Bölgələrdə bahalı internet almayanlar 130 manat cərimələnir?
Azərbaycanda internetin qiyməti 40 faiz artıb. Ötən ayın sonunda ölkənin internet xidməti bazarında böyük paya malik olan "Aztelekom" MMC və "Baktelekom" MMC birgə yaydığı məlumatda internetin qiymətinin 40 faiz artacağını bəyan etmişdilər.
Bildirilirdi ki, müştərilərin yüksəksürətli genişzolaqlı internetə artan tələbatını əsas tutaraq 15 avqust 2024-cü il tarixindən etibarən dəyişikliklər ediləcək.
Qeyd edək ki, internetin qiyməti qalxandan sonra bölgələrdə internet tarifləri ucbatından internet xidmətindən imtina etmək istəyənlərin sayı artır. Lakin bu istəkdə olanlara qarşı rayon yerli qovşaqları qanunsuz hərəkət edir. Belə ki, kimsə internet xidmətindən imtina edərsə Aztelekom tərəfindən abonentə pulsuz təqdim edilən modemlər geri təhvil alınmır, əvəzində isə imtina etdiyinə görə o, 130 manat cərimə olunur.
Görəsən, bu hal nə dərəcədə düzgündür?
Nadim Əliyev: “İnternetin qiyməti qalxandan bu xidmətdən imtina edənlərin artacağı gözlənilirdi”
İKT sahəsi üzrə ekspert Nadim Əliyev “Bakı-Xəbər”ə şərhində bildirdi ki, internetin qiyməti qalxandan bu xidmətdən imtina edənlərin artacağı gözlənilirdi: “Əhalinin xeyli hissəsinin hələlik yüksək sürətlərə ehtiyacı yoxdur. Regionlarda, kəndlərdə yaşayan bəlli bir təbəqə əhali üçün 10 Mbit/s internet sürəti indiki anda yetərlidir. Elementar kommunikasiya və xidmətləri əldə etmək üçün, təhsil və s. xidmətlər üçün bu sürət artıqlaması ilə bəs edir.
Bölgələrdə yaşayanlar 18 manat ödəməklə internet sürətini əldə edirdi. Ancaq indi tarifin 25 manat olması kənd yerində yaşayanlara sərf etmir. Bu səbəbdən də insanlar internet xidmətindən imtina edir. Qonşular, yaxınlar yığışıb şərikli internet xidməti formalaşdıracaq. Internet xidmətindən imtinaya görə şəxsin 130 manat cərimə olunması düzgün deyil. Müqavilədə xidmətdən imtinaya görə hansısa məbləğdə cərimə qeyd edilməyibsə bunu edə bilməzlər”.
Osman Gündüz: “İnternet xidmətindən imtina etmək istəyənlərə qarşı yerli qovşaqlar ədalətsiz münasibət sərgiləyir”
Azərbaycan İnternet Forumunun prezidenti Osman Gündüzün sözlərinə görə, normalda modemi təhvil verməklə xidmətdən sərbəst imtina etmək hüququnun olması vətəndaşa izah olunmalıdır: “Ancaq internet xidmətindən imtina etmək istəyənlərə qarşı yerli qovşaqlar ədalətsiz münasibət sərgiləyir. Kim internetdən imtina edirsə 130 manat cərimələnir. Bu nə məntiqdir? "Aztelekom" son 2-3 ildə bölgələrdə yeni GPON infrastrukturu qurduqdan sonra "Huavey" şirkətindən aldığı modemləri vətəndaşlara pulsuz təqdim edərək minimum tarif 18 manat (40 Mbit/s) olmaqla bir illik internet xidməti müqaviləsi bağlayıb. 15 avqust tarixindən başlayaraq isə bu, 25 manata (100Mbit/s) qaldırılıb. Bu internet sürətlərinə ehtiyacı olmayanların seçimləri olmadığından xidmətdən imtina etməsi, xidmətə bağlanmaq üçün qonşularla "şərikli internet" seçimi etmələri haqqında sosial mediada məlumatlar yayılır”.
Günel CƏLİLOVA
