Azərbaycan və Orta Asiya türk dövlətləri Əfqanıstanda birgə biznesi gücləndirir...
Fuad İbrahimov: “Belə mərkəzlər ticarət dövriyyəsini stimullaşdırır”
Avqustun 29-da Özbəkistan Respublikasının Termez şəhərində “Termez” Beynəlxalq Ticarət Mərkəzinin rəsmi açılış mərasimi olub. Mərkəzdə pərakəndə satış məntəqələri, otellər, o cümlədən Hilton Garden Inn, Akfa Medline tibb mərkəzi və digər obyektlər var.
Özbəkistanın Baş naziri Abdulla Aripov mərkəzin rəsmi açılışını edib. Açılışda Əfqanıstanın Baş naziri Əbdül Qani Barodar, Azərbaycanın Baş nazirinin müavini Şahin Mustafayev, Qırğızıstanın iqtisadiyyat və ticarət nazirinin müavini Nazarbek Malayev, Qazaxıstanın ticarət və inteqrasiya nazirinin müavini Kayrat Torebayev və başqaları iştirak edib. O cümlədən, onlar mərkəzlə tanış olublar. Termiz Beynəlxalq Ticarət Mərkəzi əlverişli biznes mühiti və logistika yaratmaq, inzibati prosedurları sadələşdirmək və sahibkarlara şərait yaratmaq üçün nəzərdə tutulub.
Bu, artıq Azərbaycanla bağlı növbəti faktdır. Azərbaycan Mərkəzi Asiya ölkələri ilə - Özbəkistan, Qırğızıstan, Qazaxıstan və Əfqanıstanla investisiya, iqtisadi-ticarət əməkdaşlığı sahəsində yeni addım atır. Bütün bunlar maraqlı proseslərdir. Yeri gəlmişkən, bu günlərdə Prezident İlham Əliyev Özbəkistana səfərində bildirdi ki, Azərbaycan Özəbəkistanla birlikdə üçüncü ölkələrlə əməkdaşlığı genişləndirmək imkanlarına malikdir.
“Azərbaycanın Orta Asiyanın hər bir dövləti ilə layihələri qarşılıqlı ticarəti, iqtisadi əlaqələri şaxələndirir”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Fuad İbrahimovun fikrincə, bununla bir daha sübut olunur ki, Azərbaycanın bu istiqamətdə siyasəti çoxşaxəli formatda həyata keçirilir: “Birincisi, Şərqə doğru siyasətin xüsusiyyəti ondan ibarətdir ki, yeni imkanlar pəncərəsi açılır. Bizim Qərb istiqamətində kifayət qədər layihələrimiz və onların icra mexanizmi var. O baxımdan biz bu layihələrlə Şərqlə Qərbi birləşdirə biləcək bir imkana malikik. Ancaq hazırda biz, eyni zamanda, eyni siyasəti Şərq istiqamətində həyata keçiririk. Bu gün Azərbaycan Türk Dövlətləri Təşkilatında təmsil olunur. Şanxay Əməkdaşlıq Təşkilatı ilə əməkdaşlıq edirik. Azərbaycan BRİCS-ə üzv olmaqla bağlı rəsmən müraciət edib. Yəni çoxşaxəli siyasət region ölkələrini bir-biri ilə sıx inteqrasiya edir. Azərbaycanın Orta Asiyanın hər bir dövləti ilə konkret razılaşmaları, layihələri qarşılıqlı ticarəti, iqtisadi əlaqələri şaxələndirir. Bu, qarşılıqlı investisiya layihələrinin stimullaşdırılması deməkdir. Aydın məsələdir ki, bugünkü dövrdə stabillik önəmli amildir. Bu əməkdaşlıq yeni iqtisadi imkanlar yaradacaq. Xəritəyə baxsaq görərik ki, Azərbaycanın ərazisi ən əlverişli mövqedə yerləşir. Bu, həm də Mərkəzi Asiya ölkələri üçün Avropaya bir qapı deməkdir. Onlar üçün də yeni imkanlar açılır. Başlıca amillərdən biri də Azərbaycanın maliyyə dayanıqlığıdır. Ona görə də bu ökələr bizimlə daha inamla iqtisadi-ticarət əlaqələri qururlar. Partniyorluq təklif edirlər. “Termez” Beynəlxalq Ticarət Mərkəzi bu baxımdan mühüm əhəmiyyət kəsb edir. Belə mərkəzlər ticarət dövriyyəsini stimullaşdırır. Ticarət isə daşımaları stimullaşdırır. Bu gün Azərbaycanda qeyri-neft sektorunun inkişafı prioritet əhəmiyyət kəsb edir. Nəzərə alsaq ki, Avropa ilə Çin arasında ticarət dövriyyəsinin həcmi 700 milyard dollardır, bu, Azərbaycan üzərindən daşımalar baxımından böyk imkanların yaranması deməkdir”.
Vidadi ORDAHALLI
