Azərbaycan Almaniyadan olan AŞPA üzvü barədə ən doğru qərarı verdi...
Yeganə Hacıyeva: “Azərbaycana qarşı qəbul edilən qərəzli qərarın təşəbbüskarlarının adlarının “qara siyahıya” salınması çox məntiqli görünür”
Azərbaycan Xarici İşlər Nazirliyinin mətbuat xidməti idarəsinin rəisi Ayxan Hacızadə Avropa İttifaqının (Aİ) xarici siyasət və təhlükəsizlik məsələləri üzrə mətbuat katibi Peter Stano və Almaniya Parlamentinin üzvü Frank Şvabenin ölkəmiz əleyhinə səsləndirdiyi fikirlərə dair medianın suallarına cavabında deyib ki, bir sıra korrupsiya hallarında, qaranlıq biznes əlaqələrində adı hallanan Frank Şvabenin Azərbaycan və ölkə rəhbərliyi barədə səsləndirdiyi fikirlər bu insanın nə dərəcədə qərəzli, saxta və ikiüzlü siyasətçi olduğunu nümayiş etdirir.
Ayxan Hacızadə bildirib ki, siyasi sabitlik, iqtisadi inkişaf və tərəqqi göstəricilərinə görə lider ölkələrdən olan Azərbaycanın siyasi rəhbərliyinə qarşı səslənən fikirlər ilk növbədə ölkənin uğurlarına qarşı qərəz kimi dəyərləndirilir. O bildirib ki, 30 ilə yaxın işğal altında olan Azərbaycan torpaqlarının azad olunması istiqamətində atılan addımlar və aparılan müstəqil siyasət Şvabe kimi şəxslərin məkrli niyyətləri ilə üst-üstə düşmür, onları narahat edir:
“Frank Şvabeyə yaxşı məlumdur ki, Avropa Şurasının Parlament Assambleyasının (AŞPA) müşahidəçilərinin Milli Məclisə seçkiləri müşahidə etməyə dəvət olunmamasının yeganə səbəbi Almaniya rəsmiləri tərəfindən ölkəmizə verilən siyasi səviyyədə vədlərə baxmayaraq, Azərbaycan nümayəndə heyətinin mandatının hələ də bərpa edilməməsidir. Azərbaycan-Rusiya münasibətlərindən narahatlıq ifadə edən Şvabenin Almaniyada və AŞPA-da Rusiya ilə əməkdaşlıqda olan, hətta bu gün Rusiyanın “Qazprom” şirkəti ilə yaxından əməkdaşlıq edən şəxslərdən danışması yerinə düşərdi. Bununla yanaşı, Azərbaycanın BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) sədrliyinin bu prosesə aidiyyəti olmayan siyasi motivlərlə şərtləndirilməsi, ölkəmizin öhdəliyi daxil olmaqla, iqlim dəyişikliyi ilə mübarizənin mahiyyətinə zidd fikirlər səsləndirilməsi Şvabenin Azərbaycana qarşı qərəzini növbəti dəfə nümayiş etdirir. Şvabenin COP29 çərçivəsində ölkəmizə səfər etmək niyyətinə gəldikdə, qeyd edək ki, AŞPA-da Azərbaycan nümayəndə heyəti əleyhinə səs vermiş şəxslər “arzuolunmaz şəxslər” siyahısına salınıb. AŞPA-da nümayəndə heyətimizin mandatı bərpa olunmayanədək sözügedən şəxslər Azərbaycana gəldikləri təqdirdə, onlara ölkə ərazisinə daxil olmağa icazə verilməyəcək. Azərbaycan beynəlxalq səviyyədə üzərinə götürdüyü öhdəliklərə sadiqdir, bu öhdəlikləri yaxşı anlayır. Bununla yanaşı, bu öhdəliklərin yalnız birtərəfli və ikili standartlar əsasında tətbiq edilməsinə, onlardan sui-istifadə edilərək ölkəmizə qarşı qərəzli yanaşmaların tətbiq edilməsinə yol verilməyəcəyini bir daha diqqətə çatdırırıq”.
Xatırladaq ki, Almaniya Parlamentinin üzvü Frank Şvabe 23 avqust tarixində dərc edilmiş müsahibəsi zamanı Azərbaycanın Avropa Şurasında üzvlükdə maraqlı olmadığını bildirərək, Bakını Avropa Şurasının təbliğ etdiyi dəyərlərə sadiq olmamaqda ittiham edib, Avropa Şurasının Parlament Assambleyasının Milli Məclisə seçkilərə müşahidəçi kimi dəvət olunmamasına irad bildirib, ölkə rəhbərliyinə qarşı təhqiramiz ifadələr səsləndirib.
Azərbaycanın bu tip adamları “arzuolunmaz şəxs” elan etməsi onların davranışına nə dərəcəcədə adekvatdır?
Politoloq Yeganə Hacıyeva “Bakı-Xəbər”ə açıqlamasında bildirdi ki, AŞPA-da 46 ölkənin nümayəndə heyəti səsvermə hüququna malikdir: “Hər bir ölkə öz əhalisinin sayına və üzvlük ödəyiciləri sırasında payına görə AŞPA-da nümayəndə yeri qazanır. Nümayəndəlik sayı minimum 2, maksimum 18 aralığında dəyişir. Avropa Şurası Parlament Assambleyasında Azərbaycanın nümayəndə heyətinin səlahiyyətlərinin məhdudlaşdırılması üzrə səsvermənin keçirlməsi AŞPA-nın daxili nizamnaməsinə ziddir. Belə ki, 2019-cu ildə Avropa Şurasının Parlament Assambleyası özünün sanksiya mexanizmini məhdudlaşdıran qətnamə qəbul edib. “Parlament Assambleyasının səlahiyyətləri və səsvermə ilə bağlı qərar qəbuletmə prosesinin təkmilləşdirilməsi haqqında” başlığı ilə təqdim edilən və 12 bənddən ibarət olan reqlament qaydaları 2019-cu ilin yay sessiyasında təsdiq edilib. Reqlamentə edilən bu yeni dəyişikliklər “Parlament Assambleyasının səlahiyyətləri və səsvermə ilə bağlı qərar qəbuletmə prosesinin gücləndirilməsi” adlı qətnamənin mətnində təsdiq edilib. Bunun ardınca Avropa Şurasının Nazirlər Komitəsi hər hansı nümayəndə heyətinin səsvermə hüququndan məhrum edilməsi imkanına qadağa qoyan qərar qəbul edib. Qətnamənin 8 və 10-cu bəndləri bütün üzv dövlətlər üçün Avropa Şurasının həm Nazirlər Komitəsində, həm də Parlament Assambleyasında bərabər iştirak hüququna malik olmağı, assambleyada və onun iclasında səs verməsini, danışmaq və təmsil olunmaq hüququnu toxunulmaz edir.
“Parlament Assambleyasının səlahiyyətləri və səsvermə ilə bağlı qərar qəbuletmə prosesinin təkmilləşdirilməsi haqqında” sənəd, eyni zamanda, milli nümayəndə heyətlərinin AŞPA-da səs vermək, danışmaq və təmsil etmək hüququndan məhrum edilməklə cəzalandırılmasını qadağan edir.
Azərbaycana qarşı qəbul edilən qərəzli qərarın təşəbbüskarlarının adlarının “qara siyahıya” salınması çox məntiqli görünür. Ancaq təcrübə göstərir ki, bu tam çıxış yolu deyil. Çünki AŞPA yalnız bu iki şəxsdən ibarət deyil. Biz müdafiə konsepsiyamızı bir qədər güclü işləməliyik. Azərbaycan milli maraqlarımız naminə bütün beynəlxalq platformalarda təmsil olunmalıdır. Bunun üçün də təbii əsaslarda lobbiçilik fəaliyyətimizi daha da gücləndirməliyik”.
Məhəmmədəli QƏRİBLİ
