Putinin Bakı səfərinin pərdəarxasına dair inanılmaz iddia - fantaziyadır...
Fikrət Yusifov: “Hesab edirəm ki, bu, Qərbin Azərbaycana qarşı növbəti şantajıdır”
Məlum olduğu kimi, Rusiya prezidenti Vladimir Putin Azərbaycanda iki gün rəsmi səfərdə olub. Bu arada Putinin səfəri və bunun arxasında dayanan niyyətlərlə bağlı müxtəlif fərziyyələr səslənir. Bunu onun hansısa planları və digər məqsədləri ilə əlaqələndirmək istəyənlər var.
Putinin Bakı səfərindən sonra Qərbin aparıcı media platformaları belə bir tezis ortaya atıblar ki, guya tərəflər gizli qaz alqı-satqısına dair razılaşma əldə ediblər. Guya Rusiya nisbətən ucuz qiymətə Azərbaycana qaz satacaq. Daha sonra isə Azərbaycan onu öz qazı kimi Qərb ölkələrinə ixrac edəcək.
Axı, bu necə olacaq? Hələ Ukrayna müharibəsi başlamazdan əvvəl Azərbaycan 2027-ci ilə qədər Avropa ölkələrinə 20 milyard kubmetr qaz ixrac edəcəyini bəyan edib. Rusiyanın qazı isə qat-qat böyük həcmdədir. Belə olan halda o boyda qazı necə gizli alıb Qərbə satmaq olar?
“Azərbaycan sanksiyalar altında olan Rusiyadan qazı alıb onu Qərbə öz qazı kimi satmağa qalxarsa...”
Sözügedən məsələ ilə bağlı fikirlərini “Bakı-Xəbər”lə bölüşən sabiq maliyyə naziri, professor Fikrət Yusifov bu iddiaları real hesab etmir: “Hesab edirəm ki, bu, Qərbin Azərbaycana qarşı növbəti şantajıdır. Qərb Azərbaycanı “öz istədiyi kimi” görmədikcə, biz hər addımda belə şantaj hallarına rast gələcəyik. Bax, məsələnin kökündə dayanan budur. Qərbin Azərbaycana münasibəti işğalçı Ermənistana olan münasibət deyil. Baxın, artıq iki il yarımdır ki, Ermənistan sanksiyalar altında olan Rusiyaya milyardlarla dollar həcmində idxalı qadağan olunmuş malları və xüsusilə də Rusiyanın hərbi sənayesi üçün lazım olan malları xaricdən öz ölkəsinə idxal edərək, sonradan başqa məhsul adı altında Rusiyaya ixrac etməklə məşğuldur. Lakin Qərb Ermənistana bununla bağlı yalançı xəbərdarlıqdan dolayı heç nə etmək istəmir. Bununla bağlı ciddi araşdırma aparmır. Çünki bunda maraqlı deyil. Bir anlıq təsəvvür edin ki, Rusiyaya bu “ayı xidmətini” Azərbaycan göstərsəydi nə baş verərdi? Qərb Azərbaycana qarşı daha ağır sanksiyalar tətbiq edərdi. Ona görə biz işimizi yaxşı bilirik, Qərbə bizə sanksiya tətbiq etmək üçün heç bir əsas vermərik. Qərbi sıxıb-boğan Azərbaycanın bölgədə balanslaşdırılmış siyasət aparmasıdı. Görünən odur ki, Qərb bunu həzm edə bilmir. Azərbaycan isə Qərbin təsiri ilə addımlar atmaqdan uzaq bir ölkədi. Əgər Azərbaycan sanksiyalar altında olan Rusiyadan qazı alıb onu Qərbə öz qazı kimi satmağa qalxarsa, bunun üstü həmən açılar və Qərb Rusiyaya tətbiq etdiyi sanksiyaları həmən Azərbaycana da tətbiq edər. Bu isə Azərbaycana lazım deyil. Heç Rusiya da Azərbaycanı buna təhrik etməz. Çünki elə məsələlər var ki, onu həyata keçirmək mümkün deyil”.
Vidadi ORDAHALLI
