Zəngəzur dəhlizi Ermənistan üçün ölüm-qalım məsələsi oldu...
“Yeni qlobal dünya nizamının formalaşması prosesi yaxındadır. Bu fonda Ermənistanın harada olacağı və ümumiyyətlə olub-olmayacağı məsələsi mühümdür”. Bu fikirlər “Sputnik Armenia” portalında yer alıb.
Qeyd oluunur ki, erməni informasiya sahəsində fəaliyyət göstərən antierməni informasiya resursları yenidən erməni cəmiyyətini intensiv şəkildə bir-birinə qarşı qoyur, insanları “qürurlu vətəndaşlar” və “Kremlin qulları” adı ilə iki yerə bölür: “Açığı, biz xarici təzyiqləri dəf etməyə hazırlaşmaq əvəzinə, yenə hansısa axmaq anti-Rusiya, anti-İran və digər anti... qıcolmalarda vuruşuruq. Belə ki, bəzi məlumatlara görə, Türkiyə-Azərbaycan tandemi 2024-cü ilin noyabrında Bakıda keçiriləcək COP29 dünya iqlim sammiti çərçivəsində Zəngəzur dəhlizini vacib gəlirli kommunikasiya kimi fəal şəkildə təşviq etməyi planlaşdırır. Bu iqtisadi layihəyə diqqətdə xarici oyunçuları maraqlandırmağa çalışır. Yəni rəsmi Bakı dünya iqtisadiyyatı üçün yeni logistik imkanların yaradılması məqsədilə Ermənistanın cənubundan dəhlizin iqtisadi məqsədəuyğunluğuna dünyanın diqqətini cəlb edir. Noyabrda da əsas dünya oyunçularını dəhlizlə bağlı maraqlandırmağa çalışacaq. Biz nə edirik?
Biz isə Ermənistan hakimiyyətinin süni şəkildə bir-birimizə bəslənən nifrətindən korlanmışıq, sadəcə olaraq, artıq xarici təhlükələri dərk etmirik, sadəcə olaraq, daxili gündəmdə cəmləşərək, bir növ informasiya üçbucağına daxil olan və reallıq kimi sırınan məsələni qəbullanmağa davam edirik. Bu sırınan da “velosiped + ucuz populizm + Zəngəzur dəhlizi” adlanır. Qarşı tərəf isə sistemli şəkildə antierməni planlarını həyata keçirməyə hazırlaşmağa davam edir. Belə ki, Türkiyə Böyük Millət Məclisinin sədri Numan Kurtulmuş sözün əsl mənasında bir-iki ay əvvəl demişdi: “Zəngəzur dəhlizi uğurla tamamlanarsa, bu, təkcə Azərbaycanı deyil, İran, Türkiyə və Gürcüstanı birləşdirəcək çox mühüm bir dəhliz olacaq. Orta Asiya ilə Zəngəzur vasitəsilə əlaqələr daha yaxşı hala gələcək”. Türkiyənin nəqliyyat və infrastruktur naziri Əbdülkadir Uraloğlu isə deyir: “Zəngəzur dəhlizinin açılması türk qurşağı boyunca dəmir yolu nəqliyyatının daşıma qabiliyyətini artıracaq”. Əslində, türklər dəhlizin iqtisadi məqsədəuyğunluğu ilə bağlı xarici aktorları maraqlandırmağa çalışır, amerikalılarla, iranlılarla, ruslarla, avropalılarla, çinlilərlə bu istiqamətdə işləyirlər. Biz isə siyasi şizofreniklər kimi başımızı KTMT-yə vururuq, sonra NATO-ya tərəf cumuruq, sonra ruslarla dava salıb iranlıları önə çəkən siyasət yürüdürük.
Biz müstəqilliyimiz və suverenliyimiz üçün fəryad edirik, lakin eyni zamanda heyrətamiz inadla suverenliyimizi və bölgədəki diplomatik qalalarımızı puç edirik, praktiki olaraq Türkiyə-Azərbaycan tandemi, Qərb və Şərq iradəsindən tamamilə asılı vəziyyətə düşürük. İnternetdə guya erməni soyadlı şərhçilərin oturub hamını və hər şeyi tənqid etdiyi, özlərini “böyük siyasətçi” kimi təsəvvür etdiyi bu anti-erməni sirkinə baxmaq sadəcə olaraq dözülməzdir. Üstəlik, fərqinə varmadan onlar ölkəmizi məhv etmək alətinə çevrilirlər. Biz sadəcə olaraq siyasətin “sevgi-nifrət” kimi anlayışlardan məhrum olan çox dərin bir məsələ olduğunu başa düşməkdən imtina edirik. İnformasiya səthində olanlar isə heç də həmişə real proseslərə uyğun gəlmir. Bunu başa düşmək çətindir? Adi “Kreml”ə qarşı bütün “mübarizələr”in kretinizmi bizə anlamağa imkan vermir ki, Qərblə Şərq heç vaxt bir-birilə əlaqəni itirməyib və sonda yeni geosiyasi təsir sərhədləri müəyyən etdikdən sonra razılaşmaya və “sülh bağlamağa” gələcəklər. Necə başa düşmək olar ki, qlobal geosiyasi mətbəxdə son ayların tendensiyasını nəzərə alsaq, yeni dünyanın formalaşmasına az qalıb? Amma harda olacağıq və ümumiyyətlə olub-olmayacağımız kimin Moskvaya və ya Vaşinqtona daha çox nifrət etməsindən deyil, Ermənistanı nə qədər sevdiyimizdən asılıdır. Erməni cəmiyyətində “hamının hamıya qarşı” mübarizəsi isə yaxşı heç nə vəd etmir”. Erməni hərbi ekspert Davit Camalyan baş verənlər fonunda bildirir: “Bu günlərdə Rusiyanın Zəngəzur dəhlizi məsələsini yenidən gündəmə gətirməsi və bunun Rusiyanın maraqlarına uyğun olması ilə bağlı yayılan fikirləri cəfəngiyat kimi qiymətləndirirəm”. Erməni hərbi ekspert iddia edib ki, bu, Qərbin qlobal maraqlarının bir epizodudur: “Getdikcə çoxqütblü hala gələn müasir dünyada Britaniya öz keçmiş imperiyasını yenidən yaratmağa çalışır və bunu keçmiş üsullarla etmir. Marionet hökumətlər yaradılır, ölkənin əsas resursları idarə olunur, kommunikasiyalar idarə olunur və ölkə müstəqil, beynəlxalq hüququn subyekti kimi görünsə də, əslində real hakimiyyətin daşıyıcıları və icraçıları birbaşa Britaniya mərkəzlərindən asılı olanlardır. Böyük Britaniyanın müasir dünyada maraqları arasında Balkanlar, Yaxın Şərq, Orta Şərq, hətta Hindistan və Çin də var”. Bu günlərdə isə Rusiya xarici işlər naziri Sergey Lavrov Rusiyanın "Birinci Kanal"ına açıqlamasında qeyd edib ki, Paşinyan Qarabağ üzrə üçtərəfli razılaşmaları sabotaj edir: “Təəssüf ki, Ermənistanın Zəngəzur bölgəsindən keçən kommunikasiyalara gəlincə, altında baş nazir Paşinyanın imzası duran sazişi sabotaj edən məhz Ermənistan rəhbərliyidir. Belə bir mövqenin məntiqinin nə olduğunu anlamaq çox çətindir. Amma mən əminəm ki, üçtərəfli görüşlər çərçivəsində, üçtərəfli sənədlərdə qoyulan təməl tam şəkildə aktual olaraq qalır”.
Samirə SƏFƏROVA
