Post-Qarabağ reallıqlarının dünyaya təqdimat üsulları zəngin bir siyahı təşkil edir...
Azərbaycan müharibə həqiqətlərini dünyaya çatdırmaq üçün müxtəlif vasitələrdən istifadə edir. Bura media vasitələri, diaspor xətti, səfirliklərimiz, xarici diplomatların və digər kateqoriyalı ixtisas sahiblərinin azad ərazilərə turist səfərlərinin təşkilini də aid edə bilərik.
Ölkəyə səfər edən əcnəbi dövlət başçılarının da həmin yerlərə səfərlərinin təşkili, azad ərazilərdə beynəlxalq tədbirlərin keçirilməsini də uğurlu təbliğat modeli saymaq olar.
"Böyük Qayıdış” siyasətinin davamı olaraq Azərbaycan vətəndaşlarının və xarici turistlərin işğaldan azad edilmiş ərazilərə səfərləri asanlaşdırılır.
Məlumata görə, indiyədək vətəndaşlar yalnız müəyyən istiqamətlərdə təşkil edilmiş avtobus reysləri və qrup şəklində turist səfərləri ilə işğaldan azad edilmiş ərazilərə səfər edirdilərsə, 27 dekabr 2023-cü il tarixindən etibarən Şuşa şəhərinə və Suqovuşan qəsəbəsinə fərdi minik avtomobilləri ilə də səfər edə bilirlər. Vətəndaşlar səfər üçün icazəni ötən ilin 25 dekabrdan başlayaraq “Yolumuz Qarabağa” portalı (www.yolumuzqarabaga.az) üzərindən əldə edə bilirlər.
Azərbaycan həqiqətlərinin həm də beynəlxalq ictimaiyyətə daha dolğun, daha dəqiq çatdırılması…
İyulun 22-də mədəniyyət paytaxtımız Şuşada növbəti dəfə tarixi bir gün yaşandı. Azərbaycan Respublikasının Medianın İnkişafı Agentliyinin (MEDİA) təşkilatçılığı ilə Şuşada Milli Mətbuat Günü münasibətilə “Mediada qlobal trendlər, yeni çağırışlar” mövzusunda Beynəlxalq Media Forumu keçirildi. Tədbirə ölkə jurnalistləri, Qarabağımızın - Şuşanın azad olunmasında iştirak edən bir qrup qazimizlə yanaşı, 20-dək ölkədən xarici media nümayəndələri və ekspertlər də qatıldı.
Tədbirin Şuşada keçirilməsi çox önəmlidir. Artıq ikinci ildir ki, Şuşada Beynəlxalq Forum keçirilir. Beynəlxalq media nümayəndələri Azərbaycana gəlir və bu tədbirə qatılırlar, Prezidentin mesajlarını da buradan alırlar. Təbii ki, Beynəlxalq forumun azad ərazidə, azad Şuşada keçirilməsinin də bəlli çalarları var. Yəni öz rəmzi mənası var. Bu o deməkdir ki, Azərbaycan həqiqətləri həm də beynəlxalq ictimaiyyətə daha dolğun, daha dəqiq çatdırılması baxımından da biz bunu müsbət dəyərləndirə bilərik.
Belə səfərlər xaricdə ölkəmiz əleyhinə aparılan dezinformasiyaların qarşısının alınmasına müsbət təsir göstərir
Məlum olduğu kimi, Diasporla İş üzrə Dövlət Komitəsi xaricdəki Azərbaycan icmalarının təmsilçilərinin, eləcə də əcnəbi tarixçi, jurnalist və müxtəlif sahələri təmsil edən ekspertlərin işğaldan azad olunan Qarabağa və ətraf rayonlara səfərlərini təşkil edib. İşğaldan azad olunan ərazilərə 2021-ci ildən cari il iyulun 1-dək ümumilikdə 1000 nəfərə yaxın şəxsin səfəri təşkil olunub.
İşğaldan azad edilən ərazilərə səfərlərin təşkilində məqsəd xaricdə yaşayan azərbaycanlıların və əcnəbilərin uzun illər işğal altında qalan ərazilərimizdə törədilən vandalizm aktlarına şahidlik etmələri, Azərbaycan dövlətinin həmin ərazilərdə apardığı quruculuq işləri ilə tanış olmalarıdır. Qarabağa səfərlərin təşkili həmin şəxslərin həqiqətlərlə yerində tanış olaraq xaricdə ölkəmiz əleyhinə aparılan dezinformasiyaların qarşının alınmasında fəal iştirak etmələrinə müsbət təsir göstərir.
Diaspor nümayəndələrinin və xaricilərin səfərləri əsasən Şuşa, Laçın, Füzuli, Cəbrayıl, Zəngilan və Ağdam rayonlarına olub. Xaricdə yaşayan azərbaycanlıların (xaricilərin iştirak etmədikləri) Şuşa şəhərinə səfərlərinin sayı isə 11 olub.
Eyni zamanda, Diasporla İş üzrə Dövlət Komitəsi Azərbaycanın tanınmış nəsillərinin xaricdə yaşayan təmsilçilərinin işğaldan azad olunmuş rayonlara fərdi səfərlərini də təşkil edib. Bunlara İrəvan xanının Almaniyada yaşayan nəticəsi Əmir Əli Sərdari İrəvaninin, Pənahəli xanın nəslindən olan və İspaniyada yaşayan Əkbərovlar ailəsinin səfərlərini misal göstərmək olar.
Məlumat üçün bildirək ki, xarici tarixçi və jurnalistlər işğaldan azad olunmuş ərazilərə səfərləri ilə bağlı beynəlxalq mətbuatda onlarla məqalə və rəy dərc etdiriblər.
Azərbaycan dövləti post-müharibə reallıqlarının dünya ictimaiyyətinə çatdırılması üçün mümkün olan bütün vasitələrdən istifadə edir
Azərbaycanda akkreditasiya olunmuş səfirlər, hərbi ateşələr, diplomatlar, Azərbaycana qeyri-rezident əsasda akkreditasiya olunmuş diplomatlar Ağdamda Qarabağ xanlığının banisi Pənahəli xanın sarayının yerləşdiyi “İmarət” kompleksində olublar. Azərbaycan Respublikası Prezidentinin köməkçisi Hikmət Hacıyev, Ağdam rayonunun işğaldan azad edilmiş hissəsində Azərbaycan Respublikası Prezidentinin xüsusi nümayəndəsi Emin Hüseynov və məşhur fotoqraf Reza Deqqəti diplomatlara ermənilərin işğal zamanı Pənahəli xanın, İbrahim xanın, Mehdiqulu xanın türbələrini, Xan qızı Xurşidbanu Natəvanın məzarını dağıtdıqları barədə məlumat verib. Diplomatlara ermənilərin işğal dövründə məsciddə törətdikləri vandallıq barədə məlumatlandırılıb. Bütün bunlar bir daha göstərir ki, Azərbaycan dövləti post-müharibə reallıqlarının dünya ictimaiyyətinə çatdırılması üçün mümkün olan bütün vasitələrdən istifadə edir.
Məhəmmədəli QƏRİBLİ
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
