“Telegram”ın qlobal reytinqi yerindən sıçradı - Durovun məqsədli həbsi barədə şübhələr artır…
Azər Həsrət: “Bu və ya digər şəkildə Azərbaycana dostluq mesajları verən Pavel Durovun “göz dağı” məqsədilə saxlanıldığı versiyası da ola bilər”
“Telegram”ın populyarlığı messencerin yaradıcısı Pavel Durovun həbsindən sonra Fransa və ABŞ da daxil olmaqla bir sıra ölkələrdə artıb. Bu barədə Avropa nəşrləri məlumat verir.
Qeyd olunur ki, Fransada messencer “Sosial şəbəkələr” kateqoriyasında “İOS App Store”da yükləmələrin sayına görə birinci yerə yüksəlib və ümumilikdə proqramların reytinqində üçüncü olub. “Telegram” Amerika Tətbiq Mağazasında ikinci ən çox yüklənən sosial şəbəkə proqramı olub və dünyada İOS-da Telegram-ın endirilmə sayı 4% artıb.
Avqustun 26-da axşam saatlarında Durovun həbs müddətinin uzadıldığı məlum olub. Fransa mətbuatının məlumatına görə, sahibkar avqustun 28-i çərşənbə gününə qədər həbsdə qalacaq, elə bu tarixdə də onu azad ediblər.
Durov avqustun 24-də axşam Fransanın Le Burje hava limanında şəxsi təyyarəsindən enərkən saxlanılıb. İş adamı ölkəyə Azərbaycandan gəlib.
Fransa polisi bildirib ki, sahibkar “Telegram”da kiber və maliyyə cinayətləri ilə bağlı əməkdaşlıqdan imtina etməkdə ittiham olunur. Onlar əlavə ediblər ki, Durov milli kibercinayətkarlıq və fırıldaqçılıqla mübarizə idarələri tərəfindən araşdırılır.
Prokurorluq aydınlaşdırıb ki, Durov 12 cinayətdə ittiham olunan “adı açıqlanmayan şəxs”lə bağlı aparılan istintaq çərçivəsində dindirilib. İş iyulun 8-də açılıb.
Ola bilərmi ki, Durovun qısa müddətli həbsi məhz reytinqin qalxması üçün əvvəlcədən razılaşdırılmış qaydada həyata keçirilsin?
Media məsələləri üzrə ekspert, əməkdar jurnalist Azər Həsrət “Bakı-Xəbər”ə açıqlamasında bildirdi ki, hər şey haqqında hər cür ehtimal irəli sürmək olar: “Ancaq ehtimallarla məsələlər həll olmur. Bir az beynimizi işlətməli olsaq görərik ki, bu həbs “Teleqram”a diqqəti çəkməli idi, çəkdi də. Bunun planlı şəkildə edilməsi barədə mən fikir deməyə çətinlik çəkirəm. Böyük biznesi olan, xüsusən də ictimai rəyə təsiri olan qurumlar, şəxslər belə metodlardan istifadə edirlər. Onların arxasında olan böyük güclər də bu metodların tətbiqinə kömək edirlər. Amma bu dəfə də elə olub-olmamağı bəlli deyil. İkinci bir tərəfdən, Pavel Durovun Azərbaycandan getdikdən sonra həbs edilməsi faktını da unutmayaq. Bu faktın özü də başqa ehtimallar ətrafında fikir deməyə əsas verir. Bir növ Azərbaycanla yaxınlaşmaq istəyən, bu və ya digər şəkildə Azərbaycana dostluq mesajları verən Pavel Durovun “göz dağı” məqsədi ilə saxlanıldığı versiyası da ola bilər. Ancaq istənilən halda, bu saxlanılma “Teleqram”ın daha da populyarlaşmasına səbəb oldu. Hətta “Teleqram”dan populyar şəkildə istifadə etməyən ölkələrdə belə ona maraq yarandı. Artıq “Teleqram”a diqqət daha sürətlə irəli gedir. İstənilən halda, bir daha qeyd etmək istəyirəm ki, burada düşünülmüş, danışılmış bir məsələnin olması ehtimalı olsa belə, bunun üzərində də qətiyyətlə dura bilmirik. Çünki əlimizdə tutarlı faktlar yoxdur”.
Məhəmmədəli QƏRİBLİ
