BBC siyasi məhbusların sayını 300-ə qaldırdı - Azərbaycan hüquqçuları etiraz edir...
Səadət Bənəniyarlı: ”Həbsində siyasi motivlərin olduğu qənaətinə gəldiyimiz məhkumların sayı 300-dən xeyli azdır”
Dünyanın nüfuzlu BBC kanalının saytında bəzi hüquq müdafiəçilərinə istinadən yazırlar ki, son aylar Azərbaycanda böyük repressiyalar həyata keçirilir.
Onların sözlərinə görə, hazırda ölkədə 300-dən çox siyasi məhbus var. Materialda qeyd edilir ki, keçən ilin sonlarında maliyyə cinayətlərində ittiham olunaraq onlarla jurnalist həbsxanaya düşüb:
“Onların həbs müddəti bir neçə dəfə uzadılıb. Ümid var idi ki, bəlkə də Qərblə hansısa pərdəarxası danışıqlar gedir və onlar BMT-nin İqlim Dəyişikliyi Sammiti (COP29) ərəfəsində azad oluna bilərlər”.
Çox maraqlıdır, Azərbaycanda 300-dən çox siyasi məhbusun olması ilə bağlı məlumat nə dərəcədə doğrudur? BBC-nin təqdim etdiyi bu say reallığı əks etdirirmi?
Hüquq müdafiəçisi Səadət Bənəniyarlı “Bakı-Xəbər”ə açıqlamasında bildirdi ki, bu çox geniş mövzudur və məsələyə birmənalı münasibət yoxdur: “Belə siyahıları hazırlayan müxtəlif qrup hüquq müdafiəçiləri var. Bizim də özümüzün hazırladığımız siyahı var. Həbsində siyasi motivlərin olduğu qənaətinə gəldiyimiz məhkumların sayı 300-dən xeyli azdır. Mən həmin siyahını görmüşəm. Çox maraqlıdır ki, həmin siyahıda cəzası bitən, məhkəməsi hələ olmayan adamların adı var. Bu düzgün deyil. Biz hələ bilmirik kj, təqsirləndirilən şəxslərlə bağlı məhkəmə hansı qərarı verəcək. Bəlkə həmin adamların cinayət etmələri sübuta yetmədi və onları azad etdilər. Çox təəssüflər olsun ki, həmin siyahılarda ümumiyyətlə siyasi kriteriyalara uyğun olmayan şəxslərin də adlarına rast gəlirik. Bu siyahını təqdim edənlərin sırasında Leyla Yunus da var. Onlara bu məlumatları hazırda Azərbaycanda yaşayan bəzi hüquq müdafiəçiləri təqdim edir. Bizim təmsil olunduğumuz Monitorinq Qrupu var ki, sırf bu işlərlə məşğuldur. Həmin qrupda mən, Novella Cəfəroğlu, Arzu Abdullayeva kimi tanınmış hüquq müdafiəçiləri var. Biz ümumi monitorinqin nəticələrini dövlət qurumları ilə müzakirə edirik və siyasi kriteriyalara uyğun olan adamların azad edilməsinə çalışırıq”.
Apardığımız araşdırmadan sonra məlum oldu ki, siyahını Sülh və Demokratiya İnstitutunun direktoru Leyla Yunus və Siyasi Məhbusların Monitorinqi Mərkəzinin rəhbəri Elşən Həsənov hazırlayıb. Siyasi Məhbusların Monitorinqi Mərkəzinin rəhbəri Elşən Həsənov bildirib ki, yeni siyahıda siyasi təqiblə həbs edilən Azərbaycan Xalq Cəbhəsi Partiyasının üzvlərinin, jurnalistlərin, blogerlərin, ictimai fəalların və dindarların sayı artıb.
Bu il aprelin 3-də ABŞ Dövlət katibi Entoni Bilinken ilə Prezident İlham Əliyev arasında telefon danışığı zamanı Dövlət katibi Azərbaycanın insan hüquqları və əsas azadlıqlarla bağlı beynəlxalq öhdəliklərinə əməl etməsinin vacibliyini bir daha vurğulayıb və haqsız yerə həbs edilənlərin azad edilməsinə çağırıb.
Aprelin 4-də isə Azərbaycan Prezidentinin Mətbuat Xidməti bildirib ki, Prezident İlham Əliyev insan hüquqları məsələsini bəhanə edərək Azərbaycanın daxili işlərinə müdaxilə cəhdlərinin tamamilə qəbuledilməz olduğunu deyib:
“Bir sıra Qərb ölkələrinin bu məsələ ilə bağlı ikili standartlara əsaslanan qərəzli açıqlamalarını qəbul etmirik. Bu xüsusda dövlətimizin başçısı Dövlət katibi Entoni Blinkenə Ermənistanda müxalifət nümayəndələrinin həbsi, hətta həbs müddətində ölüm hallarının olması, insan hüquqlarının pozulması hallarını xatırladıb və bu kontekstdə Qərb ölkələrinin səssizliyinin başadüşülən olmadığını, bu kimi faktların məhz ikili standartların bariz nümunəsi olduğunu qeyd edib”.
Ümumilikdə isə, rəsmi Bakı siyasi məhbus kimi tanınan şəxslərlə bağlı beynəlxalq tənqidləri qəbul etmir və qərəzli sayır. Hökumət rəsmiləri Azərbaycanda insanların siyasi baxışlarına görə təqib edilmədiyini və bütün fundamental hüquqların tam təmin edildiyini bəyan edir.
Məhəmmədəli QƏRİBLİ
