Makron Durovun saxlanmasının “siyasi” qərar olmadığını iddia etdi, fransız siyasətçi isə prezidenti ikiüzlü adlandırdı...
Fransa prezidenti Emmanuel Makron Telegram-ın yaradıcısı Pavel Durovun saxlanılmasına ilk dəfə münasibət bildirib. Macron X sosial şəbəkədəki səhifəsində Durovun “davam edən istintaq çərçivəsində” saxlanıldığını və bunun “siyasi qərar” olmadığını iddia edib.
Makron Pavel Durovun saxlanması ilə bağlı yanlış məlumatlar gördüyünü deyib. Bildirib ki, Fransa ifadə və ünsiyyət azadlığına, innovasiyalara və sahibkarlıq ruhuna dərindən sadiqdir və belə də qalacaq.
"Qanunla idarə olunan ölkədə azadlıqlar, vətəndaşları qorumaq və onların əsas hüquqlarına hörmət etmək üçün həm sosial mediada, həm də real həyatda hüquqi çərçivə ilə tənzimlənir. Qanunun tətbiqi tam müstəqil məhkəmə sisteminin işidir.
Telegram rəhbərinin Fransa ərazisində saxlanılması davam edən hüquqi araşdırma çərçivəsində baş tutub. Bu, şübhəsiz ki, siyasi qərar deyil. Məsələ ilə bağlı qərar vermək səlahiyyəti hakimlərdədir" - Makron deyib
Fransanın sağçı "Ayağa qalx, Fransa" partiyasının rəhbəri Nikola Düpon-Enyan isə Makronun Durovun həbsi ilə bağlı açıqlamasını ikiüzlülük adlandırıb.
"Bu nə ikiüzlülükdür! Makron seçiləndən bəri ictimai azadlıqlara hücum edir və Avropa İttifaqı ilə birlikdə ruhən azad olanların səsini boğmaq istəyir" - deyən partiya rəhbəri X hesabındakı paylaşımının sonunda Makrona qarşı müqavimət gəstərməyə çağırıb.
Maraqlıdır ki, Avropa Komissiyası indiyə kimi bu mövzuda heç bir açıqlama verməyib, sahibkarın saxlanmasını Parisin şəxsi işi adlandırıb.
TAHİR
