Rusiya erməni diasporu Putinin Bakı səfərindən bərk əsəbiləşib...
![Image](/uploads/posts/2024-08/1724161244_putin.webp)
Samir Hümbətov: “İstənilən halda onların bu istəyi həyata keçməyəcək və Rusiya-Azərbaycan münasibətləri normal məcrada davam edəcək”
Rusiya Erməniləri İttifaqı Bakıda səfərdə olan Prezident Vladimir Putinə müraciət ünvanlayıb. Müraciətin məğzindən görünür ki, Rusiya erməniləri Putinin Bakı səfərindən bərk narahat olublar.
Çünki görürlər ki, Azərbaycan-Rusiya münasibətləri yüksək səviyyədədir və buna görə də erməni lobbisi pozucu əməllərini davam etdirmək və müxtəlif avantüralarla öz naqis məqsədlərinə nail olmaq yolundan əl çəkmir. Ancaq anlamırlar ki, bununla Azərbaycanın dünyadakı nüfuzuna, ayrı-ayrı ölkələrlə, o cümlədən də Rusiya ilə münasibətlərinə xələl gətirə bilməyəcəklər. Bu baxımdan Rusiya Erməniləri İttifaqının Vladimir Putinin Azərbaycana səfəri ilə əlaqədar yaydığı müraciəti acizlik əlaməti saymaq olar.
Görünür, qurumun rəhbəri Ara Abramyan və onun yaxın ətrafı belə əsassız çağırışlarla Rusiya rəhbərliyinin mövqeyinə təsir göstərəcəklərini və bu yolla Azərbaycanı öz mövqeyindən çəkinməyə məcbur edə biləcəklərini düşünürlər. Bu faktın özü bir daha göstərir ki, erməni lobbi təşkilatları, hansı ölkədə fəaliyyət göstərmələrindən asılı olmayaraq, dünya erməniliyinin və Ermənistan dövlətinin maraqlarını əsas götürür və həmin ölkənin rəsmi siyasətinə təsir göstərməyə çalışırlar.
Ara Abramyan, Marqarita Simonyan, Aram Qabrielyanov və bu kimi digər erməni diaspor rəhbərləri və fəalları zənn edirlər ki, belə cəhdlərlə rəsmi Moskvanı Azərbaycanla təzyiq və tələb dili ilə danışmağa məcbur edə bilərlər. Azərbaycanın prinsipial mövqeyini çox yaxşı bilən Rusiya ermənilərinin əsl məqsədi heç də ermənilərin Qarabağa qayıdışına, məhkum olunmuş separatçıların azad edilməsinə nail olmaq deyil, Rusiya-Azərbaycan münasibətlərini zədələməkdir.
Prezident Vladimir Putinin Azərbaycana dövlət səfəri proqramının zənginliyi, səfər çərçivəsində Prezident İlham Əliyevlə apardığı müzakirələr, səsləndirdiyi fikirlər aydın şəkildə göstərir ki, bu gün Azərbaycan-Rusiya münasibətləri yüksək səviyyədədir. Buna görə də erməni lobbisi pozucu əməllərini davam etdirir.
Siyasi şərhçi Samir Hümbətov “Bakı-Xəbər”ə açıqlamasında bildirdi ki, Putinin Bakı səfıri çox zəngin oldu: “Bu baxımdan ki, birgünlük səfər çərçivəsində həm ikili, həm də çoxtərəfli görüşlər keçirildi. Bəzi vacib məsələlərlə bağlı ciddi müzakirələr aparıldı və razılıq əldə olundu. Rusiya ilə Azərbaycan arasında son dövrlər əldə edilmiş razılaşmalar içərisində bu səfər zamanı imzalananlar xüsusi yer tutur. Hazırda region çox qarışıq vəziyyətdədir. Burada yalnız Rusiya yoxdur. Artıq Avropa İttifaqı mülki missiya adı altında mövcudliğunu təmin edib. ABŞ hərbi varlığına can atır. Hindistan Ermənistan üzərindən çox fəallaşmaq istəyir. İran və Türkiyənin təsiri çox güclüdür. Bir sözlə, qarışıq vəziyyət var. Rusiyadakı erməni diasporunun Putinə müraciət etməsi erməni diasporunun parçalanmasından da xəbər verir. ABŞ və Qərbdəki erməni diasporu əlaqələri daha çox onlarla dərinləşdirir. Rusiya erməniləri isə Putinə güvənir. Onlar çalışır ki, ölkələrimiz arasında gərgin münasibətlər olsun və ermənilər də bundan istifadə etsin. İndiyə qədər bundan maksimum yararlanıblar. Hazırda Azərbaycan Rusiya üçün böyük önəm daşıyır. Həm iqtisadi, həm də siyasi baxımdan Rusiya da bizim üçün lazımlı ölkədir. Bu həm də Rusiyadakı ermənilərlə Paşinyan hakimiyyəti arasındakı fikir ayrılığının nəticəsi ola bilər. Çünki Paşinyan Rusiyaya arxa çevirir ki, bu da Rusiyadakı erməni diasporunu qane etmir. İstənilən halda onların bu istəyi həyata keçməyəcək və Rusiya-Azərbaycan münasibətləri normal məcrada davam edəcək”.
Məhəmmədəli QƏRİBLİ