda keçirdiyi mətbuat konfransında deyib.
Paşinyan Lavrovun avqustun 19-da səsləndirdiyi fikri nəzərdə tutub. Lavrov Ermənistanın Azərbaycanın Naxçıvan eksklavına nəqliyyat dəhlizi açmaqdan imtina etdiyini deyib. Belə bir marşrutun açılması 2020-ci ildə İkinci Qarabağ müharibəsini dayandıran, Rusiyanın vasitəçiliyi ilə əldə olunmuş atəşkəs bəyanatında nəzərdə tutulub.
Bununla yanaşı, Paşinyan qeyd edib ki, onların irəli sürdüyü “Dünyanın kəsişməsi” layihəsi “Orta dəhliz”in davamı ola bilər: “Biz özümüz kommunikasiya açmaq istəyəndə hansı təzyiq olmalıdır? Siz “Orta dəhliz”i qeyd etdiniz. Bizdə “Orta dəhliz”lə bağlı heç bir mənfi təsəvvür yoxdur. Bəli, “Dünyanın kəsişməsi” də “Orta dəhliz”in bir hissəsi ola bilər”.
“Orta dəhliz”ə gəldikdə isə, bəli, Ermənistan onun “Dünyanın kəsişməsi” ilə inteqrasiyasını istəyir, amma...”
Sözügedən məsələni “Bakı-Xəbər”ə şərh edən hərbi ekspert Ramil Məmmədli hesab edir ki, bununla Paşinyan həm Rusiyanın vasitəçiliyinə, həm də bu ölkənin iştirak etdiyi layihəyə qarşı çıxır: “Birincisi, bu o deməkdir ki, istənilən halda tərəflər arasında Rusiya vasitəçi ola bilməz. Paşinyan bu fikirləri ilə açıq bildirir ki, Rusiyanın Azərbaycanla Ermənistan arasında vasitəçi olmasını istəmir. Paşinyan açıq demir ki, heç bir vasitəçidən söhbət gedə bilməz. Paşinyan deyir ki, Moskva vasitəçi ola bilməz. Ancaq Paşinyandan olsa, maraqlıdır ki, tərəflər arasında Brüssellə Vaşinqton vasitəçi olsun. Qərb təsisatlarını Ermənistanın hazırkı hakimiyyəti özünə daha doğma hesab edir, nəinki Rusiyanı. Sadəcə, Azərbaycan ikitərəfli danışıqlar formatına üstünlük verdiyi üçün Qərbin vasitəçiliyi alınmır. “Orta dəhliz”ə gəldikdə isə, bəli, Ermənistan onun “Dünyanın kəsişməsi” ilə inteqrasiyasını istəyir. Çünki o yaxşı bilir ki, bu, Ermənistan üçün böyük tranzit imkanları deməkdir. Paşinyan yaxşı bilir ki, bunun sayəsində ölkəsi milyonlar qazanacaq. Ancaq “Orta dəhliz” məsələsində Ermənistanın yanaşması fərqlidir. İrəvan istəyir ki, Naxçıvana gedən yola xüsusi status verilməsin. Yəni Zəngəzur dəhlizi formasında olmasın. Digər tərəfdən, istənilən halda bu yola Rusiya nəzarət etməsin. Həmin yol sırf Ermənistanın nəzarətində olsun. Bu isə o deməkdir ki, Paşinyan 10 noyabr 2020-ci ildə imzaladığı üçtərəfli razılaşmanın 9-cu bəndini ləğv etmək istəyir. Məlum olduğu kimi, həmin bənddə Naxçıvana gedən yola Rusiya FTX-sinin nəzarət etməsi öz əksini tapıb. Bax məsələnin mahiyyəti bundan ibarətdir”.
Vidadi ORDAHALLI
