Putin Bakıdan qayıdan kimi Kursk barədə konkret vaxt qoydu...
Ramil Məmmədli: “Ukrayna ordusunu qoyulan vaxta qədər və hətta ondan da tez Kurskdan çıxara biləcək”
Rusiya Prezidenti Vladimir Putin Ukrayna hərbçilərini Kursk vilayətindən çıxarmaq üçün orduya oktyabra kimi vaxt verib.
Qeyd olunub ki, rus qoşunları bunu Rusiyanın Donbasda, ilk növbədə, Pokrovsk və Torez istiqamətlərində hücum əməliyyatı apardığı əsas bölgələrdən qüvvələri çıxarmadan etməlidir. Faktiki olaraq, Rusiya hərbi komandanlığı, Pokrovsk və Torez istisna olmaqla, cəbhənin bütün istiqamətlərindən Kurska hərbi qüvvə göndərir.
Ukrayna Müdafiə Strategiyası Mərkəzinin eksperti Biktor Kiyevlyuk da bildirib ki, Rusiya komandanlığı Zaporojye vilayətindən iki briqada, Xerson istiqamətindən iki desant-hücum taborunu çıxarıb. Onun sözlərinə görə, Xerson istiqamətində olan Qara dəniz donanmasının 810-cu briqadası, Uqledarda döyüşən 155-ci dəniz piyadaları briqadası Kursk vilayətində peyda olub. Hətta 2024-cü ilin yaz çağırışçıları da Kurska göndərilir.
Yeri gəlmişkən, Putin ordu qarşısında belə bir tələbi Azərbaycandan səfərdən qayıdandan sonra qoyub. Maraqlıdır, Rusiya oktyabra kimi ukrayınları Kurskdan çıxarmağı tam bacaracaqmı?
“Rusiya Ukraynanın ordu birləşmələrini ora cəlb etməklə, bu ölkənin cənub istiqamətində mövqelərini zəiflədir”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında bildirdi ki, Rusiya Ukrayna ordusunu qoyulan vaxta qədər və hətta ondan da tez Kurskdan çıxara biləcək: “Ən azından iki ölkə arasında qüvvələr nisbəti arasında çox böyük fərq var. Rusiyanın Ukrayna ərazisində apardığı əməliyyatları strateji siyasi manevr kimi də təqdim etmək olar. Rusiya 2022-ci ildə başlayan əməliyyatlardan sonra niyə Ukrayna ərazisində hərbi əməliyyatlar keçirməsini əsaslandırmalı idi. Hərbi əməliyyatlar Kursk istiqamətinə, yəni Rusiya ərazisinə keçdikdən sonra bu məsələdə sərtlik nümayiş etdirir. Rusiya bütün dünyaya göstərir ki, onun da ərazisində əməliyyatlar gedir. Dolayısı ilə Ukrayna ərazisində Rusiyanın irəliləməsi, əraziləri işğal etməsi dünya mediasının gözündən kənarda qalıb. Daha çox diqqət Kurska yönəlib. Ukraynanın Kurskdakı əməliyyatı hərbi-taktiki baxımdan Rusiyanın əleyhinə olsa da, ancaq hərbi-siyasi, strateji və siyasi baxımdan Moskvanın xeyrinədir. Rusiya bundan istifadə edib Ukraynada dağıdıcı əməliyyatların miqyasını daha da genişləndirə bilər. Ehtimal ki, buna cəhd edəcək. Fikrimcə, Putin Rusiya ictimai rəyində Ukraynaya nifrəti körükləmək üçün Kursku azad etməyə tələsmir. Kursk məsələsini şişirtməklə daha çox digər istiqamətlərdə əməliyyatlarını davam etdirir. Baxmayaraq ki, Ukrayna qüvvələri avqustun 6-dan başlayaraq Kurskun yaşayış məntəqələrini ələ keçirir, amma bu, Rusiyanın Donesk istiqamətində təzyiqlərini azaltmayıb. Tam əksinə, Pakrovsk şəhərinə doğru irəliləməkdədilər. Bu şəhər alınandan sonra əsas təchizat yolu Rusiyanın nəzarətinə keçəcək və Ukraynanın həmin istiqamətdə olan qüvvələri çətin duruma düşəcək. Ehtimal odur ki, Rusiya uzun müddətdən bəri nail olmaq istədiyi mövqelərə çıxış əldə etməyə çalışacaq. Söhbət ondan gedir ki, Rusiya Odessaya çıxmaqla Rumıniyadan Ukraynaya NATO-nun təchizat yollarını bağlamağa çalışacaq. Bir sözlə, Kursku azad etmək Rusiya üçün çətin deyil. Rusiya Ukraynanın ordu birləşmələrini ora cəlb etməklə, bu ölkənin cənub istiqamətində mövqelərini zəiflədir. Məqsəd həm də Odessanı almaqla Ukraynanın dənizə çıxışını bağlamaqdır. Rusiyanın planı həm də budur”.
Vidadi ORDAHALLI
