Psixoloqlar və həkimlər elə pasiyentlərin fotosunu paylaşır ki, insanlığa həqarətdir - ictimai narazılıq…
Aynur Əliyeva: “Pasiyent haqqında məlumatın ictimailəşməsi həkim etikasına, əxlaqına ziddir”
Son illər həyatımızın bir parçasına çevrilən sosial şəbəkələr həm də özünə auditoriya toplamaq baxımından çox əhəmiyyətlidir. Bir çox şirkətlər öz məhsullarını sosial şəbəkə vasitəsilə reklam edir, daha çox insana çatmasına nail olurlar.
Peşə sahibləri, həkimlər də bu üsuldan istifadə edərək bacarıqlarını paylaşırlar. Ancaq bu hal etik baxımdan düzgün sayılmır. Belə ki, psixoloq və həkimlər şəxsi sosial media hesablarında pasiyentlərin görüntülərini paylaşır. Onlar bunu işlərinin reklamı ilə əsaslandırır. Lakin bu həmin xəstələrin, onların yaxınlarının narazılığa səbəb olur. Həm də xəstə haqqında məlumatın üçüncü tərəfə ötürülməsi düzgün deyil.
“İcazəsiz nəinki pasiyentin görüntülərini paylaşmaq, hətta üzünü gizlədərək səsini də ictimailləşdirmək düzgün deyil”
Psixoloq Aynur Əliyeva “Bakı-Xəbər”ə açıqlamasında bildirdi ki, müayinə və ya seansın paylaşılması yolverilməzdir: “İcazəsiz nəinki pasiyentin görüntülərini paylaşmaq, hətta üzünü gizlədərək səsini də ictimailləşdirmək düzgün deyil. Psixoloq ilə ona müraciət edən şəxs arasındakı görüş mütləq gizli qalmalıdır. Psixoloq xəstənin məlumatlarını ictimailləşdirirsə, o bu hərəkəti ilə cinayət əməli etmiş olur. Nəzərə almaq lazımdır ki, insanlar psixoloqa ən məhrəm mövzularını danışır. O dərk edir ki, məsələni psixoloqa danışır. Problemi heç kimin bilməyini istəmir və psixoloqa danışır ki, məsələ sakit şəkildə həll olunsun.
Məxfiliyin qorunması vacib məsələlərdən biridir. Əks halda həmin insana çox böyük bir zərbə vurursan. Onların məhrəmiyyətinə müdaxilə olunduğu hallarda həmin psixoloqlar qanun qarşısında cavab verməlidirlər. İcazəsiz nəsə paylaşmaq dələduzluğun başqa bir formasıdır”.
Həmsöhbətimiz onu da əlavə etdi ki, xarici ölkələrdə pasiyent haqqında məlumatı yayan həkim və ya psixoloqlar həbs olunur: “Bu gün psixoloq, loqoped, diksiya mütəxəssisləri adlı peşələr çoxalıb. Bu peşə sahibləri şəxsin əvvəlki halı ilə indiki və sonrakı vəziyyəti sosial şəbəkədə müzakirə edir. Psixoloq pasiyentin psixoloji durumuna müzakirəyə çıxarır, loqoped uşağın danışığını fərqləndirir, diksiya mütəxəssisləri şəxsin əvvəlki danışığı ilə sonrakı nitqini müqayisə edir. Bu müqayisə nəyə lazımdır? Bu mütəxəssislər gördükləri işi reklam edirlər. Ancaq onlar bu əməli ilə qarşısındakı insanı aşağılayır. Sən əvvəl belə idin, indi mənim sayəmdə düzəldin. O görüntüləri görən şəxs də həmin adamı lağa qoyur. Beləliklə, o insanların psixoloji durumu daha da pis olur və insan içinə çıxmaq istəmirlər”.
Həmsöhbətimiz onu da əlavə etdi ki, həkim müayinələrinin, psixoloqun pasiyent məlumatlarını, cərrahiyyə əməliyyatının canlı yayımda göstərilməsi ucuz şou, reklam məqsədinə xidmət edir: “Pasiyent haqqında məlumatın ictimailəşməsi həkim etikasına, əxlaqına ziddir. Bunu ancaq öyrədici məqsədlərlə, kütləvi yox, məhdud qruplarda paylaşmaq olar. Bu da rezidentlər, tibb təhsili alanlar üçündür. Özünə hörmət edən mütəxəssis etdiyi işi icazəsiz ictimailəşdirməz. Bunu edənlərin çoxu reklam məqsədilə özünə pasiyent axtaranlardır. Hansı ki, onlar xarici ölkələrdə bir neçə ay kurs keçməklə uzman adı alırlar. Həkim öz fəaliyyətini reklam etməməlidir. Həkim ancaq akademik uğurlarını təqdim edə bilər”.
Günel CƏLİLOVA
