Qəhrəmanlıq salnaməsində adı olan igid...
Dağlar diyarı Lerikdə dünyaya göz açan Birinci Qarabağ müharibəsi şəhidi Malik Sədaqət oğlu Bağışovun keçdiyi qısa həyat yollu fədakarlıqla, mərdliklə, Vətənə məhəbbətlə doludur. Çünki o, 18 yaşında şərəfli ölümü ilə qürur və heyrət verici bir tarix yazıb. Xalqımızın igid, vətənpərvər oğlunun anadan olmasının 50-ci ildönümü münasibətilə xatirəsi yad edilib.
Lerik Rayon İcra Hakimiyyətinin başçısı Əkbər Abbasov, Yeni Azərbaycan Partiyasının Lerik Rayon Təşkilatının sədri Malik Mirzəyev, Lerik Rayon Ağsaqqallar Şurasının sədri Elxan Qəmbərov, Qarabağ Müharibəsi Əlilləri, Veteranları və Şəhid Ailələri İctimai Birliyinin Lerik rayon filialının sədri Veysəl Məlikov, şəhidin ailə üzvləri və ictimaiyyət nümayəndələri Lerik şəhər qəbiristanlığında qəhrəman Vətən sevdalısı Malik Sədaqət oğlunun məzarını baş çəkib, önünə gül dəstələri düzüblər.
Rayon icra hakimiyyətinin başçısı Əkbər Abbasov öz çıxışında Vətən naminə oddan, alovdan keçən şəhidin döyüş və həyat yolundan bəhs edib. Həmçinin I Qarabağ müharibəsində, Aprel döyüşlərində, Vətən Müharibəsində, eləcə də antiterror əməliyyatlarında Lerik rayonundan olan cəsur oğulların rəşadətindən danışıb. Şəhidin qardaşı Namiq Bağışov Malikin xatirəsinə göstərilən ehtirama görə rayon rəhbərinə və iştirakçılara ailə üzvləri adından minnətdarlığını bildirib.
1974-cü ildə Lerik şəhərində ziyalı ailəsində dünyaya göz açan Malik Sədaqət oğlu erməni quldurların Azərbaycana iddialara başlayan vaxtdan namuslu bir Vətən övladı kimi dincliyini itirib. 10-cu sinfi bitirib, Bakı Maşınqayırma Texnikumuna daxil olsa da, öz yerini düşmənlə mübarizə meydanında görüb. Odur ki, 1992-ci ildə təhsilini yarıda qoyub ön cəbhəyə yollanıb. Qısa hərbi təlim keçdikdən sonra yağıya qarşı vuruşa başlayıb. Ağdamda, Füzulidə, Xocavənddə, Haramı düzündə qəzəblə, intiqam hissi ilə vuruşub və düşmənə layiqli cavab verməyi bacarıb. 20 fevral 1992-ci ildə qeyri-bərabər döyüşdə son gülləsini düşmənin başına çaxmaqla şəhidlik zirvəsinə ucalıb.
Bəli, şəhidlər ölməz onlar daim xatirələrdə yaşayırlar. Azərbaycan xalqı Malik Sədaqət oğlunun zaman-zaman gələcək nəsillərə örnək ömür yoluna baxıb fəxr edərlər.
Zəfər ORUCOĞLU
Azərbaycan Jurnalistlər Birliyinin üzvü
