125 mandat uğrunda 991 namizəd "vuruşacaq" - hər yerə 8 iddiaçı...
Sentyabrın 1-də keçirilən növbədənkənar parlament seçkiləri ilə bağlı çap olunan bülletenlərdə 991 namizədin adı qeyd edilib. Bununla bağlı Mərkəzi Seçki Komissiyası (MSK) sədrinin müavini Rövzət Qasımov jurnalistlərə açıqlamasında deyib.
O qeyd edib ki, artıq seçki prosesinin son mərhələsidir: "Komissiyanın qərarı ilə 6516567 seçki bülleteni çap olunub. Bülletenlərə 991 namizədin adı qeyd edilib. Bu o deməkdir ki, sentyabrın 1-də keçiriləcək seçki prosesində geniş seçim imkanı var".
Maraqlıdır, 125 seçki dairəsi üzrə 991 namizədin seçkilərdə mübarizə aparması seçkidə alternativliyin təmin olunması baxımından necə rol oynayacaq? Seçki dairələri arasında lazımi səviyyədə rəqabət olacaqmı?
Mübariz Göyüşlü: “Elə dairələr var ki, orda çox ciddi şəkildə namizədlərin seçki təbliğatı apardığını müşahidə edirik”
Müasir İnkişaf Birliyinin sədri, Yeni Media Qrupun rəhbəri, siyasi şərhçi Mübariz Göyüşlü “Bakı-Xəbər”ə açıqlamasında bildirdi ki, Mərkəzi Seçki Komissiyası və diarə seçki komissiyası prosesin təşkili üçün çoxlu işlər həyata keçirir: “Namizədlərin irəli sürülməsi, qeydiyyatı, təbliğat-təşviqat prosesini müşahidə edirik. Elə dairələr var ki, orda çox ciddi şəkildə namizədlərin seçki təbliğatı apardığını müşahidə edirik”.
Həmsöhbətimiz onu da əlavə etdi ki, ötən seçkilərdən fərqli olaraq, bu il məlum proses çox sakit mühit və atmosferdə aparılır.
Tural İsmayılov: “125 seçki dairəsi üzrə 991 namizədin seçkilərdə mübariz aparması alternativliyin yüksək formada təmin olunmasını göstərir”
Siyasi şərhçi Tural İsmayılov “Bakı-Xəbər”ə şərhində qeyd etdi ki, 1 sentyabr tarixində keçiriləcək növbədənkənar parlament seçkiləri tarixi bir şəraitdə həyata keçirilir. Azərbaycan öz torpaqlarını işğaldan azad edən ölkə olaraq seçki keçirir. Bu, demokratiyanın növbəti təntənəsindir: “Məlumat üçün deyim ki, növbədənkənar parlament seçkilərinə ölkəmizdə böyük maraq var. Sosial media və digər platformalardan da görünür ki, xeyli namizəd qeydə alınıb. Qeydə alınan namizədlər çox uğurlu formada təbliğat-təşviqat kampaniyası aparır. 125 seçki dairəsi üzrə 991 namizədin seçkilərdə mübarizə aparması alternativliyin yüksək formada təmin olunmasını göstərir. Nəzərə almaq lazımdır ki, bütün dairələrdə maraqlı rəqiblər var. Bütün siyasi partiyalar, bitərəf namizədlər, ictimai siyasi şəxslər məlum prosesdə aktiv şəkildə iştirak edir. Onlar təbliğat-təşviqat kampaniyasını yüksək səviyyədə, qanunvericiliyə uyğun olaraq aparır. Namizədlər MSK-nın ayırdığı ərazilərdə dairələr üzrə öz seçiciləri ilə görüşür. Millət vəkilliyinə namizədlər öz platformalarını seçicilərinə təqdim edir. İnsanlar da onların dairəsindən namizəd olan şəxsi yaxından görüb tanıyır və görüşlərdə istədikləri sualı sərbəst şəkildə ünvanlaya bilirlər. Həmçinin, görüş zamanı seçicilər dairə üzrə müəyyən məsələləri qaldırıb, namizədlərlə aktiv dialoq şəklində olurlar. Hesab edirəm ki, növbədənkənar parlament seçkilərindən sonra qalib ölkənin parlamenti yenidən təşkil olunacaq. Qalib millət vəkilləri sonrakı dövr ərzində də COP29 və digər məsələlərlə bağlı ölkəmizi layiqli şəkildə təmsil edəcək”.
Günel CƏLİLOVA
