Anti-Azərbaycan kampaniya Ukraynanı bürüyüb, bizim diasporun səsi çıxmır...
Elşad İbrahimov: “Ukrayna dövlətində də əli qana batmış, Azərbaycan xalqına qarşı genosiddə iştirak etmiş Ermənistan dövlət rəhbərlərinin qarşılanması olub...”
Bəlli olduğu kimi, avqustun 18-də Rusiya Prezidenti Vladimir Putinin ölkəmizə səfərinin yekunları və müzakirə olunan məsələlər dünyanın diqqət mərkəzindədir. Bəzilərində obyektiv yanaşma olsa da, bir çoxlarında qərəzli və ikili standartlardan çıxış edilən hallara rast gəlinir.
Məsələn, Ukraynanın sosial seqmentində, xüsusilə "Facebook"da anti-Azərbaycan isterika açıq özünü büruzə verib. Səbəb də sadəcə gülüş və hiddət doğurur. Səfər zamanı SOCAR və “Qazprom” arasında planlı strateji tərəfdaşlıq razılaşmasının əldə olunması Ukrayna mediası və sosial şəbəkələrində Azərbaycana və SOCAR-a qarşı çirkin kampaniyanın başlanmasına gətirib çıxarıb. Bəzi ekspertlər qərəzli formada ölkəmizə qarşı fikirlər səsləndirib, hədyanlar yağdırıblar.
Əvvəla ondan başlayaq ki, Azərbaycan Ukraynada müharibə başlayandan bəri bu ölkəyə dəstək nümayiş etdirib. Onun ərazi bütövlüyünü ən müxtəlif tribunalarda dəstəkləyib. Bundan əlavə, Ukraynanın müharibədən əziyyət çəkən bölgələrinə hərtərəfli yardımlar göstərib. Yəni indiyədək heç vaxt Ukraynaya zərbə olacaq hansısa işə qol qoymayıb. Ukraynalı ekspertlər və erməni təsiri altında olan media, müxtəlif ranqlı mütəxəssislər isə Azərbaycanın Ukraynaya göstərdiyi yardımlar, SOCAR-ın humanitar fəaliyyəti və s. haqda danışmayıblar.
Çox maraqlıdır ki, baş verən bu xoşagəlməz proseslərə Ukraynadakı diasporumuzun aktiv reaksiyasını müşahidə etmirik. Bu səbəbdən də onların məsələyə münasibətini öyrənmək qərarına gəldik.
Ukrayna Azərbaycanlıları Birləşmiş Diasporunun sədr müavini, Ukrayna Azərbaycanlılar Radasının icraçı direktoru Elşad İbrahimov “Bakı-Xəbər”ə açıqlamasında bildirdi ki, son günlər bəzi dırnaqarası blogerlərin bir-iki sosial şəbəkədə gedən yazıları Azərbaycanda çox marağa səbəb olub: “Amma bunu belə qabartmağa ehtiyac yoxdur. Bu, Ukrayna xalqının, hakimiyyətinin fikri deyil. Sadəcə bir-iki blogerin öz səhifəsində yürütdüyü fikirdi. Bu da normaldır. Hər bir insanın öz fikri ola bilər. Azərbaycan diasporaları olaraq da bunu dərhal nəzarətə götürdük və faktlarla, Azərbaycanın indiyə kimi Ukraynaya etdiyi həm maddi, həm mənəvi köməyi onlara anlatdıq, yadlarına saldıq. Bu da Ukrayna ictimaiyyəti və siyasiləri tərəfindən böyük dəstək gördü. Bu fikirlər bəzi müstəqil insanlara aiddir və anlaşılandır. Çünki onların çoxu siyasətçi deyil, emosiyalardan qaynaqlanıb hər hansı bir yazını qoyurlar. Belə ki, Azərbaycanın coğrafi mövqeyindən azca anlayışı olan adam belə bir şərhi yazmazdı, sosial şəbəkələrdə bu mövzuya toxunmazdı. Çünki bizim Ukrayna, dünyanın bütün dövlətləri kimi öz siyasi dəsti-xəttimiz var. Biz hər hansı bir addım atdıqda heç bir dövlət qarşısında öhdəliyimizin olmadığı məlumdur. Müstəqil dövlətik, Prezidentimiz özü bilir millətimizin xeyri üçün hansı addımları atmaq lazımdır. Əlbəttə, qıcıqlandıran məqamlar o oldu ki, Rusiyanın prezidenti Azərbaycana gəldi və xoş qarşılandı. Yuxarı siyasi dairələrdə dövlət səviyyəsində buna heç bir reaksiya verilmədi. Çünki bu normal bir haldır. Rusiya bizim qonşumuzdu, onunla 300 km - dən böyük sərhədimiz var. Onu başqa cür qarşılamaq mümkün deyil. Nəzərə alsaq ki, bizim də 30 ilə yaxın müharibə şəraitində olduğumuz dövrdə bundan da artıq qarşılanmalar olub. Ukrayna dövlətində də əli qana batmış, Azərbaycan xalqına qarşı genosiddə iştirak etmiş Ermənistan dövlət rəhbərlərinin qarşılanması olub. Ukrayna da bizə uyğun siyasətini qurmalı deyil və biz də bunu anlamışıq, normal da qəbul etmişik. Bugünkü gündə hansısa bloger bu barədə emosiyalara qapanıb nəsə fikir bildirirsə, bu onun öz hüququdur. Digər tərəfdən də, müharibə başlayan dövrdə biz izah etdik, bir çox müsahibələrimiz də oldu. Azərbaycan Ukraynanın ərazi bütövlüyünü, müstəqiliyini tanıyıb, tanıyır da. Azərbaycan xalqı ilk günlərdən Ukrayna xalqına öz sevgisini, hörmətini bildirib”.
Məhəmmədəli QƏRİBLİ
