Sentyabrdan sonra Qafqazda sabitliyin yeni şərtini İlham Əliyev açdı...
![Image](/uploads/posts/2024-08/aliyev2.webp)
Hüseyn İbrahimov: “Bu o deməkdir ki, Azərbaycanla Ermənistan arasında hansısa maneə qalmayıb”
Cənubi Qafqazda sabitlik əsasən Rusiya və Azərbaycanın qarşılıqlı fəaliyyətindən asılıdır. Bu barədə Prezident İlham Əliyev Rusiya prezidenti Vladimir Putinlə danışıqlarının yekunlarına dair brifinqdə bildirib:
“Biz, eyni zamanda, məhdud formatda keçirilən görüşdə regional təhlükəsizliklə bağlı məsələləri müzakirə etdik. Ötən ilin sentyabrından sonra bölgədə tamamilə yeni vəziyyət yaranıb. Azərbaycan öz suverenliyini və ərazi bütövlüyünü tam bərpa edib. Yeni vəziyyət Cənubi Qafqazda möhkəm və uzunmüddətli sülhün bərqərar olması üçün yeni imkanlar açır. Bütün Cənubi Qafqaz regionunda sabitlik və təhlükəsizlik bir çox hallarda Rusiya ilə Azərbaycan arasında sıx qarşılıqlı fəaliyyətdən asılıdır”.
“Artıq yeni reallığın şərtlərindən biri odur ki, Zəngəzur dəhlizi və digər kommunikasiyalar açılmalıdır”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimov hesab edir ki, ölkə başçısının arqumentləri reallığa söykənir: “Məsələ ondadır ki, Azərbaycanın hərtərəfli inkişafına mane olan əsas faktor Qarabağda suverenliyimizin bərpası məsələsi idi. Düzdür, 44 günlük Vətən müharibəsində ərazilərimizin böyük hissəsini işğaldan azad etdik. Ancaq Qarabağın müəyyən hissəsi separatçıların nəzarətində idi. Orada Rusiya sülhməramlıları yerləşsə də, separatçılar öz bildikləri kimi edirdilər. Azərbaycanın nəzarətinə keçməyə müsbət yanaşmırdılar, əksinə, əvvəlki separatçı mövqedən çıxış edirdilər. Bundan da bir sıra ölkələr öz mənafeyi üçün istifadə edirdi. İran nömrəli avtomobillər Xankəndiyə qanunsuz yük daşıyırdılar. Fransadan müəyyən siyasi qüvvələr Qarabağa qanunsuz səfər edirdilər və s. Bu da istər-istəməz bir sıra qeyri-müəyyənliklərə səbəb olurdu. Nəhayət, Azərbaycan 23 aprel 2023-cü ildə Laçınla Ermənistan sərhədində yerləşən giriş məntəqəsində öz postunu qurdu. Bununla da qanunsuz silah daşımalarının qarşısı alındı. Ötən ilin sentyabrında isə keçirilən uğurlu antiterror əməliyyatları sayəsində Qarabağda suverenliyimiz tam bərqərar edildi. Nəticədə regionda tamamilə yeni vəziyyət yarandı. Yəni müəyyən maraqlı dövlətlərin Qarabağ amilindən təzyiq vasitəsi kimi istifadə etməsi imkanları tam aradan qalxdı. Ümumiyyətlə, məsələ həll edildi və Qarabağ sözü Azərbaycan-Ermənistan danışıqları leksikonundan çıxarıldı. Bu isə o deməkdir ki, Azərbaycanla Ermənistan arasında hansısa maneə qalmayıb. Artıq yeni reallığın şərtlərindən biri odur ki, Zəngəzur dəhlizi və digər kommunikasiyalar açılmalıdır. Bundan öncə isə iki ölkə arasında sülh sazişinin imzalanması vacibdir. Daha sonra region dövlətlərinin inkişafına töhfə verən yeni layihələrin həyata keçirilməsinə start verilməlidir. Regionda sabitliyin təmini isə Azərbaycan və Rusiyanın sayəsində mümkün olacaq”.
Vidadi ORDAHALLI