“Naxçıvanda atəşkəs pozuntularının ardınca COP29-dan sonra Zəngəzura hücum olacaq” - erməni variantı...
Təbriz Musayev: “Reallıq odur ki, Rusiya 9-cu bəndlə bağlı Ermənistana təzyiq edir”
Son vaxtlar Ermənistan siyasi və lobbi imkanlarından istifadə edərək, Azərbaycanın yeni hərbi zərbələrə hazırlaşdığı barədə beynəlxalq aləmdə rəy yaratmağa çalışır. Demək olar ki, erməni mediasının əksəriyyətində bu tezislər özünü göstərir. Hər vasitə ilə münasibətlərin olduqca gərgin olması barədə rəy formalaşdırmağa cəhd edirlər.
Burada diqqəti çəkən məqam ondan ibarətdir ki, bu barədə yayılan materiallarda bu dəfə daha çox Türkiyə deyil, Rusiya amili qabardılır. Xüsusilə Moskvanın adı hallandırılır. Guya Rusiya bütün vasitələrlə Azərbaycanı buna təhrik edir. Guya atəşkəsin Naxçıvan istiqamətində pozulması barədə məlumatları Azərbaycan məqsədli şəkildə yayır ki, Zəngəzura hücum üçün zəmin formalaşsın. Əminliklə bəyan edirlər ki, noyabrda Bakıda keçiriləcək COP29-dan sonra Azərbaycan hücuma keçəcək.
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayevin fikrincə, erməni mediasının belə agitasiya aparmasının bir neçə səbəbi var: “Başlıca səbəb ondan ibarətdir ki, Ermənistan 10 noyabr 2020-ci ildə imzalanan üçtərəfli razılaşmanın 9-cu bəndi ilə bağlı öhdəliyini yerinə yetirmək istəmir. Xatırladaq ki, 9-cu bənddə Naxçıvana maneəsiz gediş-gəlişin təmin edilməsi və dəhlizə Rusiya Federal Təhlükəsizlik Xidmətinin nəzarət etməsi öz əksini tapıb. Ermənistan bunu yerinə yetirmək istəmir. Qərb də bunda maraqlı deyil. Ermənistan hesab edirdi ki, Ukraynada müharibənin şiddətlənməsi Rusiyanın bu məsələdə zəif duruma düşməsinə səbəb olacaq. Ancaq son vaxtlar Moskvanın bu məsələdə aktivləşməsi, xarici işlər naziri Sergey Lavrovun Paşinyanı 10 noyabr razılaşmasını sabotaj etməkdə ittiham etməsi vəziyyəti dəyişdi. Rusiya bununla göstərmək istəyir ki, başı Ukraynaya nə qədər qarışsa da Cənubi Qafqazı arxa plana atmaq fikrində deyil. Yəni region Rusiyanın maraq dairəsindədir. Ona görə də Putin Bakı səfəri zamanı sülh danışıqları ilə bağlı bəzi təkliflər verdi və qayıdandan sonra Paşinyana telefon açaraq onu bununla bağlı məlumatlandırdı. Reallıq odur ki, Rusiya 9-cu bəndlə bağlı Ermənistana təzyiq edir. Yəni Paşinyan razılaşmaya imza atdığı üçün bunu yerinə yetirməlidir. Ermənistan bunu istəmədiyindən məsələni başqa yöndə yozur. Guya Rusiya Azərbaycanı Zəngəzur dəhlizinin keçdiyi ərazini hərb yolu ilə tutmasına təhrik edir. Halbuki, Azərbaycanın belə bir fikiri yoxdur. Ən azından ona görə ki, belə bir addımı atsaq ciddi beynəlxalq təzyiqlə Rusiya yox, ölkəmiz üzləşəcək. Biz bunun hansı nəticələrə gətirib çıxaracağını bilmirik. Belə olan halda niyə biz Rusiyanın oyununa gedək ki? Özü də geosiyasi qarşıdurmanın kəskinləşdiyi indiki dövrdə. Azərbaycan müstəqillik əldə edəndən bəri hansısa böyük dövlətlər üçün platsdarm rolunda çıxış etməyib. Nəzərə alsaq ki, ərazilərimizi işğaldan azad etmişik, o zaman buna getmək bizim nəyimizə lazımdır? Zatən Qərb Azərbaycan Qarabağ məsələsində haqlıykən bizi haqsız duruma salmağa az cəhd etmədi. Bu baxımdan eməni propaqandasının bu yöndə iddialarını əsassız hesab edirəm”.
Vidadi ORDAHALLI
