Lavrov son nöqtəni qoydu – Kurska hücumdan sonra danışıqlardan söhbət gedə bilməz...
![Image](/uploads/posts/2024-08/lavroc.webp)
"Oğrunun papağı başında çoxdan yanıb”...
Rusiyanın xarici işlər naziri Sergey Lavrov Ukraynanın Kursk bölgəsinə edilən hücumlardan sonra Kiyevlə artıq heç bir danışıqlardan söhbət gedə bilməyəcəyini deyib. Rusiyanın dövlət kanalı “Rossiya 1” televiziyasına açıqlama verən Lavrov, “Prezidentimiz (Vladimir Putin) çox açıq şəkildə Kursk bölgəsinə edilən hücumlardan sonra heç bir danışıqlardan söhbət gedə bilməyəcəyini bildirdi. Prezidentin, çox mühüm bir cümləsinə də diqqətinizi çəkmək istəyirəm: “Tezliklə son vəziyyəti dəyərləndirəcəyik”.
Ukrayna ordusunun Kurska hücuma Zelenskinin ABŞ-dan təlimat alaraq cəsarət etdiyini deyən Rusiya xarici işlər naziri, Qərb ölkələrinin Kiyevin Kursk bölgəsinə hücumlara yanaşmasına bir rus atalar sözü ilə cavab verib: "Oğrunun papağı başında çoxdan yanıb” (günahkar olduğunu biruzə verib). Qərbdə bu hücumla bağlı "bizim bununla heç bir əlaqəmiz yoxdur", ardınca "bizdən heç kim soruşmadı", sonra da "hə, bizə deyildi, amma icazə vermədik”, “biz razı olmadıq, amma Zalujnı (Ukraynanın keçmiş Baş Qərargah rəisi) bizi dinləmədi” kimi açıqlamalar verdilər. Bu uşaq cəfəngiyyatıdır.Zelenskinin heç vaxt belə qərar verə bilməyəcəyini hər kəsə çox yaxşı bilir. Əgər o, ABŞ-dan göstəriş almasaydı, heç vaxt buna cəsarət etməzdi”.
Rusiya rəsmisi Yuri Uşakov isə, Moskvanın Ukrayna ilə bağlı sülh təkliflərinin masada olduğunu, lakin indiki mərhələdə danışıqların “uyğunsuz” olacağını deyib. Uşakov bəyan edib ki, danışıqlar prosesindəki fasilənin nə qədər davam edəcəyi yerlərdəki vəziyyətdən asılı olacaq.
"Hazırkı mərhələdə bu avantüranı (Kursk vilayətində baş verənləri nəzərdə tutur) nəzərə alaraq, danışıqlar aparmayacağıq", - Uşakov deyib.
Rusiya tərəfinin təkliflərinin ləğv edilib-edilməməsi ilə bağlı suala Uşakov belə cavab verib: “Xeyr, ləğv edilməyib, lakin indi hər hansı danışıqlar prosesinə girmək tamamilə yersiz olardı”.
TAHİR