Azərbaycanda qida təhlükəsizliyi ilə bağlı yeni istiqamətdə mübarizə başladı...
Eyyub Hüseynov: “İstirahət mərkəzləri COP29 ərəfəsində və digər zamanlarda da qida təhlükəsizliyi ilə yanaşı, qiymət siyasətini də qaydaya salmalıdır”
COP29 konfransına hazırlıq işləri çərçivəsində COP29 Azərbaycan Əməliyyat Şirkəti yerli otellərin təhlükəsizlik və dayanıqlılıq səriştələrinin artırılması istiqamətində təlim proqramının icrasına başlayıb.
Qeyd edək ki, təlim proqramı beynəlxalq qida təhlükəsizliyi tələb və qaydalarının baza prinsipləri əsasında Azərbaycana məxsus yerli xüsusiyyətlər nəzərə alınmaqla tərtib edilib və Ətraf Mühitin Sağlamlığı üzrə Lisenziyalı İnstitut (CIEH - Chartered Institute of Environmental Health) tərəfindən təsdiqlənib. Proqramın əsas məqsədi COP29 konfransı zamanı dünyanın müxtəlif ölkələrindən Azərbaycana səfər edəcək çoxsaylı ziyarətçilərin ən yüksək qida təhlükəsizliyi standartlarına uyğun müstəsna iaşə və qonaqlama təcrübəsini təmin etməkdir. Qida tədarükçüləri, otel, restoran və ictimai iaşə obyektlərinin əməkdaşları üçün nəzərdə tutulan bu proqram çərçivəsində ilk təlimlər avqust ayı ərzində təşkil edilib.
Danılmaz faktdır ki, zamanla iaşə obyektlərində təqdim edilən təamlarla bağlı xoş olmayan məlumatlar yayılır, hətta zəhərlənmə faktları belə qeydə alınıb. Maraqlıdır, bu cür təlimlər tez-tez qeydə alınan kütləvi zəhərlənmələrin qarşısını ala biləcəkmi? Tək COP29 zamanı deyil, bütün zamanlarda da kütləvi iaşə obyektlərində, restoran və digər məkanlarda qida təhlükəsizliyinin daha yüksək səviyyədə təmin olunmasında necə rol oynayacaq?
“COP29 qidanın təhlükəsizliyinə yönəlmiş doğru fürsətdir, aparılan monitorinqlər, görülən işlər qidanın təhlükəsizliyinin təmin olunmasına müsbət təsir göstərəcək”
Azad İstehlakçılar Birliyinin (AİB) sədri Eyyub Hüseynov “Bakı-Xəbər”ə açıqlamasında bildirdi ki, dünyanın bir çox ölkəsindən fərqli olaraq, Azərbaycanda qonağa xüsusi hörmət, xüsusi hazırlıq olur: “Xatırladım ki, ötən illərdə hər zaman ən gözəl süfrə, yataq dəsti, evdə ən yaxşı nə varsa qonaq üçün saxlanılırdı. Bu ənənə günü bu gün də ölkəmizdə yaşayır”.
AİB sədri hesab edir ki, COP 29 qidanın təhlükəsizliyinə yönəlmiş doğru fürsətdir. Ona görə fürsətdir ki, aparılan monitorinqlər, görülən işlər qidanın təhlükəsizliyinin təmin olunmasına müsbət təsir göstərəcək: “Bu səbəbdən də hesab edirəm, elə iş görülməlidir ki, davamlı olsun. Qidanın təhlükəsizlik işləri tək Bakıda deyil, regionlarda da aparılmalıdır. Zənnimcə, COP29 ərəfəsində ölkəmizə gələn xarici qonaqlar rayonlara da səfər edəcək. Burda Azərbaycan Qida Təhlükəsizliyi Agentliyinin böyük rolu var. Hesab edirəm ki, AQTA bu fürsətdən istifadə edib, agentliyin əsasnaməsinə dəyişiklik etməlidir. Agentlik çevik yoxlama mexanizminə malik olmalıdır. Təhlükəli hansısa qida ilə bağlı zəng edilərsə dövlət orqanı heç bir bürokratik yoxlama aparmadan vəziyyəti araşdırmalıdır. Təklif edirəm ki, qidanın təhlükəsizliyinin təmin olunması üçün xüsusi sənəd yaradılsın. Əvvəllər bu tip təmiz məhsula xüsusi sertifikat verilirdi. Onu da deyim ki, xarici qonaqlar da hər hansı bir qida və ya məhsul alarkən onun sertifikatını tələb edir, ancaq belə bir sənəd yoxdur”.
E.Hüseynov onu da əlavə etdi ki, COP29-la bağlı hazırlıqlarla əməkdaşlıq etdiyi beynəlxalq istehlakçı təşkilat maraqlanır: “Mən isə, öz növbəmdə doğma, gözəl Azərbaycanımızı tərifləyirəm ki, ölkəmizdə təhlükəli heç bir şey yoxdur, böyük qonaqpərvərlik göstəriləcək. Sizin qəzetiniz vasitəsilə biznes qurumlarına müraciət edirəm ki, bu günlərdə xüsusi diqqətli olsunlar. Dükanlarda olan soyuducu lazımi rejimdə işləsin, elektrikə qənaət olaraq gecələr söndürməsinlər. Məlumdur ki, ölkəmizə gələcək qonaqlar ödənişi kartla edəcək. Market sahibləri üçün də təlimlər keçirilməlidir. Danılmaz faktdır ki, market sahibləri nağdsız ödənişdə maraqlı deyil, rəfdə bir, kassada başqa qiymət olur. Bu kimi hallara son qoyulmalıdır. Bununla yanaşı, bir çaynik çayı 50-100 manata təklif edənlər də məsuliyyətə cəlb olunmalıdır. Bölgələrdə fəaliyyət göstərən istirahət mərkəzlərində də tələb təklifi üstələmir. Istirahət mərkəzləri COP 29 ərəfəsində və digər zamanlarda da qida təhlükəsizliyi ilə yanaşı, qiymət siyasətini də qaydaya salmalıdır”.
Günel CƏLİLOVA
