Əliyev-Putin görüşündən Şimal-Cənub dəhlizi ölkələrinə mesaj verildi...
Fuad İbrahimov: “Azərbaycanın tranzit əhəmiyyəti dayanmadan yüksəlir”
“Azərbaycanın ərazisində “Şimal-Cənub” dəhlizinin həm dəmir yolu, həm də avtomobil yolu seqmentləri tam şəkildə reallaşdırılıb və uğurla fəaliyyət göstərir”. Bunu Prezident İlham Əliyev rusiyalı həmkarı Vladimir Putinlə mətbuata bəyanatında deyib.
Ölkə başçısı daha sonra bunları qeyd edib: “Hazırda bu dəhlizin ötürücülük qabiliyyətini yüksəltmək üçün onun dəmir yolu sahəsinin modernləşdirilməsi ilə məşğuluq. Biz ildə 15 milyon ton və daha çox – 30 milyon tonadək yüklərin daşınması imkanlarından danışırıq və bu, tamamilə realdır. Ümidvaram ki, hazırkı şəraitdə Rusiya və Azərbaycan, həmçinin bu dəhlizin digər iştirakçıları birgə səylərlə öz fəaliyyətini davam etdirəcəklər. Bir daha deməliyəm ki, biz bu il həmin dəmir yolu sahəsinin tələb edilən ötürücülük qabiliyyətinə malik olması üçün modernləşdirilməsi məqsədilə təxminən 120 milyon dollar ekvivalentində vəsait nəzərdə tutmuşuq”.
“Xüsusən də İran Rəşt-Astara dəmir yolunun tikintisini sürətləndirməlidir”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Fuad İbrahimov bununla bağlı bir sıra məqamlara toxundu: “Ümumiyyətlə, bu görüş, dəhlizlərlə bağlı danışıqlar və mövcud reallıq bir sıra məqamlardan xəbər verir. Çünki dünyada çox ciddi geosiyasi və iqtisadi proseslər gedir. Nəzərə almaq lazımdır ki, məhz pandemiyadan sonra dünya iqtisadiyyatının parametrləri, baxışları dəyişib. Bu gün enerji təhlükəsizliyi olan və müxtəlif logistik, nəqliyyat infrastrukturlarına çıxışı olan ölkələr söz sahibi olacaqlar. Onların söz sahibi dövlətlərə çevrilməsi ehtimalı yüksəkdir. Bu baxımdan gələcəyin logistik, nəqliyyat infrastrukturu formalaşır. Faktiki olaraq bu gün bu proseslər formalaşır. 20-30 ildən sonra bu dəhlizlərin oynadığı rol əhəmiyyətli dərəcədə böyük olacaq. Azərbaycan bütün bu nəqliyyat yollarının qovuşağında yerəşir. Ancaq onu da nəzərə almalıyıq ki, belə uğurlu nəqliyyat konfiqurasiyası təsadüfdən yaranmayıb. Bununla bağlı uzun illər uğurlu siyasət aparılıb. Uzaqgörən siyasət, vəziyyəti düzgün qiymətləndirmək, vaxtında gələcəyin bir layihəsini həyata keçirmək üçün görülən işlər bu gün öz bəhrəsini verir. Məsələ ondadır ki, Azərbaycan bütün bunları edə bildi. Bir vaxtlar Azərbaycanın öz ərazisində həyata keçirdiyi layihələrə artıq region ölkələri qoşulur. Azərbaycan Avropa ilə Asiya arasında bir elastiklik yaradan məkandır. “Şimal-Cənub” nəqliyyat dəhlizi Rusiya üçün ən elastik, ən sürətli nəqliyyat dəhlizidir. Azərbaycansız bu dəhliz sadalanan üstünlüklərə malik ola bilməzdi. Ölkəmiz üzərinə düşən işləri görüb. Prezident Əliyev haqlı olaraq işarə etdi ki, bu dəhlizi tamamlayan digər ölkələr də üzərinə düşən işləri görməlidilər. Xüsusən də İran Rəşt-Astara dəmir yolunun tikintisini sürətləndirməlidir. Bu layihədən bütün region dövlətləri faydalana bilər. Azərbaycan bütün istiqamətlərdə səylərini artırır. O cümlədən “Şərq-Qərb” nəqliyyat dəhlizlərinin seqmentlərini gücləndirir. Bakı-Tbilisi-Qars dəmir yolunun ötürücülük qabiliyyəti 1 milyon tondan 5 milyon tona çatdırılıb. Bakı Dəniz Limanının yükaşırma qabiliyyəti 25 milyona çatdırılacaq. Bu istiqamətdə ən vacib halqa isə Zəngəzur dəhlizi olacaq. Əminəm ki, Azərbaycan üzərindən daşımalar bundan da qat-qat çox olacaq. Ukrayna müharibəsi və Yəməndə baş verənlərlə əlaqədar Azərbaycanın tranzit əhəmiyyəti dayanmadan yüksəlir. Çünki ölkəmiz üzərindən keçən dəhlizlər ən cazibədar nəqliyyat yollarıdır”.
Vidadi ORDAHALLI
