Saxta jurnalist vəsiqələrinin xeyirdən çox ziyanı oldu...
Mətləb Salahov: “Unutmayaq ki, qara qüvvələr seçkilər zamanı məhz “jurnalist libasına” bürünmüş təxribatçılardan istifadə edirlər”
Milli Məclisə növbədənkənar seçkilər zamanı bir sıra seçki məntəqələrində saxta jurnalist vəsiqəsindən istifadə halları müəyyən edilib. Bu barədə Daxili İşlər Nazirliyinin və Medianın İnkişafı Agentliyinin birgə açıqlamasında deyilir.
Üzərində Azərbaycan Respublikasının Medianın İnkişafı Agentliyi tərəfindən verildiyi iddia olunan “Jurnalist vəsiqəsi” orijinal nüsxənin elementlərini kobud formada təkrarlayaraq qeyri-qanuni yolla hazırlanıb.
Xatırladırıq ki, jurnalist vəsiqəsinin verilməsi qaydası “Media haqqında” Azərbaycan Respublikası Qanunu və “Media Reyestrinin aparılması Qaydaları” ilə tənzimlənir, onun forması isə Azərbaycan Respublikası Nazirlər Kabinetinin Qərarı ilə təsdiq edilib.
Jurnalist vəsiqəsi müvafiq qanunvericiliyin tələblərinə cavab verən jurnalistlərə Azərbaycan Respublikasının Medianın İnkişafı Agentliyi tərəfindən verilən, rəqəmlərin və (və ya) hərflərin kombinasiyasından ibarət unikal qeydiyyat nömrəsi olan rəsmi sənəddir. Vəsiqənin arxa hissəsində yerləşdirilmiş QR kodunu skan etməklə vəsiqə sahibini eyniləşdirmək, onun Media Reyestrinə daxil edilib-edilmədiyini, həmçinin vəsiqənin həqiqiliyini müəyyən etmək mümkündür.
Jurnalist vəsiqəsinin hər hansı forma və üsulla saxtalaşdırılması, istifadəsi qanunvericiliklə müəyyənləşdirilmiş məsuliyyətə səbəb olur. Hazırda Daxili İşlər Nazirliyi tərəfindən müvafiq araşdırmalar aparılır, fakta hüquqi qiymət verilməsi təmin ediləcək. Bu barədə birgə bəyanatda deyilir.
Qeyd olunduğu kimi, bir sıra seçki məntəqələrində saxta jurnalist vəsiqəsindən istifadə halları müəyyən edilib, faktla bağlı araşdırmalara başlanılıb.
Göründüyü kimi, saxta jurnalist vəsiqəsindən istifadənin ziyanlı olduğu bir daha təsdiqləndi.
“Məncə, artıq bir neçə seçkidir təkrarlanan belə təxribat şoularına son vermək üçün qəti tədbir görmək zamanıdır”
"Nəcib Jurnalistlər" Təşkilatının sədri Mətləb Salahov “Bakı-Xəbər”ə şərhində “Təəsüf ki, 1 sentyabr növbədənkənar parlament seçkilərinə kölgə salmağa çalışanlar min bir üsulla buna nail olmağa cəhd etdilər. Xüsusilə jurnalist adından sui-istifadə halları, mediaya heç bir aidiyyəti olmayan şəxslərin saxta jurnalist vəsiqəsi ilə məntəqələrdə gərginlik yaratmaq cəhdləri baş verdi. Əlbəttə, demokratik seçki mühitində seçkinin gedişatını izləmək, səsverməni obyektiv işıqlandırmaq olduqca önəmli faktordur. Amma qanunvericilik çərçivəsində”-deyə M.Salahov bildirdi.
M.Salahovun sözlərinə görə, saxta jurnalist vəsiqəsi ilə məntəqələrə hücum etmək, seçki prosesini beynəlxalq müşahidəçilərin gözləri önündə pozmaq, namizədlərin vəkillərinə, bitərəf müşahidəçilərə, hətta seçki komissiyasının üzvlərinə təzyiq etmək tam bir cinayət hadisəsidir. “Bu sadaladıqlarımın peşəkar jurnalistika ilə heç bir bağlantısı ola bilməz.
Məncə, artıq bir neçə seçkidir təkrarlanan belə təxribat şoularına son vermək üçün qəti tədbir görmək zamanıdır. Heç bir yerdə qeydiyyatda olmayan, ölkə ictimaiyyətinin adını bilmədiyi “zirzəmi saytlarının” bu əməllərinə hüquqi qiymət verilməlidir. Unutmayaq ki, qara qüvvələr seçkilər zamanı məhz “jurnalist libasına” bürünmüş təxribatçılardan istifadə edirlər.
Digər bir tərəfdən, mobil telefonun kamerasını əlində tutub özünü “blogger” adlandıran təsadüfi şəxslərin seçki məntəqələrində istədikləri kimi davranmaları, heç bir hüquq çərçivəsinə əməl etməmələri, seçkinin gedişinə mənfi təsir göstərmələri, üstəlik seçiçiclərin iradəsini belə təsiri altına salması qəbuledilməzdir. Belə qanunsuz “özfəaliyyət dərnəyi” cəmiyyət üçün mənfi trend yaradır”-deyə M.Salahov vurğuladı.
İradə SARIYEVA
