Ukrayna ordusu Kurskda, NATO İrəvanda, Putin Bakıda - dairə qaranlıq və qapalıdır...
Ramil Hüseynov: “Bu, Azərbaycanın önəminə verilən dəyərin göstəricisidir”
Məlum olduğu kimi, Rusiya Federasiyasının Prezidenti Vladimir Putin Azərbaycana səfər edib. Səfər çərçivəsində bir sıra görüşlər keçirilib, müzakirələr aparılıb.
Görünən odur ki, Rusiya Azərbaycanın regionda və dünyada oynadığı rola xüsusi önəm verir. Belə olmasaydı, Putin olduqca gərgin iş rejimində Azərbaycana səfərə belə xüsusi diqqət ayırmazdı. Məsələ ondadır ki, Ukrayna ilə Rusiya arasında müharibə şiddətlənir. Ukrayna qoşunları Rusiyanın Kursk vilayətinin bir sıra yaşayış məntəqələrini nəzarətə götürüb. ABŞ Ermənistanda fəallığını artıraraq Rusiyanı bu ölkədən sıxışdırıb çıxarmağa çalışır. Bütün bunlar həm də onu deməyə əsas verir ki, Azərbaycana olan ehtiyac artır.
Azərbaycan-Rusiya əlaqələri dövlətlərin müstəqilliyi, ərazi bütövlüyü, bərabərhüquqluluq və bir-birinin daxili işlərinə müdaxilə etməmək prinsipləri əsasında qurulub və inkişaf edir. Rusiya ilə Azərbaycan Şimal-Cənub nəqliyyat dəhlizinin inkişaf etdirilməsi sahəsində əməkdaşlıq edir. Bu yonda konkret və praktik addımlar atılır. Azərbaycan müstəqil siyasəti, öz milli maraqları çərçivəsində bütün tərəflərlə əməkdaşlığı inkişaf etdirir. Azərbaycanın həm Qərblə, həm də Rusiya, İran və digər ölkələrlə yaxşı əlaqələri var. Azərbaycan həm Rusiya, həm də Ukrayna ilə yaxın münasibətlərə malikdir. Prezident İlham Əliyevin beynəlxalq arenada yürütdüyü siyasət, məharətli diplomatiyası, həm də Rusiya ilə qurulmuş düzgün münasibətlər nəticəsində Azərbaycan qarşısında duran tarixi vəzifələrin həllinə nail oldu. Öz ərazi bütövlüyünü və suverenliyini bərpa etdi. Azərbaycan həm də dünyada dialoq məkanı kimi tanınır. O baxımdan Bakının vasitəçiliyi timsalında Rusiya-Ukrayna qarşıdurmasının sülh yolu ilə həllində onun imkanlarından istifadə oluna bilər.
“Ölkəmizlə münasibətlərin inkişaf etdirilməsi Rusiyanın hazırkı vəziyyəti üçün önəmli rola malikdir”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynov da hesab edir ki, Kurskda gedən proseslər fonunda Putinin Bakı səfəri Azərbaycanın önəminə verilən dəyərin göstəricisidir: “Nəzərə almalıyıq ki, dünyada çox mürəkkəb proseslər gedir, geosiyasi qarşıdurma güclənir. Yaxın Şərqdə gərginliyin artması, İran-İsrail qarşıdurmasının artan xətt üzrə getməsi, Gürcüstanda gedən proseslər, Qərbin Ermənistanla bağlı xüsusi fəallıq göstərməsi birbaşa Rusiyaya, onun maraqlarına təsir göstərir. Azərbaycan Rusiyanın Hind okeanı hövzəsinə çıxışını təmin edən körpüdür. Azərbaycansız qısa və əlverişli yolun təmini coğrafi baxımdan mümkünsüzdür. Söhbət Şimal-Cənub nəqliyyat dəhizi tam hazır olandan sonra yaranan imkanlardan gedir. Çünki bu dəhliz Rusiyanı sanksiyanın ciddi təsirlərindən qoruyur. Qərb Ermənistanı silahlandırmaqla, sanki bölgədə gərginliyi yenidən alovlandırmaq istətir. Bu da təkcə Azərbaycanın yox, region dövləti olan Rusiyanın da maraqlarına cavab vermir. Ona görə də bu mürəkkəb geosiyasi labirintdə Rusiya Azərbaycanın önəminə hər zaman olduğundan daha çox dəyər verir. Çünki ölkəmiz regionun açar dövlətidir. Azərbaycanla münasibətlərin inkişaf etdirilməsi Rusiyanın hazırkı vəziyyəti üçün önəmli rola malikdir. Azərbaycanın vacib üstünlüyü həm də odur ki, ölkəmiz müstəqil siyasət yürüdür. Bütün bunlar ölkəmizin siyasi çəkisini artırır”.
Vidadi ORDAHALLI
