Gənclərin inkişafı üçün idman infrastrukturlarından tam istifadə olunurmu?..
![Image](/uploads/posts/2024-08/1724161732_media-logo.webp)
Uşaq və gənclərin mənəvi baxımdan sağlam olması ilə yanaşı, fiziki sağlamlığı da çox əhəmiyyətlidir. Hər bir uşağın mənəvi tərbiyəsi ilə paralel olaraq fiziki inkişafına da xüsusi diqqət yetirilməlidir. Cəmiyyət olaraq bu istiqamətdə səylərimizi əsirgəməməliyik.
Dövlət tərəfindən gənclərin fiziki və mənəvi inkişafının formalaşması üçün müxtəlif proqramlar, layihələr həyata keçirilir, müəssisələr açılıb, idman zalları, rəsm kursları və sairlər fəaliyyət göstərir. Uşaqlar və gənclər rəsm kursları vasitəsilə mənəviyyatlarını formalaşdırırlarsa, idman klublarında, idman qurğularında, komplekslərdə fiziki sağlamlıqlarını inkişaf etdirirlər.
Dövlət səviyyəsində uşaq və gənclərin mənəvi, eləcə də fiziki inkişafının yüksəldilməsi üçün konkret işlər görülür. Onların bəzilərini qeyd etdik.
Bilirsiz ki, həm paytaxtda, həm də yerlərdə, rayonlarda, şəhərlərdə Olimpiya İdman Kompleksləri, idman qurğuları, idman məktəbləri, idman zalları fəaliyyət göstərir.
Bunlar əsasən uşaq və gənclərin fiziki, mənəvi inkişafı üçün yaradılıb. Olimpiya İdman Kompleksləri, müxtəlif idman qurğuları, meydançalar gənc nəslin daha sağlam və hərtərəfli inkişafı üçün geniş imkanlar yaradır. Bu istisnasızdır.
Amma gəlin görək, gənclərin inkişafı üçün idman infrastrukturlarından tam istifadə olunurmu?
Bu suala birmənalı cavab vermək çətindir. Amma bütün hallarda hesab edirik ki, bu infrastrukturun bir hissəsi əlçatan olsa da, bir hissəsi əlçatan deyil. Mütəxəssislər özləri də hesab edirlər ki, bəzi rayonlarda ümumiyyətlə mövcud komplekslərə giriş yoxdur, idmançıları ora buraxmırlar. Belə ziddiyyətli, narahatlıq doğuran məqamlar da var.
Ekspertlər deyir ki, paytaxtda bu infrastrukturlar əlçatandır, gənclərin fiziki inkişafında xüsusi rol oynayır. Amma bu fikirləri bir çox bölgələrə aid etməyin mümkün olmadığını deyən ekspertlərə görə, yerlərdə Olimpiya Komplekslərinə giriş əlçatan olmalıdır.
Ekspertlər deyir ki, rayonlarda saysız Olimpiya kompleksləri inşa olunub, dövlət o komplekslərin tikilməsinə böyük vəsait xərcləyib, içərisini bütün lazımı avadanlıqlarla, idman alətləri ilə təmin edib. Ekspertlərə görə, amma bu komplekslərin bir çoxunun vəziyyəti ürəkaçan deyil. Hətta bəzilərinin çox pis vəziyyətdə olduqlarının sirr olmadığını deyən ekspertlərin sözlərinə görə, bəziləri baxımsızdır, qapıları idmançıların üzünə açılmır və sair. Yerlərdəki idman məşqçiləri, müəllimləri də təsdiqləyirlər ki, bu gün rayonlardakı Olimpiya komplekslərinin çoxunun qapısı idmançıların üzlərinə bağlıdır. Rayonlardakı saysız Olimpiya komplekslərinin potensialından son beş - on ildə lazımı səviyyədə istifadə olunmuş olsaydı biz bunun uğurlu nəticələrini mütləq görərdik. Olimpiya komplekslərinin potensialından lazımı qədər istifadə olunmamasının nəticəsini Paris olimpiadasında gördük.
Bununla belə, ekspertlərin sözlərinə görə, son zamanlar mətbuatda gedən tənqidi fikirlər öz işini görür və Olimpiya komplekslərinə dövlət qurumlarının nəzarəti gücləndirilib. Ekspertlərin məlumatlarına görə, bir sıra rayonlarda baxımsız vəziyyətdə olan Olimpiya komplekslərində təmi işləri aparılır. Bütövlükdə, məqsəd odur ki, növbəti Olimpiya Oyunlarına töhfə verilsin. Çünki indiyə qədər rayonlarda Olimpiya komplekslərinin istifadəsiz qalması bizə çox böyük ziyan vurub, indi bu işə rəhbərlik edənlər səhvlərini düzəltməklə məşğuldurlar.
“İdmanla məşğul olmaq üçün indi ölkəmizin hər bir yerində gözəl şərait var”
Ekspertlər bildirdilər ki, Milli Olimpiya Komitəsinin Prezidenti, ölkə başçısı İlham Əliyev avqustun 14-də XXXIII Paris Yay Olimpiya Oyunlarında medal qazanmış Azərbaycan idmançılarını və onların məşqçilərini qəbul edərkən çox mühüm mesajlar verib və bu mesajlar ünvanına çatıb.
Prezident İlham Əliyev Paris Yay Olimpiya Oyunlarında medal qazanmış Azərbaycan idmançılarını və onların məşqçilərini qəbul edərkən
“Bir neçə idman növündə nəsillərin dəyişməsi prosesi gedir. Ona görə, təbii ki, biz növbəti Olimpiya Oyunlarına bu prizmadan yanaşmalıyıq və xüsusilə uşaq-yeniyetmə idmanına bundan sonra da diqqət göstərilməlidir. Nəzərə alsaq ki, idmanla məşğul olmaq üçün indi ölkəmizin hər bir yerində gözəl şərait var. İdmana rəhbərlik edən qurumlar arasında koordinasiya işləri düzgün qurulub, federasiyalar, klublar uğurla fəaliyyət göstərir. Nəzərə alsaq ki, hər bir Olimpiya Oyunlarından sonra, xüsusilə ölkəmiz üçün uğurlu Oyunlardan sonra idman bölmələrinə uşaqların, yeniyetmələrin axını müşahidə olunur, mən əminəm, növbəti Olimpiya Oyunlarına hazırlıq prosesi də ardıcıl aparılacaq.
Əlbəttə, tam əminəm ki, həm cüdo, həm digər idman növləri ilə məşğul olmaq istəyən uşaqlarımızın sayı çox olacaq və bunu arzulayıram. Uzun illər ərzində idmanın kütləviliyi ilə bağlı dediyim sözlər və verdiyim tapşırıqlar bir məqsədi güdür ki, fiziki, mənəvi cəhətdən sağlam, Vətənə bağlı, vətənpərvər və peşəkar gənc nəsil yetişsin. İdmançılarımızın uğurlu çıxışları bunu bir daha göstərdi ki, biz gənc nəslimizlə haqlı olaraq fəxr edə bilərik”-deyə bildirib.
Bakının idman infrastrukturları...
Ekspertlər qeyd etdilər ki, Prezident İlham Əliyev bu sahəyə xüsusi diqqət yetirir və görülən, eləcə də görüləcək işlərlə bağlı aidiyyəti qurumlara tapşırıqlarını verir.
Azərbaycan uşaq və gənclərinin fiziki və mənəvi cəhətdən inkişafı dövlətin əsas hədflərindən biridir. Prezident İlham Əliyev dəfələrlə bəyan edib ki, Azərbaycan idman ölkəsidir. Bəli, Prezident haqlıdır, bizim idmançılar bütün beynəlxalq turnirlərdə, çempionatlarda, Olimpiyada, dünya və Avropa yarışlarında həmişə öndə olub. Ölkəmizdə də idmanın inkifına xüsusi diqqət yetirilir. Barəsində danışdığımız idman infrastrukturu da dövlət tərəfindən yaradılıb və məqsəd də gənclərin fiziki inkişafını təmin etməkdir. Ölkəmizdə, eləcə də paytaxt Bakıda bu sahədə çox mühüm işlər görülüb, obyektlər inşa edilib. Bu idman komplekslərdə yerli və beynəlxalq əhəmiyyətli idman tədbirləri keçirilir.
Bu gün bir çox parklarda, Dəniz kənarı Bulvarda, ayrı-ayrı yaşayış binalarının həyətlərində idman alətləri qoyulub, qurğular quraşdırılıb. Sakinlərin özləri, övladları bu qurğularda idman edirlər. Bunlar tam ödənişsizdir və dövlət maliyyəsi hesabına quraşdırılıb. Bütün bunlar çox müsbət göstəricilərdir.
İnanırıq ki, bu sahədə olan məlum nöqsanlar tezliklə aradan qalıdırılacaq, uşaqlarımız və gənclərimiz o infrastrukturlardan daha geniş səviyyədə yararlanacaqlar.
Bütövlükdə, ölkəmizdə idmanın inkişafı üçün çox böyük imkanlar var və dövlət səviyyəsində bu prosesə ciddi dəstək verilir.
İradə SARIYEVA
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.