Paşinyan Putinlə 2022-ci il nüvə razılığından imtina etdi, ABŞ-la Sazişə qoşulur...
Təbriz Musayev: “Prinsipcə, İrəvanın Rusiya ilə nüvə sahəsində əməkdaşlıqdan imtina edəcəyi gözlənilən idi”
Ermənistan “123 saylı Nüvə Razılaşması”na qoşulmaq üçün ərizə təqdim edib. Bu barədə ABŞ Dövlət Departamenti məlumat yayıb. Qeyd edilib ki, bu, İrəvana ABŞ-nin mülki nüvə enerjisi texnologiyalarına çıxış əldə etməyə imkan verəcək. Qetd edək ki, ABŞ-nin 48 ölkə və ərazi ilə analoji müqavilələri var.
Bu, faktiki, Ermənistanın Rusiya ilə nüvə sahəsindəki əməkdaşlıq razılaşmasından qopmaq deməkdir. Məsələ ondadır ki, 2022-ci ilin aprelində Ermənistan baş naziri Nikol Paşinyanla Rusiya prezidenti Vladimir Putin arasında Moskvada keçirilən görüşdə 6 sənəd imzalanıb. Sənədlərdən biri enerji və qeyri-enerji layihələri sahəsində Ermənistan-Rusiya əməkdaşlığının hərtərəfli proqramıdır. Həmin proqramda “Metsamor” AES-in yenidən qurulmasına Rusiyanın maliyyə yardımı göstərməsi nəzərdə tutulub. Halbuki, həmin razılaşmaya görə, 2035-ci ilə qədər “Metsamor” AES-də Rusiya yeni generatorlar tikməli idi. Ancaq məlum olur ki, Ermənistan bu razılaşmadan imtina edir və eyni zamanda ABŞ-la nüvə sahəsində əməkdaşlığı genişləndirir. Faktiki olaraq, Rusiya ilə bu sahədə əməkdaşlıqdan qaçır. Ona görə də Ermənistanın ABŞ-ın “123 saylı Nüvə Razılaşması”na qoşulmaq niyyəti əslində Paşinyanın Putinlə 2022-ci ildə imzaladığı razılaşmadan imtinadır.
“Bir müddət sonra Ermənistan digər sahələrdə Rusiya ilə əməkdaşlıqdan imtina edəcək”
Sözügedən məsələ ilə bağlı fikirlərini “Bakı-Xəbər”lə bölüşən İrəvan Azadlıq Təşkilatının sədri Təbriz Musayev hesab edir ki, İrəvanın belə bir addım atacağı gözənilən idi: “Hələ bu harasıdır? Mərhələli şəkildə Ermənistan hakimiyyəti Rusiya ilə imzalanan digər öhdəliklərdən də imtina edəcək. Artıq bu proses gedir. Söhbət Ermənistanın de-yure təmsil olunduğu KTMT-də de-fakto iştirak etməməsindən gedir. Prinsipcə, İrəvanın Rusiya ilə nüvə sahəsində əməkdaşlıqdan imtina edəcəyi gözlənilən idi. Çünki reallıq ondan ibarətdir ki, Ermənistan Rusiyanı Qərbə satıb. O Rusiya ki, erməniləri süni şəkildə dədə-baba yurdlarımıza köçürüb yoxdan Ermənistan yaradıb. O Rusiya ki, Qarabağa 1923-cü ildə Muxtar Vilayət statusu verərək erməniləri qoruyub. Birinci Qarabağ müharibəsində ərazilərimizin işğalına dəstək verib. Ancaq bütün bunlara rəğmən, ermənilər Rusiyaya xəyanət etdilər. Moskva bunu nə qədər Paşinyanla əlaqələndirsə də, Nikolu seçən, ona dəstək verən erməni cəmiyyətidir. Görünən odur ki, bu il aprelin 5-də Brüsseldə Ermənistan, ABŞ və Avropa İttifaqı razılaşması Paşinyan hakimiyyətini daha da cəsarətləndirib. Məhz bundan çıxış edərək Rusiya ilə nüvə sahəsində imzalanan əməkdaşlıqdan imtina edir. Yeni atom reaktorlarının tikintisini ABŞ və Fransaya həvalə edir. Artıq bununla bağlı intensiv danışıqlar gedir. Bu, Rusiyadan nüvə əməkdaşlığı sahəsində qopmağın təzahürüdür. Bir müddət sonra Ermənistan digər sahələrdə də Rusiya ilə əməkdaşlıqdan imtina edəcək. Söhbət ondan gedir ki, Ermənistan birdən-birə bunu edə bilmədiyi üçün mərhələli şəkildə edir. O baxımdan bu, hələ son deyil”.
Vidadi ORDAHALLI
